U Rasii pačalisia bujnyja vajskovyja vučeńni z vykarystańniem 250 samalotaŭ i viertalotaŭ i 700 adzinak roznaj bajavoj techniki.
Jak paviedamiła rasijskaje ministerstva abarony, u vučeńniach, jakija praciahnucca čatyry dni, udzielničajuć 12 tysiač vajskoŭcaŭ.
Minabarony Rasii nazyvaje manieŭry raptoŭnaj pravierkaj bajavoj hatoŭnaści hrupoŭki avijacyi i vojskaŭ supraćpavietranaj abarony Centralnaj vajennaj akruhi.
Vajskovyja častki byli pryviedzieny ŭ poŭnuju bajavuju hatoŭnaść.
Samaloty dalokaj avijacyi naniasuć ŭdary kryłatymi rakietami pa naziemnych metach ŭmoŭnaha praciŭnika na zapalarnym palihonie «Piemba» u respublicy Komi.
Akramia taho, u chodzie vučeńniaŭ buduć zadziejničany taksama avijacyjnyja i mižvidavych palihony «Ašułuk» i «Kapuścin jar».
«Tanki vizy nie patrebnyja»
Zhodna z upraŭleńniem pres-słužby i infarmacyi ministerstva abarony Rasii, pravierka bojehatoŭnaści pačałasia «pa rašeńni viarchoŭnaha hałoŭnakamandujučaha RF Uładzimira Pucina».
Pa słovach ministra abarony Rasii Siarhieja Šajhu, ciapierašnija manieŭry źjaŭlajucca padrychtoŭčym etapam da zapłanavanych na vierasień stratehičnych kamandna-štabnych vučeńniaŭ «Centr-2015».
Jak adznačajuć ekśpierty, vučeńni ŭ Rasii pačalisia ŭ toj ža dzień, što i arktyčnyja manieŭry Arctic Challenge, jakija pravodzić NATO razam ź Finlandyjaj i Šviecyjaj.
Dziejańni Rasii va Ukrainie, a taksama rehularnaje źjaŭleńnie rasijskich samalotaŭ la miežaŭ šerahu jeŭrapiejskich krain pryviali da rostu napružanaści ŭ adnosinach Maskvy z Zachadam.
Na dniach, adkazvajučy na pytańnie ab uzrosłaj vajennaj aktyŭnaści Rasii, vice-premjer Dźmitryj Rahozin u intervju telekanału «Rasija 1» pažartavaŭ, što «tankam vizy nie patrebnyja».
Kamientary