U Biełarusi z adabreńniem uspryniata padpisańnie 5 vieraśnia ŭ Minsku kantaktnaj hrupaj Ukraina — Rasija — ABSIE pratakoła ab spynieńni ahniu pamiž supraćborstvujučymi siłami na ŭschodzie Ukrainy, havorycca ŭ raspaŭsiudžanaj 6 vieraśnia zajavie Alaksandra Łukašenki ŭ suviazi z pačatkam mirnaha pracesu pa ŭrehulavańni ŭkrainskaha kryzisu.
«Heta doŭhačakanaja navina ŭsialaje chaj i niaśmiełuju, ale nadzieju na ŭstalavańnie poŭnaha i biezzvarotnaha miru ŭ hetym rehijonie», — adznačyŭ biełaruski kiraŭnik.
«Kanflikt u blizkaj dla nas słavianskaj dziaržavie byŭ apošnim časam samym chvalujučym, jon abmiarkoŭvaŭsia ŭ mižnarodnym paradku dnia. Bo pad pahrozu byli pastaŭleny pytańni zabieśpiačeńnia nie tolki rehijanalnaj, ale i mižnarodnaj biaśpieki. Bieź pierabolšańnia možna skazać, što vajna realna zamajačyła na parozie našaha ahulnaha jeŭrapiejskaha doma», — havorycca ŭ zajavie.
«Treba addać naležnaje inicyjatyvam i prapanovam u pieršuju čarhu prezidentaŭ Ukrainy i Rasii, — adznačyŭ Łukašenka. — Mienavita dziakujučy ich pryncypovym damoŭlenaściam na vyšejšym uzroŭni, dasiahnutym u kancy žniŭnia na minskaj ziamli, byŭ pakładzieny pačatak mirnamu pracesu».
Pavodle jaho mierkavańni, farmat znosin Mytny sajuz — Ukraina — Jeŭrapiejski sajuz dazvoliŭ pryciahnuć da pierahavornaha pracesu baki, jakija realna zacikaŭlenyja ŭ miry na ŭkrainskaj ziamli i ŭ Jeŭropie. Vielmi važnymi i svoječasovymi byli i kankretnyja prapanovy prezidenta Kazachstana pa ŭrehulavańni kanfliktu, ličyć biełaruski kiraŭnik. «Biez usiakaha sumnieńnia, biez nastojlivych namahańniaŭ lidaraŭ viadučych dziaržaŭ Jeŭrapiejskaha sajuza było b niemahčymym dasiahnieńnie pieramir`ia va ŭschodnich rajonach Ukrainy.», — padkreśliŭ Łukašenka
Jon ličyć, što «vyklučna važnuju rolu», adyhrała kantaktnaja hrupa ŭ składzie Leanida Kučmy, Michaiła Zurabava, a taksama pradstaŭnikoŭ apałčeńnia i ABSIE.
«Jana praviała sapraŭdy tytaničnuju pracu i dasiahnuła zhody pa pytańniach, vyrašeńnie jakich zdavałasia absalutna niemahčymym niekatory čas tamu, — havorycca ŭ zajavie. — Praca kantaktnaj hrupy zasłuhoŭvaje sapraŭdnaj padziaki i zaachvočvańnia».
«Heta, darečy, adzin ź niešmatlikich vypadkaŭ, kali i ABSIE adyhrała mienavita tuju rolu, dla jakoj jana i stvarałasia, i ŭniesła svoj peŭny ŭniosak u zabieśpiačeńnie rehijanalnaha miru i biaśpieki», — zaŭvažyŭ Łukašenka.
«My hanarymsia tym, što pačatak hetamu mirnamu pracesu byŭ pakładzieny ŭ Minsku, na biełaruskaj ziamli. My i nadalej budziem rabić usio mahčymaje ŭ imia miru ŭ brackaj krainie. Našy narody ŭdostal napakutavalisia ŭ vojnach minułaha stahodździa, i nie chaciełasia b, kab takija pakuty paŭtarylisia i ŭ stahodździ ciapierašnim», — havorycca ŭ zajavie.
Łukašenka adznačyŭ, što «siońnia viestka ab dasiahnieńni damoŭlenaściaŭ ab spynieńni ahniu paŭsiul usprymajecca z radaściu i nadziejaj».
«Ale my pavinny dobra razumieć, što heta tolki pieršy krok na doŭhim i ciažkim šlachu. Nieabchodna pieraadoleć jašče masu niečakanaściaŭ i pieraškod, kab praces Minskaha miru staŭ biezzvarotnym», — zajaviŭ jon.
Kiraŭnik dziaržavy «pierakanany, što pracu kantaktnaj hrupy varta pradoŭžyć, mahčyma, nadać joj bolš paŭnamoctvaŭ i padniać jaje ŭzrovień dla paśpiachovaha ŭvasableńnia ŭ žyćcio ŭsich dasiahnutych damoŭlenaściaŭ.
«Ciapier treba ŭsim uciahnutym bakam spynicca i zadumacca. Zadumacca pra budučyniu krainy i naroda. Nie razburalnaja vajna, a tolki mirnaja stvaralnaja praca zabiaśpiečyć dabrabyt dziaržavy i prostaha čałavieka», — havorycca ŭ dakumiencie.
«Uzbrojeny bratazabojčy kanflikt u rodnaj dla nas Ukrainie zastaniecca ciažkim kalectvam na ciele ŭkrainskaha naroda. Ale heta pastupova zabudziecca. U pamiaci ludziej zastanucca tyja, chto zdoleŭ paviarnuć koła vajny ŭ bok miru», — ličyć Alaksandr Łukašenka.
Ciapier čytajuć
Z YouTube vydalili kanały BiełTA, STB i ANT. Ułady pahražajuć kontrmierami44
Kamientary