Prezident kłuba Russia Unites: Nichto nie moža zabaranić rasijskim fanatam ulicca ŭ śviatočnuju kałonu ź minčanami
U Minsk na čempijanat śvietu pa chakiei, jaki adkryvajecca 9 maja, płanujuć pryjechać niekalki tysiač rasijskich fanataŭ.
«Bilety raskupleny, balelščykaŭ budzie šmat. Miarkuju, što niekalki tysiač, — paviedamiŭ BiełaPAN prezident kłuba fanataŭ Russia Unites Eduard Łatypaŭ. — Niekatoryja matčy traplajuć na vychadnyja dni, tam budzie bolš hledačoŭ. Na niekatorych — mienš».
Pavodle słoŭ Łatypava, kłub nakiravaŭ u Minharvykankam list, u jakim paviedamlajecca pra namiery rasijskich fanataŭ uziać udzieł u śviatočnych mierapryjemstvach z nahody Dnia Pieramohi ŭ Minsku ŭ dzień adkryćcia čempijanatu.
«Zaraz abmiarkoŭvajem, jak harmanična zrabić heta», — skazaŭ prezident kłuba.
Na pytańnie, ci atrymany dazvoł uładaŭ Minska na ŭdzieł rasijskich fanataŭ u śviatočnych mierapryjemstvach, jon adkazaŭ: «Nichto nie zabaraniaŭ i, samo saboj, nie moža zabaranić balelščykam ulicca ŭ kałonu ź minčanami. Kali vy pryjedziecie ŭ Maskvu i zachočacie paŭdzielničać u śviacie, vy ž nie budziecie pytacca dazvołu Kramla».
Pry hetym Łatypaŭ padkreśliŭ: razmova nie idzie ab praviadzieńni maršu ci šeścia rasijskich fanataŭ.
Sajt kłuba Russia Unites taksama paviedamlaje, što 9 maja ŭ Minskie, u kłubie «Aviertajm», pačnie pracavać Dom zaŭziatara zbornaj Rasii. Tam buduć pravodzicca šou-prahlady ŭsich matčaŭ z udziełam rasijskaj zbornaj i inšych klučavych hulniaŭ čempijanatu, sustrečy fanataŭ z chakieistami, aŭtohraf-siesii, spabornictvy pamiž chakiejnymi fanatami roznych krain. Płanujecca adkryćcio vystavy chakiejnych rarytetaŭ «60 hadoŭ našych pieramoh». Miarkujecca, što Dom balelščyka budzie pracavać jak minimum da 22 maja — dnia čverćfinałaŭ.
Varta zaznačyć, što płany rasijskich fanataŭ arhanizavana ŭdzielničać u śviatkavańni Dnia Pieramohi vyklikali aściarohi ŭ pradstaŭnikoŭ biełaruskaj apazicyi. Aktyvisty kampanii «Havary praŭdu» i Partyi BNF zaklikali Minharvykankam nie dapuścić praviadzieńnia rasijanami palityčnych akcyj u Minsku. Jany taksama nahadali pra padziei, jakija mieli miesca padčas čempijanatu Jeŭropy pa futbole letam 2012 hoda ŭ Varšavie, kali šeście rasijskich fanataŭ vyliłasia ŭ masavyja biesparadki.
Kamientary