U suviazi z zajavaj premjer-ministra Arsienija Jacaniuka ab adstaŭcy prezident Ukrainy poźnim viečaram 24 lipienia źviarnuŭsia da śpikiera Viarchoŭnaj Rady Alaksandra Turčynava z patrabavańniem ŭžo ŭ piatnicu «vyznačycca nakont votumu davieru Kabinietu ministraŭ».
Raspad kirujučaj parłamienckaj kaalicyi nie źjaŭlajecca pravavoj padstavaj dla adstaŭki ŭrada, ličyć Parašenka, list jakoha śpikieru VR pryvodzić pres-słužba ŭkrainskaha kiraŭnika. «Jak prezident, ja pazityŭna aceńvaju antykryzisnyja namahańni ciapierašniaha Kabinieta ministraŭ. Razumieju, što pracuje jon u nadzvyčaj składanych umovach, ź jakimi nie sutykałasia jašče nivodzin urad. Raźličvaju na toje, što haračyja emocyi ścichnuć, a vierch voźmuć chałodny rozum i pačućcio adkaznaści, z pryčyny čaho ŭvieś Kabiniet ministraŭ praciahnie svaju pracu», — napisaŭ Parašenka.
Pavodle jaho słoŭ, vychad deputataŭ z kaalicyi nie pavinien paralizavać pracu parłamienta, nieabchodna nieadkładna viarnucca da pytańniaŭ źmianieńniaŭ u dziaržbiudžet i Padatkavy kodeks. «Hetyja źmieny patrebnyja nam jak dla abarony terytaryjalnaj cełasnaści i finansavańnia armii, tak i dla adnaŭleńnia vyzvalenych ad terarystaŭ terytoryj i akazańnia dapamohi mirnym žycharam paciarpiełych haradoŭ, siołaŭ i pasiołkaŭ», - padkreśliŭ prezident.
Arsień Jacaniuk syšoŭ u adstaŭku, prapracavaŭšy na pasadzie premjer-ministra mienš za piać miesiacaŭ. Pryčynaj takoha kroku jon nazvaŭ raspad kirujučaj kaalicyi, ź jakoj vyjšli frakcyi «UDAR» i «Svaboda», i niežadańnie deputataŭ padtrymlivać prapanovy ŭrada. V.a. premjer-ministra pryznačany vice-premjer - ministr rehijanalnaha raźvićcia, budaŭnictva i žyllova-kamunalnaj haspadarki Uładzimir Hrojsman.
Kamientary