U Vilni adbyvajecca kanfierencyja «Biełaruski EHU: paśla 10 hadoŭ u Litvie»
U Vilni zaviaršyŭsia pieršy dzień kanfierencyi «Biełaruski EHU: paśla 10 hadoŭ u Litvie». Jana pryśviečanaja vybaram rektara i budučyni ŭniviersiteta.
Siarod prysutnych — kandydaty ŭ rektary EHU Alaksandr Milinkievič, litoviec Daryjus Udrys, Taćciana Ščytcova. Akramia taho — vypuskniki i lektary ŭniviersiteta.
Jak adznačajuć amal usie śpikiery, prajekt biełaruskaj VNU ŭ Jeŭropie siońnia znachodzicca ŭ hłybokim kryzisie i patrabuje reformaŭ.
Prykład asnoŭnych prablemaŭ trapna abaznačyŭ były student EHU Kirył Atamančyk, aburyŭšysia vielizarnym administracyjnym štatam i strataj častkaj vykładčykaŭ razumieńnia mety ŭniviersiteta.
— My vyžyli za hetyja 10 hadoŭ, ale nie stali paśpiachovymi, — skazała kandydatka na pasadu rektara Taćciana Ščytcova, — za hety čas univiersitet amal zhubiŭ kantakty z hramadskimi i kulturnickimi arhanizacyjami ŭnutry Biełarusi, ź niezaležnymi ŚMI.
Uzhadvajučy miedyi, Taćciana Ščytcova ŭskosna abvinavaciła žurnalistaŭ u insinuacyjach dy raspaŭsiudzie čutak. Pry hetym jana padkreśliła, što pry ŭsich ciažkaściach univiersitet nie zhubiŭ identyčnaści: siońnia 95% studentaŭ EHU źjaŭlajucca biełarusami, bolšaść vykładčykaŭ — taksama.
Alaksandr Milinkievič u svaju čarhu paraŭnaŭ siabie z antykryzisnym mieniedžaram i zrabiŭ akcent na vyznačeńni paniaćcia «biełaruskaść».
Pavodle Milinkieviča, EHU pavinien stać bazaju dla jadnańnia ŭsich biełaruskich intelektuałaŭ, jakija atrymali jeŭrapiejskuju adukacyju, pradstaŭlajuć prafiesijnuju kaštoŭnaść i mahli b pracavać na Biełaruś i da taho, pakul u krainie «adbuducca palityčnyja źmieny».
— Pry hetym nielha rabić ź EHU niejkaje «biełaruskaje hieta» i padyhryvać biełaruskim uładam, stvarajučy mif «apazicyjnaj» VNU. — skazaŭ Alaksandr Milinkievič. — Pry pracaŭładkavańni ŭnutry dziaržavy na čałavieku nie pavinien stajać cetlik «apazicyjaniera».
Padčas vystupu Daryjusa Udrysa, uźnikli niazručnaści — nie ŭsie prysutnyja całkam razumieli śpikiera, jaki nie vałodaje ni biełaruskaj, ni rasijskaj movami. Pry hetym Udrys adznačyŭ, što jon šakavany sistemaj kiravańnia ŭ EHU.
— Adnyja kažuć — my vydatkoŭvajem šmat hrošaj, inšyja kažuć — my vydatkoŭvajem mała hrošaj. Nam patrebny kansiensus i razumieńnie taho, što treba rabić dalej. Ale ja hodny mieniedžar, — zapeŭniŭ aŭdytoryju Daryjus.
Što da pytańnia zachavańnia biełaruskaści ŭniviersiteta, pazicyja kandydata-litoŭca padałasia nie zusim zrazumiełaj.
Ahulny lejtmatyŭ kanfierencyi — adčuvańnie patreby ŭ reformach.
Udzielniki nie adnojčy kanstatavali toje, što EHU pakrysie pierastaje pracavać na ŭnutrybiełaruskija patreby, pieratvarajučysia ź biełaruskaha ŭniviersiteta ŭ Jeŭropie ŭ bolš kasmapalityčny prajekt. U dadatak da hetaha — słaby mieniedžmient i niaspynnyja skandały, jakija pieraśledujuć navučalnuju ŭstanovu ź minułaha hodu.
Šlachi vyrašeńnia abaznačanych prablemaŭ bačacca ŭsim kandydatam ŭ rektary pa-roznamu, ale ŭ adnym jany salidarnyja: paśla reformaŭ EHU musić pryvabić najbolš pierśpiektyŭnuju biełaruskuju moładź i stać prytułkam dla vykinutych z ajčynnych univiersitetaŭ vykładčykaŭ.
Kanfierencyja praciahniecca ŭ subotu.
Ciapier čytajuć
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja83
Kamientary