Skandalny biełarus abviaściŭ u ZŠA novuju akcyju

28–hadovy biełaruski emihrant u ZŠA, videamastak Piotra Biardoŭski adznačyŭ hadavinu svajoj skandalnaj słavy. Hod tamu jon i jahony siabar byli abvinavačanyja ŭ złosnym parušeńni hramadzkaha paradku ŭ Bostanie.

Ich reklamnaja kampanija pavodle zamovy markietynhavaj firmy Turner Broadcasting – śvietavyja tabło ź hierojami papularnych multykaŭ – vyklikała sapraŭdny verchał u Bostanie. Palicyjanty vyrašyli, što ŭ horadzie rychtujecca terakt. U vyniku byŭ paralizavany transpartny ruch, evakujavanyja ludzi. Naniesieny horadu ŭron skłaŭ zvyš paŭmiljona dalaraŭ. Verdykt sudu akazaŭsia na dziva miakkim – karotkaterminovyja papraŭčyja pracy ŭ adnym ź miascovych špitaloŭ. Adrazu paśla niadaŭnich śviatkavańniaŭ Piotra Biardoŭski abviaściŭ pra čarhovuju, nia mienš udarnuju akcyju: “Dapamožam majoj mamie!”

Pavodle Biardoŭskaha, jon nia bačyŭ svaju mamu ŭžo 11 hod. 58– hadovaja žančyna pa– raniejšamu žyvie niepadalok Horadni. I, nibyta, vielmi pakutuje ad žyćcia ŭ Biełarusi. Letaś Piotra źbiraŭsia sustrecca ź joj ŭ Biełastoku. Adnak jaho avijapadarožža ŭ Polšču było spynienaje na paŭdarozie – u švejcarskim aeraporcie. Biardoŭski nia viedaŭ, što, jak emihrant, jon musiŭ mieć adpaviednuju vizu. Pavodle Biardoŭskaha, jon panios vialikija finansavyja straty, a tamu vymušany pradać častku darahoha, nabytaha ŭ kredyt, abstalavańnia z ułasnaj studyi. Na pytańnie žurnalistaŭ, što budzie dalej sa studyjaj, Biardoŭski adkazvaje:

“ Dobraje hetaje pytańnie – pra studyju.Ja adčuvaju, što ŭ mianie budzie ŭsio dobra. Ale ž majoj maci – kiepska. Nad jaje žyćciom u Biełarusi – pahroza. Moj brat i ja chočam dapamahčy joj pierajechać u susiedniuju Polšču. Tamu ja chaču abviaścić pra zbor srodkaŭ i stvareńnie fundacyi. Heta vielmi patrebna.”

Jak zajaviŭ Piotra Biardoŭski, jon budzie rady lubym achviaravańniam – hrošam na kvitok i na arendnuju płatu žylla ŭ samyja pieršyja miesiacy, achviaravańniam u vyhladzie mebli, charčavańnia.

Biardoŭski padličyŭ, što dziela ažyćciaŭleńnia planu pa vyratavańni mamy, jamu patrebna pryblizna 500 tysiačaŭ dalaraŭ.

Pieršaja akcyja zboru srodkaŭ admysłova pryznačanaja na 8–ie sakavika – mižnarodny žanočy dzień. Jana adbudziecca ŭ adnoj z najbolš stylnych halerejaŭ Bostanu.

Tyja, chto viedajuć biełaruskaha mastaka, nie sumniajucca ŭ pośpiechu jaho novaj spravy. Jak pišuć žurnalisty, Biardoŭskamu “šancuje pa žyćci”. Trapiŭšy ŭ 16 hadoŭ u ZŠA u ramkach vučnioŭskich abmienaŭ, jon, tady jašče padletak, zdoleŭ znajści dobraha advakata. Z dapamohaj hetaha čałavieka atrymaŭ palityčny prytułak, pražyŭ u jahonaj siamji ŭ Arlinhtonie kala 9 hod. Tut ža skončyŭ škołu, a potym mastacki kaledž.

Adnak, samaje hałoŭnaje – zaniaŭ svaju nišu ŭ halinie ličbavaha videamastactva. Raboty mastaka vystaŭlalisia ŭ aŭstryjskaj ambasadzie ŭ Vašynhtonie, a taksama ŭ Čykaha, na Alascy, u mastackim muzei ŭ Kalifornii. Za letašniuju reklamnuju kampaniju pa ŭstanoŭcy ŭ Bostanie śvietłavoha tabło z hierojami papularnych multykaŭ niekatoryja časopisy pryznali Biardoŭskaha samym skandalnym mastakom hodu.

Hladzi jašče:
Biełarus pastaviŭ na vušy Bostan

• 0
• 0
• 0
• 0
• 0
• 0
• 0
• 0