«Sprava finansistaŭ» ab admyvańni i kradziažy hrošaj viarnułasia ŭ sud

U sud Centralnaha rajona na novy razhlad viarnułasia tak zvanaja «Sprava finansistaŭ».

Hałoŭny abvinavačany — były staršynia praŭleńnia i akcyjanier (10% akcyj) Technabanka Uładzisłaŭ Kacarenka.

Pavialičyć

Razam ź im na łavie padsudnych jašče šeść čałaviek. Bankir i jašče dvoje abvinavačanych znachodziacca pad vartaj.

31 studzienia 2014 hoda Uładzisłaŭ Kacarenka byŭ pryznany vinavatym u ździajśnieńni złačynstvaŭ, praduhledžanych č.2 i č.3 art. 233 (Niezakonnaja pradprymalnickaja dziejnaść, spałučanaja z atrymańniem dachodu ŭ asabliva bujnym pamiery i niezakonnaja pradprymalnickaja dziejnaść, jakaja ažyćciaŭlajecca arhanizavanaj hrupaj), art. 243 (Uchileńnie ad vypłaty sum padatkaŭ, zboraŭ) i č.1 st.380 KK Biełarusi (padrobka, vyrab, vykarystańnie albo zbyt padroblenych dakumientaŭ, štampaŭ, piačatak, błankaŭ). Sudździa całkam zadavoliŭ patrabavańni dziaržabvinavaŭcy i prysudziŭ abvinavačanaha da siami hadoŭ pazbaŭleńnia voli z kanfiskacyjaj majomaści.

Śledčyja paličyli, što Uładzisłaŭ Kacarenka stvaryŭ i ŭznačaliŭ złačynnuju hrupu. Jana zajmałasia niezakonnymi valutna-abmiennymi apieracyjami, sadziejničańniem biznesu ŭ «admyvańni» hrošaj i ŭchileńniem ad padatkaŭ.

U hetyja schiemy byli ŭciahnutyja firmy ź Biełarusi, Rasii, Łatvii, Ukrainy i Vialikabrytanii. Z dapamohaj machinacyj kamiercyjnyja struktury atrymlivali mahčymaść vyvadu hrašovych sum ź bieznajaŭnaha abarotu ŭ najaŭny i naadvarot, praviadzieńnia fiktyŭnych ździełak pa fiktyŭnych dakumientach i inšaje.

Pavodle padlikaŭ śledstva, złamyśniki atrymali dachod ad svajoj dziejnaści ŭ pamiery 427 młrd rubloŭ, a suma niavypłačanych padatkaŭ skłała 3,7 młrd rubloŭ, paviedamlali ahienctvy navinaŭ. Nahadajem, što hetyja hrošy byli atrymany da sakavika 2012 hoda, kali bankir byŭ zatrymany.

Uładzimir Siačko, były padnačaleny Uładzisłava Kacarenki, jaki zajmaŭ pasadu namieśnika načalnika ŭpraŭleńnia pa ažyćciaŭleńni valutna-abmiennych i kasavych apieracyj Technabanka, kraŭ jašče i ŭ samoha banka. Jamu inkryminavali złačynstva č.4 art.209 (machlarstva, ździejśnienaje arhanizavanaj hrupaj albo ŭ asabliva bujnym pamiery), č.4 art.210 (kradziež šlacham złoŭžyvańnia słužbovymi paŭnamoctvami, ździejśnieny arhanizavanaj hrupaj albo ŭ asabliva bujnym pamiery). Pavodle dadzienych śledstva, jon, majučy dostup da schovišča banka i źjaŭlajučysia adkaznym za zachavanaść ŭ im kaštoŭnaściaŭ, ździejśniŭ kradziež 69,6 młn rubloŭ, 851 tys. rasijskich rubloŭ, 388,9 tys. dalaraŭ i 51,2 tys. jeŭra.

Na momant sudovaha raźbiralnictva ŭ pieršaj instancyi, ahulnaja suma nakradzienaha składała amal 500 tys. dalaraŭ.

Jašče čatyry biznesmieny byli abvinavačanyja va ŭchileńni ad vypłaty padatkaŭ u asabliva bujnym pamiery.

Pa vynikach razhladu spravy ŭ sudzie pieršaj instancyi ŭsie abvinavačanyja byli pryznanyja vinavatymi.

Ale kali bankiry atrymali realnyja terminy, to biznesmieny, jakija ŭdzielničajuć u cieniavych schiemach, abyšlisia pakarańniem biez nakiravańnia ŭ miescy pazbaŭleńnia voli.

Heta było abumoŭlena ich raskajańniem i aktyŭnym supracoŭnictvam sa śledstvam. Niahledziačy na hetyja abstaviny, prakuratura paličyła prysud u dačynieńni da ich zanadta miakkim i apratestavała rašeńnie ŭ Viarchoŭnym sudzie. Tam da dovadaŭ nahladnaha orhana prysłuchalisia i adpravili spravu na novy razhlad u sud Centralnaha rajona.

***

Da Technabanka Uładzisłaŭ Kacarenka byŭ adnym z akcyjanieraŭ Biełaruskaha industryjalnaha banka. Paźniej banki abjadnalisia, i jon zaniaŭ pasadu staršyni naziralnaha savieta novaj struktury.

Akramia taho, na momant zatrymańnia jon źjaŭlaŭsia namieśnikam staršyni Libieralna-demakratyčnaj partyi Siarhieja Hajdukieviča, pastajannaha kandydata ŭ prezidenty Biełarusi.

• 0
• 0
• 0
• 0
• 0
• 0
• 0
• 0