Uładzimir Hrozaŭ: Mitrapalit Pavieł publična paabiacaŭ mianie pasadzić
Były kiraŭnik pravasłaŭnaha vydaviectva nie pryznaje svajoj viny.
Zaviedziena kryminalnaja sprava na byłoha dyrektara vydaviectva Biełaruskaha ekzarchata Uładzimira Hrozava. Fihurant – postać asablivaja. Jon pryjšoŭ u carkvu ź siłavych struktur i 16 hadoŭ kiravaŭ vydaviectvam ekzarchata.
«Były 55-hadovy kiraŭnik, złoŭžyvajučy słužbovymi paŭnamoctvami, arhanizavaŭ kradziež hrašovych srodkaŭ u padnačalenaha vydaviectva. Jon naŭmysna addavaŭ niezakonnyja rasparadžeńni padnačalenym rabotnikam ab štomiesiačnym źniščeńni dakumientaŭ piarvičnaha ŭliku tavarna-materyjalnych kaštoŭnaściaŭ i hrašovych srodkaŭ, a taksama niezakonna zabiraŭ z kasy pradpryjemstva najaŭnyja hrašovyja srodki. Dalej hrošy fihurant vykarystaŭ dla nabyćcia za miažoj hruzavoha i lehkavoha aŭtatranspartu», — paviedamili ŭ HUUS Minharvykankama.
Razmova idzie pra 14 adzinak techniki na ahulnuju sumu bolšuju za $150 tysiač. Pa viersii śledstva, aŭtamabili afarmlalisia na Hrozava abo jaho svajakoŭ.
Paŭnamoctvy Uładzimira Hrozava ŭ vydaviectvie byli prypynieny jašče ŭ kastryčniku 2014 hoda. Mitrapalit Pavieł publična paviedamiŭ, što Sinadalnaja revizijnaja kamisija Biełaruskaha ekzarchata «pryznała dziejnaść Hrozava niezdavalniajučaj». Hrozava nie vyzvalili z padziakaj, a haniebna zvolnili.
Rasśledavańnie kryminalnaj spravy, zaviedzienaj Hienieralnaj prakuraturaj, praciahvajecca.
«Naša Niva» źviazałasia z Uładzimiram Hrozavym.
«U suviazi z tym, što ŭ mianie była zabranaja sprava, u jakuju ja ciaham 16 hadoŭ układaŭ usie svaje siły, srodki i dušu, pracujučy na karyść pravasłaŭnaj aśviety, zdaroŭje majo rezka pahoršała. Ciapier zajmajusia jaho adnaŭleńniem», — paviedamiŭ «Našaj Nivie» jon.
«NN»: Vy nie pryznajecie svajoj viny?
UH: Kateharyčna nie.
«NN»: Kamu i dla čaho treba Vas abhavorvać?
UH: Na žal, va ŭsich publičnych asob jość niadobrazyčliŭcy i zajzdrośniki.
«NN»: Milicyja nazvała sumu ŭ $150 tysiač i 14 mašyn, jakija na hetyja hrošy byli kupleny za miažoj. Adkul uźnikli takaja suma i hetaja technika?
UH: Sumy kradziažu, ahučanyja ŭ ŚMI, i źjaŭlajucca vynikam biespadstaŭnych abvinavačvańniaŭ z boku čynoŭnikaŭ Jeparchii BPC, jakija praśledujuć svaje karyślivyja mety.
«NN»: Jak daŭno viadziecca rasśledavańnie?
UH: Prykładna z kastryčnika pravodzicca pravierka pa inicyjatyvie BPC.
«NN»: Praŭda, što mitrapalit Pavieł publična paabiacaŭ Vas pasadzić?
UH: Tak. Ale ja ščyra spadziajusia, što heta nie asabistaja inicyjatyva pieršaj asoby BPC, a vynik nachabnych paklopaŭ niadobrazyčliŭcaŭ Jeparchii dy inšych asob, jakija namahajucca atrymać tatalny kantrol nad dziejnaściu pa duchoŭnaj aśviecie, jakaja realizujecca mnoj pa srodkach hramadskich arhanizacyj.
Ciapier čytajuć
Što aznačaje rasśledavańnie Mižnarodnaha kryminalnaha suda dla Łukašenki i biełarusaŭ? Tłumačyć Kaciaryna Dziajkała17
Kamientary