Minadukacyi: Baćki školnikaŭ nie ŭmiejuć razmaŭlać sa svaimi dziećmi i ich nastaŭnikami
Analiz zvarotaŭ u Ministerstva adukacyi pakazaŭ, što mnohija baćki ŭ Biełarusi nie ŭmiejuć razmaŭlać sa svaimi dziećmi i ich nastaŭnikami, zajaviła pres-sakratar viedamstva Julija Vanina 18 sakavika na pasiadžeńni kruhłaha stała «Pierśpiektyvy navučańnia biez adznak u siaredniaj škole».
«U pieršakłaśnika-druhakłaśnika, kali jon prychodzić damoŭ, dahetul pytajucca, što jon atrymaŭ. Jany nie pytajucca, jak jon pravioŭ dzień, jak jaho acaniła nastaŭnica, ci spadabaŭsia jaho malunak abo jak jon rašyŭ zadaču. Usie pytajucca, što jon atrymaŭ, tamu što heta praściej», — adznačyła jana.
Pavodle słoŭ Vaninaj, na sajcie Minadukacyi raźmieščanyja prykłady pytańniaŭ dla baćkoŭ, jakija jany mahli b zadać dziciaci paśla škoły, tamu što «maładyja baćki vielmi časta adychodziać ad samoj školnaj temy ŭ vychavaŭčyja i psichałahičnyja pytańni». «Baćki ŭ asnoŭnym vyraśli na acenačnaj sistemie, i im bolš prosta zadać pytańnie, ci była dvojka, čym: «Ci acenienaja tvaja praca ŭ škole?» — skazała pres-sakratar.
Adnosiny baćkoŭ z nastaŭnikami «jašče bolš składanyja», ličyć jana. «Jość internet, sacyjalnyja sietki, i značna praściej zadać pytańnie ministru, čym padyści da nastaŭnicy, — takoje taksama byvaje. Prychodziać da nas pytańni hramadzian: čamu niapravilna pastavili adznaku, kali heta treci abo čaćviorty kłas; baćki nie razumiejuć, jak vučycca ich dzicia ŭ pieršym kłasie. Čamuści praściej zadać nam pytańnie, čym dniom padyści da nastaŭnika i spytać, jak raźvivajecca dzicia», — skazała jana.
Jak adznačyŭ siamiejny psichołah, baćka čatyroch dziaciej Andrej Turaviec, baćki nieachvotna abmiarkoŭvajuć pytańni adukacyi dziaciej navat pamiž saboj na baćkoŭskich schodach. «Baćki paśpiachovych dziaciej cichieńka siadziać i radujucca, a baćki niepaśpiachovych dziaciej abo nie prychodziać, abo kažuć: «Ničoha, vyraście, budzie rabočym, ničoha strašnaha». I piedahoh zastajecca ŭ hetym sam-nasam i časta navat zvarotnaj suviazi nie maje», — skazaŭ jon.
Na dumku śpiecyjalista, intaresy siamji i škoły nieabchodna abjadnać. U pryvatnaści jon prapanavaŭ arhanizavać baćkoŭskija hrupy i pravieści mietadyčnyja sustrečy «z najbolš adekvatnymi, paśpiachovymi nastaŭnikami» roznych kłasaŭ. «Heta zojmie čas, vyklikaje palemiku, ale možna pravieści ekśpierymientalnyja kruhłyja stały, i pavodle vynikaŭ pryniać niejkuju dekłaracyju, namiery, kab heta nie vylivałasia ŭ prosty zvarot da ministra pa internecie», — skazaŭ Turaviec.
Kamientary