Pakul bolšaść biełaruskich biźniesmienaŭ hublajuć u kryzis dachody i kampanii adzin z samych niepubličnych miljanieraŭ Alaksiej Aleksin pryrastaje i aktyvami, i prybytkami. Čysty prybytak tolki adnaho jaho łatvijskaha biźniesu za hod vyras u 25 razoŭ.
Adna z hałoŭnych pryčyn stabilnaści jaho biźniesu, zaznačajuć ekśpierty, dyviersifikacyja halin i rynkaŭ. Tym bolš, što ŭ liku pryjarytetnych halin, dzie pracuje Alaksiej Aleksin, značycca «nafta», a siarod važnych rynkaŭ — adnosna ščaślivaja ŭ hety niaprosty pieryjad Bałtyja.
Raźmieščanaja ŭ łatvijskim Daŭhaŭpiłsie kampanija Mamas D, ŭłaśnikami jakoj pa dakumientach źjaŭlajucca jaho žonka i syn Ina i Dźmitryj Aleksiny, a taksama miascovy biznesoviec Alaksandr Hrachoŭski, niadaŭna apublikavała spravazdaču za 2014. Pa im prablemny dla bolšaści biełaruskich pradprymalnikaŭ hod apynuŭsia dla Aleksinych vielmi paśpiachovym.
Kali ŭ 2013 hodzie abarot Mamas D ŭpaŭ u paraŭnańni z 2012 hodam na 58,2% (41,6 młn jeŭra), to ŭ 2014 hodzie byŭ zafiksavany rost na 38,93% (57,9 młn jeŭra). Pry hetym, čysty prybytak vyras u 25 razoŭ - z 65 tys. jeŭra ŭ 2013 hodzie da amal 1, 617 młn. jeŭra ŭ 2014 hodzie.
Miarkujučy pa spravazdačy, Mamas D dyviersifikavała biźnies, akramia vytvorčaści bijapaliva zaniaŭšysia mižnarodnymi pieravozkami hruzaŭ i dystrybucyjaj ałkaholu, piva i biezałkaholnych napojaŭ, a taksama pastaŭkami miasa. Mamas D stała inviestaram u inšy prajekt Aleksinych u Daŭhaŭpiłsie — pivavarny zavod Latgales Alus. Dla adnaŭleńnia vytvorčaści na im (faktyčna - budaŭnictva novaj vytvorčaści) byli pryciahnutyja resursy Jeŭrapiejskaha sielskahaspadarčaha fondu.
Da 2012 hoda saŭładalnikam Mamas D ź biełaruskaha boku była kampanija Neonafta, jakaja ŭvachodziła ŭ hrupu kampanij «Trajpł» Juryja Čyža. U tym hodzie biźniesmieny padzialili aktyvy. Kali dla Aleksina hety momant staŭ tramplinam dla rostu jaho biźniesu, to ŭ dačynieńni da biźniesu Čyža ŭsio čaściej davodzicca čuć ab prablemach. Pra ich, u tym liku, kazaŭ na adnoj z narad sam Alaksandr Łukašenka.
Spravy Aleksina, naadvarot, iduć u haru. Za jakija prajšli dva hoda jon vyvieŭ na rynki Bałtyi, Biełarusi i Rasii piva «Dynaburh» i «Łathale»,
vykupiŭ bolšuju častku terytoryi stankabudaŭničaha zavoda imia Kirava, inviestavaŭ u najbujniejšy ŭ krainie kompleks pa vytvorčaści biekonu śvininy «Danprod», vykupiŭ u taho ž Čyža miasakambinat u Maładziečnie i pryvatyzavaŭ «Lehaŭtatrans». Apošnija z bujnych pakupak biznesmena — restaran «Staroje rečyšča» i «MTBank».
Adździaliŭšysia ad Čyža, Aleksin znajšoŭ inšych partnioraŭ. Biznes jaho siońniašnich paplečnikaŭ, jak i ŭ jaho samoha, znachodzicca na ŭzdymie, a hety puł, pavodle acenak ekśpiertaŭ, źjaŭlajecca samaj ŭpłyvovaj biźnies-hrupaj u Biełarusi.
U jaho akramia Aleksina ŭklučajuć sienatara Alaksandra Šakucina, jaho daŭniaha navapołackaha siabra i partniora Mikałaja Varabja i jašče adnaho sienatara i miedyka pa adukacyi haradzienca Andreja Paŭłoŭskaha.
Ciapier čytajuć
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi8
Kamientary