Pra toje, što błohier Alaksandr Łapšyn byŭ znoŭ zatrymany ŭ Armienii na zapyt biełaruskich uładaŭ, jon sam raskazaŭ u razmovie sa «Radyjo Svaboda» ŭdzień 19 sakavika. Heta adbyłosia 19 sakavika ŭ jerevanskim aeraporcie, adkul Łapšyn nakiroŭvaŭsia ŭ Strasburh.
«Ja vylataŭ ź Jerevana i mianie znoŭ zatrymali na zapyt Biełarusi, užo šosty raz, — raskazaŭ Łapšyn u razmovie z «Radyjo Svaboda». — Biełaruś abnaviła abvinavačańnie. Tamu što pa raniejšym Hienprakuratura Armienii vyniesła rašeńnie źniać vyšuk. Što zrabiła Biełaruś? Jany dasłali novy vyšuk. Pa absalutna tym ža samych abvinavačańniach — abraza Łukašenki, zakliki da niečaha. Standartny nabor. I mianie znoŭ zatrymali. Na hety raz było vielmi pa-chamsku z boku Słužby nacyjanalnaj biaśpieki Armienii».
Pa słovach Łapšyna, padčas zatrymańnia jon paśpieŭ vyklikać palicyju, jakaja pryjechała ŭ aeraport praz try hadziny. Paśla hetaha błohiera vyzvalili, adnak na svoj rejs jon spaźniŭsia.
«Mianie vyzvaliła palicyja, palicejskija patłumačyli, što vyšuk u dačynieńni da mianie źniaty, — raskazvaje Alaksandr Łapšyn. — Ale samalot vylecieŭ bieź mianie. Ja lacieŭ u Strasburh pa pravavych pytańniach. Zaraz znoŭ u Jerevanie, budu nabyvać novyja darahija kvitki. I padavać isk suprać pamiežnaj słužby Armienii. Budu patrabavać ad ich kampiensacyi».
Papiaredniaje zatrymańnie Łapšyna adbyłosia viasnoj minułaha hoda. 2 maja 2025 u aeraporcie stalicy Armienii Jerevana miascovyja pamiežniki paviedamili hramadzianinu Izraila, błohieru Alaksandru Łapšynu, što jon zatrymany na prośbu ŭładaŭ Biełarusi i musić pajechać u pastarunak palicyi.
«Prylacieŭ — i mianie znoŭ zatrymali, pravioŭ u aeraporcie dźvie hadziny, — raskazvaŭ tady Łapšyn u razmovie z «Radyjo Svaboda». — Skazali, znoŭ na zapyt Biełarusi. Jany jak robiać — krychu mianiajuć abvinavačańnie. Dadajuć niejki artykuł, ja navat nie viedaju jaki. Minułym razam było siem artykułaŭ Kryminalnaha kodeksa Biełarusi, ciapier stała vosiem. I heta, atrymlivajecca, užo inšy zapyt. Dźvie hadziny prasiadzieŭ, paśla vyzvalili. Ale heta jurydyčny teraryzm, mienavita hetym zajmajucca ŭłady Biełarusi».
Prablemy va ŭzajemaadnosinach z aficyjnym Minskam pačalisia ŭ Alaksandra ŭ 2016 hodzie, kali jaho zatrymali ŭ Biełarusi. Pryčynaj stała kryminalnaja sprava, zaviedzienaja na Łapšyna ŭ Azierbajdžanie za naviedvańnie terytoryi Nahornaha Karabacha, jakuju na toj momant Baku nie kantralavaŭ. I choć vyzvalić Łapšyna prasili i ŭ Maskvie, i ŭ Izraili, Minsk pieradaŭ błohiera ŭ Azierbajdžan. Tam Łapšyna asudzili na try hady, a ŭ vieraśni 2017 błohiera asabista pamiłavaŭ Ilcham Alijeŭ, dazvoliŭšy vyjechać u Izrail.
Paśla vyzvaleńnia Alaksandr Łapšyn padaŭ na dziejańni ŭładaŭ Biełarusi skarhu ŭ AAN, dzie parušeńnie jaho pravoŭ pryznali, a pra dziejańni biełaruskich uładaŭ i Alaksandra Łukašenki asabista jon pisaŭ i havaryŭ usio, što dumaje. Vyliłasia heta ŭ novyja prablemy. Pieršy raz na zapyt uładaŭ Biełarusi ŭ Armienii Łapšyna zatrymali ŭ vieraśni 2024 hoda. Tady jamu paviedamili, što Minsk jaho abvinavačvaje pavodle siami artykułaŭ Kryminalnaha kodeksa, i adpuścili praz čatyry hadziny. Hienieralnaja prakuratura Armienii aficyjna admoviła Biełarusi ŭ vydačy Łapšyna.
Paśla taho vypadku Alaksandr Łapšyn byŭ u Armienii jašče niekalki razoŭ, pryjazdžaŭ i vyjazdžaŭ biez prablem. Da maja 2025-ha, kali paśla čarhovaha zatrymańnia ŭ aeraporcie Alaksandr vyrašyŭ vyklučyć svajo imia z «biełaruskaha złačynnaha śpisa», padaŭšy pazoŭ u armianski sud. U lutym 2026 hoda armianski sud pryznaŭ, što abvinavačańni Biełarusi ŭ adras Alaksandra Łapšyna supiarečać armianskim jurydyčnym normam, ale spynić zatrymańni błohiera padčas vizitaŭ u Armieniju niemahčyma. A sam Łapšyn moža heta zrabić, kali źvierniecca z pretenzijami napramuju da ŭładaŭ Biełarusi.
Palaki kuplajuć damy ŭ Biełarusi — cikaviacca, ci chopić na žyćcio jeŭrapiejskaj piensii, i radujucca śmiešnym vydatkam9
Kamientary