Ci ŭ imperyi ŭ zubach, ci ŭ čorta na rahach
Na siońnia venesuelski vektar jość bolej pijaraŭskaj źjavaj, čym załatoj žyłaj. Ale luby drejf u procilehły ad Maskvy bok — heta pa vialikim rachunku plus. Piša ŭ svaim błohu Alaksandar Kłaskoŭski.
"Eŭrańjus" dy inšyja telekanały kruciać efektny siužet: na adkryćci sumiesnaha pradpryjemstva Čaves padnosić Łukašenku menzurku nafty. Chaj hladzić Maskva: na joj śviet klinam nie syšoŭsia!
Ale ž menzurka — jana i jość menzurka. Realny efekt hučna razreklamavanaha stratehičnaha partnerstva z Venesuełaj pakul što nie vidavočny.
I najpierš tamu, što schiemy supracy, miakka kažučy, nia nadta prazrystyja. Nu, zrazumieła, pra handal zbrojaj nichto vam nie raspaviadzie pad markaj sakretnaści. Ale ž i z toj ciažkaj naftaj u dalinie Arynoka pakul što ciomny les (to bok džunhli:) Usio na ŭzroŭni barabannaha boju.
Voś nazyvajucca tyja ci inšyja ličby mierkavanaj zdabyčy. Vice-premjer Siamaška, naš viadomy aptymist, kaža pra perspektyvu siami miljonaŭ ton za hod. Ale ž heta kali i budzie, to nia chutka. U 2008-m miarkujecca vypampavać tolki miljon. A nam treba dvaccać. Potym, venesuelski varyjant usio adno ciažka nazvać dyversyfikacyjaj. Bo tuju syravinu ŭ Navapołack vazić nia buduć. Miarkujecca, što naftavy biznes pad ehidaj siabra Uha daść dadatkovyja hrošy na zakupku nafty ŭ toj samaj Rasiei.
Miž tym zusim nia fakt, što naša kraina (mienavita kraina!) tak užo azałocicca ad prodažu nafty, zdabytaj u čorta na rahach. Bo i sama nafta ciažkaja, to bok davieści jaje da kandycyi kaštuje daražej, dyj biznes — sumiesny z venesuelcami, u jakich, darečy, 60% akcyj i, naturalna, svoj intares. Jany tam choć i sacyjalisty, ale nie takija ŭžo i altruisty.
Napaleonaŭskija plany ekspansii našych ladoŭniaŭ dy televizaraŭ cieraz akijan taksama vyklikajuć sumnievy. Analahi (i, mahčyma, lepšyja pavodle suadnosinaŭ cana/iakaść) Venesueła moža kupić pad bokam, u jakoj-niebudź Brazylii. Va ŭsiakim razie, sioleta my pradali Venesuele na 20 miljonaŭ dalaraŭ kalijnych uhnajeńniaŭ i na piać miljonaŭ — traktaroŭ dy aŭtamabilaŭ. Ličby bolej čym ścipłyja. I heta paśla dvuch hadoŭ farsavańnia dvuchbakovych stasunkaŭ!
Tak što na siońnia venesuelski vektar jość bolej pijaraŭskaj źjavaj, čym załatoj žyłaj. Zrešty, miarkujučy pa złaślivych kamentarach šerahu rasiejskich palitolahaŭ, Maskvu razdražniaje ŭžo toje, što Miensk jašče nie staić na kaleniach, a mituśliva šukaje niejkaha paratunku ci chacia b mahčymaści łaviravać.
Z hetaha hledzišča pošuki lubych varyjantaŭ asłableńnia zaležnaści ad susiedniaj enerhietyčnaj imperyi jość čyńnikam stanoŭčym. Luby drejf u procilehły ad Maskvy bok — heta pa vialikim rachunku plus. Navat kali alternatyva — u čorta na rahach :)
Kamientary