Jadzierny parytet pamiž Rasiejaj i ZŠA zaležyć ad Biełarusi?

Minski zavod kołavych ciahačoŭ (MZKC) ź vialikaj dolaj vierahodnaści budzie zabiaśpiečany Rasijskimi vajennymi zakazami na hady, a to i na dziasiatki hadoŭ napierad.

Heta moža zdarycca jak dziakujučy padaŭžeńniu terminaŭ ekspłuatacyi stratehičnych mabilnych rakietnych kompleksaŭ («Tapola» i «Tapola -M»), što ŭžo jość na ŭzbrajeńni, tak i za košt razhortvańnia novych («Jars»). Usie jany majuć u kołavaj bazie šmatvosievyja transparciory asabliva vialikaj hruzapadymalnaści marki MZKC.

Jak zajaviŭ dniami Juryj Sałamonaŭ, hienieralny kanstruktar Maskoŭskaha instytuta ciepłatechniki (MIC), jaki raspracavaŭ u svoj čas hetyja rakietnyja kompleksy, termin słužby rakiet «Tapola-M» budzie padoŭžany jašče jak minimum na 20 hadoŭ.

Pavodle jaho słoŭ, praduhledžany prajektam harantyjny termin słužby pieršych sieryjnych mižkantynientalnych balistyčnych rakiet «Tapola-M» u bližejšyja hady zavieršycca, i Ministerstva abarony Rasii zapłanavała padaŭžeńnie terminaŭ ekspłuatacyi rakiety.

Nahadaju, što rakietnyja kompleksy «Tapola -M» pačali prymacca na ŭzbrajeńnie z 1997 hoda. Pieršapačatkova harantyjny termin ich słužby składaŭ 15 hadoŭ. Adnak dośvied vykarystańnia papiarednika «Tapoli-M» — rakietnaha kompleksu «Tapola» — dazvalaje raźličvać na bolšaje.

Pieršapačatkova ekspłuatacyja rakiety «Tapola» była raźličana na dziesiać hadoŭ. Ale, jak paviedamiŭ hienieralny kanstruktar MIC, dziakujučy admysłovym zachadam atrymałasia pavialičyć hety termin u dva ź lišnim razy. A bolš kankretna — da 24 hadoŭ. Takija dadzienyja pryvioŭ kamandujučy Rakietnymi vojskami stratehičnaha pryznačeńnia Rasii hienierał-lejtenant Siarhiej Karakajeŭ.

Kab padtrymlivałasia pastajannaja bajavaja hatoŭnaść mabilnych hruntavych rakietnych kompleksaŭ «Tapola» i «Tapola-M», vytvorca šmatvosievych śpiecyjalnych šasi dla ich — Minski zavod kołavych ciahačoŭ — usie hetyja hady ažyćciaŭlaŭ aŭtarski i harantyjny nahlad za ich ekspłuatacyjaj u vojskach, akazvaŭ dapamohu ŭ praviadzieńni roznych vidaŭ techničnaha absłuhoŭvańnia i pastaŭlaŭ zapčastki.

Pa mierkavańni rasijskich rakietčykaŭ, hetyja suchaputnyja rakietanoscy nie majuć anałahaŭ u śviecie i źjaŭlajucca dasiahnieńniem u halinie ciažkaha aŭtamabilebudavańnia. Pavodle acenak rasijan, hetyja mašyny vałodajuć unikalnym ciahava- dynamičnymi charaktarystykami, a biełaruskija śpiecyjalisty adroźnivajucca vysokim uzroŭniem adkaznaści i techničnaj padrychtoŭki.

Pryčym supracoŭnictva pamiž Rasijskimi vajennymi i biełaruskimi mašynabudaŭnikami nikoli nie pieraryvałasia, navat u pieryjady «hazavych» i «małočnych» vojnaŭ pamiž dźviuma krainami.

Na minskich kołavych šasi MZKT-79221 raźmieščany i novyja mabilnyja rakietnyja kompleksy RS-24 («Jars») z raździalalnaj hałaŭnoj častkaj (ad 3 da 6 bojehałovak). Ich razhortvańnie pačałosia ŭ Ciejkaŭskaj rakietnaj dyvizii (Rasija, Ivanaŭskaja vobłaść) u śniežni 2010 hoda.

Miarkujecca, što da kanca 2016 rakietnyja kompleksy «Tapola-M» i «Jars» buduć składać, nie mienš za 80% u bajavym składzie rasiejskich rakietnych vojskaŭ stratehičnaha pryznačeńnia.

