Kiraŭniki ŭradaŭ Rasii, Biełarusi i Kazachstana sustrenucca 15 krasavika ŭ Maskvie ŭ miežach padrychtoŭki dahavora ab Jeŭrazijskim ekanamičnym sajuzie (JEAES).
Baki razhledziać pałažeńni prajekta, jakija zastajucca niaŭzhodnienymi. U asnoŭnym jany zakranajuć śfieru vyklučeńniaŭ i abmiežavańniaŭ na šlachu svabodnaha pieramiaščeńnia tavaraŭ, pasłuh, kapitałaŭ i pracoŭnaj siły, što zastajucca ŭ miežach Mytnaha sajuza (MS) i Adzinaj ekanamičnaj prastory (AEP).
Aprača taho, padčas sustrečy zapłanavanyja dvuchbakovyja pieramovy rasijskaha premjer-ministra Dźmitryja Miadźviedzieva z premjer-ministram Biełarusi Michaiłam Miaśnikovičam i premjer-ministram Kazachstana Karymam Masimavym.
Nahadajem, damova ab stvareńni JEAES pavinna być hatovy da maja 2014 hoda i nabyć moc na prastory MS 1 studzienia 2015 hoda. Bazavyja pryncypy JEAES byli ŭzhodnienyja prezidentami «trojki» ŭ śniežni 2013 hoda ŭ Maskvie.
Biełaruski bok inicyjuje ŭniasieńnie ŭ prajekt dahavora ab JEAES normu ab likvidacyi vyklučeńniaŭ u pytańniach handlu naftaj i naftapraduktami. U Minsku miarkujuć, što praktyka pieraličeńnia Biełaruśsiu ŭ rasijski biudžet vyvaznych mytnych pošlin na naftu i naftapradukty pavinna być admieniena (u 2013 hodzie Biełaruś pieraličyła ŭ rasijski biudžet u vyhladzie vyvaznych pošlin na naftapradukty 3,3 młrd. dołaraŭ). 21 sakavika načalnik hałoŭnaha ŭpraŭleńnia źniešniaj ekanamičnaj palityki Minekanomiki Raman Brodaŭ zajaviŭ, što biełaruski bok ličyć pytańnie ab pieraličeńni vyvaznych pošlin na naftapradukty vyrašanym.
Razam z tym u partnioraŭ Biełarusi pa JEAES jość svaje pretenzii da vyklučeńniaŭ unutry abjadnańnia. Kazachstan vystupaje, aproč usiaho, za svabodny dostup da trubapravoda dla transparciroŭki enierharesursaŭ cieraz terytoryju JEAES. Rasija ž zajaŭlaje pra nieabchodnaść likvidacyi astatnich vyklučeńniaŭ u handli, uklučajučy svabodny dostup rasijskich tavaraŭ na rynak krain — udzielnic sajuza.
U čym pryčyna niezadavolenaści žycharoŭ mikrarajona Lebiadziny ŭ Minsku? Voś što nasamreč tam płanavali budavać6
Kamientary