10 lipienia spaŭniajecca 20 hadoŭ, jak Alaksandr Łukašenka byŭ abrany kiraŭnikom krainy.
10 lipienia prajšoŭ druhi tur, 20 lipienia adbyłasia inaŭhuracyja.
Za hety čas vyrasła cełaje pakaleńnie biełarusaŭ — skončyli sadki i škoły, pastupili va ŭniviersitety. Daŭžej za Łukašenku kirujuć Karymaŭ va Uźbiekistanie, Nazarbajeŭ u Kazachstanie. Na zachad ad Biełarusi ŭ Jeŭropie tak doŭha adnu vybarnuju pasadu nie zajmaje nichto.
Historyja Biełarusi ŭ fatazdymkach. Hod — fota.
1994. Łukašenka prymaje prysiahu. Tyja vybary pa siońnia nazyvajuć adzinymi demakratyčnymi ŭ historyi Biełarusi. U pieršym tury Łukašenka z 45% hałasoŭ abyšoŭ lidara namienkłatury Viačasłava Kiebiča i kandydata Narodnaha Frontu Zianona Paźniaka.
1995. Łukašenka i Jelcyn padpisvajuć pahadnieńnie ab supracoŭnictvie. Mienavita intehracyja z Rasijaj była abranaja jak pryjarytet u zamiežnaj palitycy. Praz dva hady hetyja kiraŭniki padpišuć damovu ab stvareńni sajuznaj dziaržavy. Paźniej užo z padačy Pucina Biełaruś ustupić u Mytny sajuz.
1996. Łukašenka słuchaje, jak hraje na žalejcy maleńki chłopčyk. U toj hod Łukašenka razahnaŭ parłamient i pastaviŭ pad svoj kantrol usie haliny ŭłady.
1997. Łukašenka z Aleham Rumiancavym, prezidentam rasijskaha fondu kanstytucyjnych reformaŭ. Na toj momant u Biełarusi ŭžo byli źmienienyja ściah, hierb, pavialičanyja paŭnamoctvy prezidenta.
1998. Łukašenka naviedvaje Omskuju biblijateku imia Puškina. U toj čas kiraŭnik Biełarusi aktyŭna jeździŭ pa rasijskaj hłybincy. Jon spadziavaŭsia, što zojmie kresła kiraŭnika ŭ Kramli paśla niamohłaha Jelcyna.
1999. Na samicie ABSIE ŭ Stambule ŭ pierapynku Łukašenka sam padyšoŭ da amierykanskaha prezidenta Biła Klintana. Bolš razmovaŭ z amierykanskimi prezidentami Łukašenka nie mieŭ.
2000. Kučma, Pucin, Łukašenka i patryjarch Alaksij II u Biełharodskaj vobłaści. Nie adrazu paśla źjaŭleńnia Pucina Łukašenka zrazumieje, što daroha na rasijski tron jamu zakryta.
2001. Ahitacyjnaja kampanija pierad «vybarami», na jakich apazicyja pastaviła na Hančaryka.
2002. U toj hod kraina dasiahnuła siaredniaha zarobku ŭ 100 dalaraŭ. Jość mahčymaść zadumacca nie tolki pra vyžyvańnie. Na «Słavianskim bazary ŭ Viciebsku».
2003. Pieršaja hazavaja vajna z Rasijaj, muchi i katlety. «Hazpram» choča «Biełtranshaz».
2004. Refierendum ab trecim terminie.
2005. Masavyja hulańni stanoviacca nieadjemnym elemientam biełaruskaha žyćcia.
2006. Tak vyhladaŭ Łukašenka paśla prezidenckich vybaraŭ i pieršaj Płoščy. Upieršyniu za mnohija hady pratest byŭ nastolki mocny i adčajny. Łukašenka zrazumieŭ, što daloka nie ŭsie lubiać.
2007. Pieršy vizit u Vieniesuełu. Praź niejki čas Uha Čavesa Łukašenka budzie nazyvać bratam. Da rasijskich kiraŭnikoŭ jon tak nie źviartaŭsia nikoli. Ź Vieniesueły ŭ Biełaruś upieršyniu pryjdzie nafta, alternatyŭnaja rasiejskaj.
2008. Na krasavickim subotniku ŭpieršyniu źjaŭlajecca małodšy syn Łukašenki Mikałaj. Nastupnyja hady Kola budzie supravadžać Łukašenku va ŭsich pajezdkach.
2009. Libieralizacyja. Adnosiny ź Jeŭropaj palepšali, sankcyi źniatyja. Łukašenka naviedaŭ Litvu i Italiju, sustreŭsia z Papam. Niahledziačy na suśvietny kryzis, u Biełarusi adbyvajecca imklivy ekanamičny rost.
2010. Zaniepakojenaja zbližeńniem Łukašenki z Zachadam Rasija zakručvaje krany. Na samicie ADKB u Jerevanie Miadźviedzieŭ demanstratyŭna ihnaravaŭ Łukašenku. Znoŭ ciapleć biełaruska-rasijskija adnosiny stali tolki paśla brutalnaha razhonu novaj Płoščy.
2011. Abvał pierahretaha rubla. Devalvacyja i rost cenaŭ u dva-try razy. U turmach — dziasiatki palitviaźniaŭ. Łukašenka na viečarynie pamiaci chakieista Rusłana Saleja.
2012. Apazicyjnyja pratesty praz represii źviedzienyja da minumumu.
2013. Pucin i Łukašenka na vajskovych vučeńniach pad Hrodnam. Pamiž kiraŭnikami krain niama ciapła ŭ adnosinach, ale Biełaruś praciahvaje traplać va ŭsio bolšuju zaležnaść ad Rasii. Jak palityčnuju, tak i ekanamičnuju. U hety hod Łukašenka pahadžajecca padpisać pahadnieńniem ab Jeŭrazijskim sajuzie.
2014. Łukašenka ŭ Kijevie na inaŭhuracyi Piatra Parašenki. Praz hod jaho čakajuć novyja vybary.
«Muž syšoŭ ź Sipłym i Małym». Imavierna, pad Kramatorskam ukraincy adnym macham ubajdosili troch biełaruskich najomnikaŭ19
Kamientary