U situacyi, kali pa miery stareńnia i źniaćcia z bajavoha dziažurstva jašče savieckich šmatzaradnych rakiet «Štylet» i «Satana» pieravaha ZŠA nad Rasiejaj u halinie stratehičnych uzbrajeńniaŭ budzie stanavicca ŭsio bolš značnaj, naroščvańnie vytvorčaści kompleksaŭ «Tapola-M» i RS-24 źjaŭlajucca dla RF praktyčna adzinym šancam chutka pierałamić hetuju niebiaśpiečnuju tendencyju.

Z-za vysokaha koštu i praciahłych terminaŭ budaŭnictva ŭzbrajeńniaŭ i infrastruktury ni šachtnyja mižkantynientalnyja balistyčnyja rakiety (MBR), ni stratehičnyja bambaviki, ni rakietnyja padvodnyja łodki nie mohuć dać Maskvie takuju mahčymaść.

Takim čynam, zabieśpiačeńnie parytetu ŭ stratehičnych jadziernych siłach pamiž Rasiejaj i ZŠA siońnia ŭ značnaj stupieni zaležyć i ad Biełarusi.

Bolš za toje, zychodziačy z tempaŭ raźvićcia vysokadakładnaj zbroi, šerah ekśpiertaŭ ličać mabilnyja rakietnyja kompleksy bolš pierśpiektyŭnymi, čym šachtavyja, z punktu hledžańnia žyvučaści.

Pačynajučy z 1961 hoda pieravažnaja bolšaść kołavych šasi dla savieckich, a potym i rasijskich mabilnych rakietnych kompleksaŭ roznaha pryznačeńnia, uklučajučy stratehičnyja, było stvorana ŭ śpiecyjalnym kanstruktarskim biuro Minskaha aŭtazavoda. U 1991 hodzie ad MAZa adłučyŭsia Minski zavod kołavych ciahačoŭ (MZKC).

Prykładna ź siaredziny 90- ch hadoŭ u Rasii aktyvizavalisia pracy pa stvareńni novych balistyčnych rakiet «Tapola -M», šmat u čym unifikavanych z papiarednimi markami. Ruchomaść, a takim čynam i vysokuju žyvučaść, hetaha rakietnaha kompleksu zabiaśpiečvaje šasi MZKT-79221, abstalavanaje dyzielnym ruchavikom JAMZ-847 mahutnaściu 800 konskich sił. Jaho maksimalnaja chutkaść roŭnaja 45 km/hadzinu. Zapas chodu składaje 500 km.

Užytyja pry stvareńnie MZKC-79221 prajektnyja rašeńni dazvalajuć jamu nieści i značna bolš ciažkija MBR, naprykład šmatzaradnyja RS-24, zaklikanuju zamianić znakamituju «Satanu».

Pieršaje šasi MZKT-79221 z kołavaj formułaj 16x16 pad mabilnuju puskavuju ŭstanoŭku było pieradadziena Minskim zavodam kołavych ciahačoŭ rasijskamu zakazčyku ŭ červieni 1995 hoda.

Pakolki transporciory MZKC-79221 raspracavany i vyrablajucca ŭ Biełarusi, to ŭ vajennym kiraŭnictvie Rasii ŭźnikali sumnievy adnosna taho, ci varta padtrymlivać razhortvańnie MBR «Tapola-M» na šasi, vypuščanym ŭ inšaj dziaržavie. Tym bolš va ŭmovach niaprostych adnosin pamiž kiraŭnictvam dźviuch krain.

Bolš za toje, viadoma pra isnavańnie płanaŭ naładžvańnia vytvorčaści Anałahičnych ciažkich transparcioraŭ na Kurhanskim zavodzie kołavych ciahačoŭ (KZKT). Adnak na siońniašni dzień hetyja płany, pa dadzienych daśviedčanych krynic, vyhladajuć dla Maskvy nierealnym. U pieršuju čarhu — z-za niedastatkovaha intelektualnaha i techničnaha patencyjału KZKT. I hetuju prablemu za hod-dva vidavočna nie vyrašyš.

Takim čynam, chutčej za ŭsio, u pierśpiektyvie rakietnaja moc Rasiei šmat u čym budzie zaležać ad jakaści pradukcyi Minskaha zavoda kołavych ciahačoŭ.

• 0
• 0
• 0
• 0
• 0
• 0
• 0
• 0