Abjomy žyllovaha budaŭnictva ŭ Minsku nieabchodna skaračać, addajučy pryjarytet kropkavaj zabudovie ŭčastkaŭ, jakija pakul nie vykarystoŭvajucca, raźvićciu fondu arendnaha žylla i haradoŭ-spadarožnikaŭ, zajaviŭ Alaksandr Łukašenka padčas naviedvańnia 24 kastryčnika rajona žyłoj zabudovy Michałova-2 u Minsku.
Naviedvańnie adnaho z novych damoŭ mikrarajona było prymierkavana da mierapryjemstvaŭ, pryśviečanych 20-hodździu Słužby biaśpieki prezidenta Biełarusi. «Mienavita ŭ hetym domie za ŭłasnyja srodki pry dziaržaŭnaj padtrymcy kvatery dla svaich siemjaŭ pabudavali supracoŭniki hetaj słužby. Alaksandr Łukašenka aznajomiŭsia z płaniroŭkaj žyłoha doma, pahutaryŭ z členami siemjaŭ supracoŭnikaŭ Słužby biaśpieki prezidenta», — paviedamlaje pres-słužba kiraŭnika dziaržavy.
«U cełym ŭ mikrarajonie Michałova-2 50% žylla, jakoje budujecca, pryznačana dla vajennasłužačych i supracoŭnikaŭ inšych siłavych struktur. Jašče 50% — dla asob, majuć patrebu ŭ palapšeńni žyllovych umoŭ i stajać na ŭliku ŭ administracyjach rajonaŭ Minska, u tym liku mnahadzietnych siemjaŭ», — havorycca ŭ paviedamleńni.
«Majo patrabavańnie ab skaračeńni jak u cełym budaŭnictva ŭ Minsku, tak i budaŭnictva žylla zastajecca niaźmiennym: abaviazkova treba skaračać», — padkreśliŭ Łukašenka. Heta nie aznačaje, što Minsk u isnujučych miežach MKAD zamre i ŭ im ničoha nie budzie budavacca, dadaŭ jon. «Tut taksama budzie budavacca, niachaj minimum, niejkaha žylla. Ale vy nie čakajcie, što zaŭtra vam daduć ziemli ź sielhasuhodździaŭ abo lasnoha fondu», — skazaŭ Łukašenka.
Jon padkreśliŭ: źnižeńnie płanaŭ pa budaŭnictvie žylla ŭ Minsku nie aznačaje, što stalica nie budzie zabiaśpiečvać prahramu pa žyllovym budaŭnictvie. Pryjarytet budzie addavacca raźvićciu haradoŭ-spadarožnikaŭ. I adnoj z najbolš pryjarytetnych terytoryj stanie Rudziensk, uličvajučy jaho zabiaśpiečanaść surjoznymi enierhietyčnymi mahutnaściami.
Užo ŭ nastupnym hodzie pavinien być zaćvierdžany płan detalovaj płaniroŭki Rudzienska, a ŭ 2016 hodzie miarkujecca pačać budaŭnictva inžynierna-transpartnaj infrastruktury dla hetaj terytoryi. Heta dazvolić u 2017 hodzie pačać budaŭnictva žyłych damoŭ. Akramia taho, u Rudziensku na sumiežnaj z žyłoj zabudovaj terytoryi praduhledžana raźvićcio vytvorčych mahutnaściej.
Dla bolš efiektyŭnaha raźvićcia adpaviednych terytoryj prapanavana pieradać Rudziensk pad kiravańnie Minska pa anałohii z tym, jak heta ciapier isnuje ŭ dačynieńni da pasiołka Sokał, raźmieščanaha za 25 kiłamietraŭ ad stalicy. Łukašenka hetuju prapanovu padtrymaŭ.
Kiraŭnik dziaržavy rasparadziŭsia pastupova navodzić u Minsku łosk, asvojvać i dobraŭparadkoŭvać tyja ŭčastki, jakija ŭ siłu ich reljefu i raźmiaščeńnia pakul zastajucca niezadziejničanymi i adnačasova nie mohuć vykarystoŭvacca dla patreb sielskaj haspadarki.
«Raźličvajcie na tyja ŭčastki, dzie niemahčyma ni arać, ni siejać, — skazaŭ Łukašenka, źviartajučysia da staršyni Minharvykankama Mikałaja Ładućki. — Treba zabudoŭvać hetyja miescy, dobraŭparadkoŭvać, stvarać parki, zony adpačynku. My nie možam ludziej zahnać u «bietonnyja miaški», dzie niama ni zieleni, ni travy».
Pry hetym kiraŭnik dziaržavy zajaviŭ ab niedapuščalnaści praźmiernaha ŭščylnieńnia zabudovy, što vyklikaje abhruntavanyja pretenzii hramadzian. «Uščylniać niekatoryja terytoryi treba, ale ni ŭ jakim vypadku nielha tam «cisnuć» ludziej, kab im było niemahčyma vyjści na vulicu», — skazaŭ jon.
Łukašenka ŭkazaŭ na važnaść kompleksnaj płaniroŭki žyłych rajonaŭ, dzie razam z žyllom pavinny być u dastatkovaj kolkaści roznyja sacyjalnyja ŭstanovy. Ale mnohija takija abjekty ŭsio jašče budujucca pa starych savieckich schiemach, naprykład dziciačyja sadki, dadaŭ jon.
«Heta doraha. Treba rabić funkcyjanalna, pryhoža, kab dzieciam było ciopła, ale nie treba razmachvacca, jak my heta robim ciapier, — heta tyčycca i materyjałaŭ, i płoščaŭ. Padumajcie ab tym, kab sacyjalnyja abjekty, jakija faktyčna budujucca za košt dziaržavy, byli aptymalnyja pa canie. Na dzieciach nie treba ekanomić, ale ŭ nas šmat praźmiernaściej», — skazaŭ kiraŭnik dziaržavy.
Pavodle słoŭ Łukašenki, pabudavaŭšy toj ci inšy sacyjalny abjekt, asabliva z dadatkovym naboram pasłuh, dziaržava nie pavinna poŭnaściu nieści na sabie raschody pa jaho ŭtrymańni. Dziaržava ŭ asobie miascovych uładaŭ biare na siabie vykanańnie peŭnych minimalnych sacyjalnych patrabavańniaŭ i standartaŭ, a dadatkovyja raboty i pasłuhi pavinny apłačvacca samim žycharami, ličyć jon.
Pavodle słoŭ kiraŭnika dziaržavy, dobra zarekamiendavała siabie praktyka zamacavańnia terytoryj za subjektami haspadarańnia, u abaviazki jakich uvachodzić ich prybirańnie, utrymańnie i biahučy ramont. Heta ŭ asnoŭnym učastki, jakija miažujuć z mahazinami i ŭstanovami, roznymi ofisnymi pamiaškańniami na pieršych pavierchach budynkaŭ.
Łukašenka zajaviŭ, što stanoŭčy vopyt pryciahnieńnia hramadzian i arhanizacyj da rabot pa dobraŭparadkavańni nieabchodna i nadalej pastupova pašyrać.
U čym pryčyna niezadavolenaści žycharoŭ mikrarajona Lebiadziny ŭ Minsku? Voś što nasamreč tam płanavali budavać6
U čym pryčyna niezadavolenaści žycharoŭ mikrarajona Lebiadziny ŭ Minsku? Voś što nasamreč tam płanavali budavać
Babaryka turemščykam: «U mianie było, ciapier niama, ale jość šaniec, što budzie. A ŭ vas nie było, niama i nie budzie. I ŭ vašych dziaciej nie budzie»99
Kamientary