Incydent zdaryŭsia 8 maja. Lidar «Moładzi Chryścijanska-demakratyčnaj partyi Narviehii» Emil Andre Erstad i mižnarodny daradca arhanizacyi Line Nordchaŭh prylacieli ŭ Vilnius, adkul na ciahniku adpravilisia ŭ Minsk.
Biełaruskija pamiežniki nie dali im ujechać u krainu, niahledziačy na bilety, jakija ŭ ich mielisia, na matč pamiž zbornymi Hiermanii i Kazachstana, jaki adbudziecca 10 maja.
Hramadzian Narviehii źniali ź ciahnika i pierasadzili na ciahnik nazad u Vilnius, zajavili, što jany znachodziacca ŭ śpisie asob, jakim zabaronieny ŭjezd u Biełaruś.
«Mnie ciažka ŭjavić, jakuju niebiaśpieku režym bačyć u maładych narviežskich palitykach. Ale ŭ adzin cudoŭny dzień demakratyja pieramoža. Heta viedaju i ja, i Łukašenka. Mahčyma, mienavita, tamu jon i spałochaŭsia», —
prakamientavaŭ situacyju Emil Andre Erstad, jakomu ŭžo admaŭlali va ŭjeździe ŭ Biełaruś u 2012 hodzie.
Jak paviedamlałasia raniej, 7 sakavika ŭ Biełaruś nie puścili hramadzianina Šviecyi Marcina Uhłu — kiraŭnika pravaabarončaj arhanizacyi Ostgruppen. Jon byŭ zatrymany ŭ tranzitnaj zonie nacyjanalnaha aeraporta Minsk. Uhłu taksama było zajaŭlena, što ŭjezd u Biełaruś dla jaho zabaronieny.
Arhanizacyja Ostgruppen źjaŭlajecca adnoj ź inicyjataraŭ mižnarodnaj kampanii «Nie hulajcie z dyktataram», nakiravanaj suprać praviadzieńnia ŭ Minsku chakiejnaha čempijanatu śvietu.
Kamientary