Akvapark u «Drymłendzie» dla «prostych śmiarotnych» budzie adkryty tolki viasnoj

Kiraŭnictva parku admaŭlaje žurnalistam u zdymcy terytoryi — fatahrafii pryjšłosia rabić nielehalna. Kiraŭnictva parku nie daje kamientaroŭ — pryjšłosia kamunikavać z prostymi rabočymi.

Pieršy ŭ Minsku adkryty akvapark nam abiacali pabudavać da 2012 hoda. U budaŭnikoŭ paŭstali prablemy z hruntavymi vodami, i pracy zaciahnulisia na hod. U 2013 hodzie pavinna było adbycca doŭhačakanaje adkryćcio.

U zdačy abjekta ŭ 2013 hodzie było ŭpeŭniena i kiraŭnictva parku «Drymłend». «Prymajem usie zachady, kab chutčej spravicca z prablemami i adkryć akvapark. U hetym siezonie budoŭla ŭsio ž finišuje», — paviedamiŭ tady namieśnik načalnika dyrekcyi budujecca abjekta Siarhiej Bahdanovič. Nie finišavała.

I voś, praz hod, u Minsku źjaviłasia rekłama, jakaja paviedamlaje ab chutkim adkryćci akvaparku. U sietcy Instahram stali vykładvacca fatahrafii moładzi, jakaja ploskajecca ŭ vadzicy i zaharaje. Tym nie mienš, adkryćcio akvaparku znoŭ pieranieśli. U rekłamnym adździele «Drymłenda» nazvali novy termin zdačy abjekta — krasavik 2015 hoda.

Patłumačyć pryčyny dziŭnaha pieranosu «Ježiednievniku» admovilisia, pryjści na miesca z fotakamieraj nie dazvolili. Arhumientaŭ, što ŭ Instahramie ŭžo poŭna fatahrafij akvaparku, nie pačuli. Pryjšłosia dziejničać pravieranym mietadam — nielehalna.

Na miescy byli tolki rabočyja. Tym nie mienš, vada ŭ basiejnie i rukavach-ručajach zapoŭnienaja. Akvapark vyhladaje amal hatovym. «Čamu akvapark adkryjuć tolki praz hod?», — pytajusia ŭ rabočaha, jaki palić. «Ananimna», — udakładniaju, paśla niedavierlivaha pohladu ŭ svoj bok i pakazvaju žurnalisckaje paśviedčańnie. Pracoŭny kinuŭ cyharetu na ziamlu i pajšoŭ moŭčki pracavać.

Ja znachodziŭsia na terytoryi akvaparku niadoŭha — treba było chucieńka adźniać paru dziesiatkaŭ kadraŭ. Padniaŭsia na adnu z horak — i nazad. U zapasie ŭžo byli fotazdymki, zroblenyja praz aharodžu i z dachu susiedniaha budynka. Ja prachodziŭ mima ŭžo znajomaha maŭklivaha budaŭnika. «Tut drenna arhanizavana praca — akvapark hetym letam pavinien byŭ adkrycca», — skazaŭ jon cicha i adviarnuŭsia. «A jašče siudy vodziać dziaŭčat z načnych kłubaŭ, dni naradžeńnia adznačajuć — im tut taŭchanina nie patrebna», — kinuŭ jon uśled.

Pakul dla prostych śmiarotnych akvapark «nie dabudavany», chtości ŭ im harezić i nie zabyvajecca vykładvać fatahrafii ŭ volny dostup.

Pavialičyć

Pavialičyć

Pavialičyć

Pavialičyć

Pavialičyć

• 0
• 0
• 0
• 0
• 0
• 0
• 0
• 0