Hieołahi znajšli najvialikšy mietearytny kratar na Ziamli
Kratar pamieram 450 na 300 km znojdzieny ŭ centry Aŭstralii.
Aŭstralijskija navukoŭcy znajšli paćvierdžańni padzieńnia na Ziamlu 300-600 młn hadoŭ tamu hihanckaha mietearyta, raspaviadaje From Quarks to Quasars.
Kratar u rajonie Uorbiertan utvaryŭsia ad udaru ab Ziamlu mietearyta dyjamietram 20 km — u dva razy bolšym za toj, jaki, pavodle adnoj z teoryj, zabiŭ dynazaŭraŭ.
Raniej zvańnie najvialikšaha krataru Ziamli mieŭ kratar Vredefart (Vredefort Crater) u Paŭdniovaj Afrycy dyjamietram u 300 km. Niekatoryja kažuć, što jon dahetul najvialikšy. Praŭda, kratar u Aŭstralii možna razhladać jak dva susiednija kratary dyjamietram pa 200 km kožny. Miarkujecca, što mietearyt, što ich utvaryŭ, raskałoŭsia na dva niezadoŭha da ŭdaru.
Pieršyja źviestki pra mahčymaje isnavańnie krataru źjavilisia ŭ 2013 hodzie — tady analiz hleby rehijona navioŭ na dumku pra mahčymaje padzieńnie mietearytu.
U 2015 h. navukoŭcy praviali dadatkovy analiz hleby i znajšli ŭ jaje struktury ślady masiŭnaha ŭdaru. Sa śladoŭ na kamianiach byli vyviedzienyja dyjamietr krataru i jaho prykładny ŭzrost, daśledavańnie apublikavanaje ŭ časopisie ScienceDirect.
Navukoŭcy majuć teoryi ab isnavańni na Ziamli jašče bolšych krataraŭ — 500-kiłamietrovych u Kanadzie, Indyi i Antarktydzie dy 600-kiłamietrovaha na poŭnačy Aŭstralii. Ale nadziejnych dokazaŭ ich isnavańnia niama.
Adnosna krataru ŭ Aŭstralii taksama jość sumnievy. Navukoŭcy pakul nie bačać vyraznaha ŭpłyvu ŭdaru mietearyta na raźvićcio žyćcia na Ziamli (taki ŭdar musiŭ by vyklikać masavaje vymirańnie).
Nastupnyja raskopki i daciroŭki mohuć źviazać kratar z adnym z masavych vymirańniaŭ, što adbylisia 300-600 młn hadoŭ tamu (naprykład, Devonskim 374 młn hadoŭ tamu albo Ardavikska-siłuryskim 450 młn hadoŭ tamu).
Ciapier čytajuć
Što aznačaje rasśledavańnie Mižnarodnaha kryminalnaha suda dla Łukašenki i biełarusaŭ? Tłumačyć Kaciaryna Dziajkała17
Kamientary