«Sprava hraficistaŭ»: dvum zatrymanym vystaŭlena abvinavačvańnie
Siońnia Maksimu Piakarskamu i Vadzimu Žaromskamu pradjavili abvinavačvańni pa č. 2 art. 339 Kryminalnaha kodeksu – «Chulihanstva, ździejśnienaje hrupaj asobaŭ» za naniasieńnie biełaruskamoŭnych hrafici i zapeckvańnie bihbordu.
Ci pradjaŭlenyja abvinavačvańni Viačasłavu Kasinieravu, jaki znachodzicca ŭ špitali, nieviadoma. Jarasłaŭ Uljanienkaŭ zastajecca ŭ statusie padazravanaha.
Try pastanovy ab zaviadzieńni kryminalnych spravaŭ byli abjadnannyja ŭ adno spravavodstva. Pry hetym adna sa spravaŭ, zaviedzienaja pa fakcie zapeckvańnia farbaj bihborda z vyjavami supracoŭnikaŭ MUS i spačatku kvalifikavanaja pa art. 341 KK «Apahańvańnie zbudavańniaŭ i psavańnie majomaści», była pierakvalifikavanaja taksama pa č.2 art. 339 KK.
Ciapier chłopcam pahražaje abmiežavańnie voli na termin da troch hadoŭ, albo pazbaŭleńnie voli na termin ad adnaho da šaści hadoŭ.
Ci budzie źmieniena miera strymańnia ŭ dačynieńni da V. Žaromskaha i M. Piakarskaha na čas śledstva stanie viadoma paźniej.
Jak raniej adznačaŭ juryst Pavieł Sapiełka, naniasieńnie malunkaŭ na ścieny nielha ŭ dadzienym vypadku rasceńvać jak chulihanstva, bo hetyja dziejańni nie nosiać faktaŭ hrubaha parušeńnia hramadskaha paradku, z vyrazam jaŭnaj niepavahi da hramadstva.
«Mahu śmieła śćviardžać, što pakazanyja nadpisy z vyjavami nie parušajuć hruba hramadski paradak i nie vykazvajuć vidavočnaj niepavahi da hramadstva: u ich niama abraźlivaha źmiestu, tabuiravanych vyrazaŭ i aznačeńniaŭ. Matyŭ naniasieńnia padobnych nadpisaŭ pry nazvanych abstavinach nie moža być chulihanski, takija dziejańni źjaŭlajucca sposabam vykazvańnia mierkavańniaŭ».
11 žniŭnia piaciora chłopcaŭ byli žorstka zatrymanyja pa padazreńni va ŭdziele pa troch kryminalnych spravach: naniasieńniu biełaruska-moŭnych hrafici «Biełaruś maje być biełaruskaj» i «Revalucyja śviadomaści, jana ŭžo idzie…», a taksama zapeckvańniu farbaj sacyjalnaha bihborda z vyjavami supracoŭnikaŭ milicyi.
Praabaroncy ŭžo vystupili z zajavaj nakont situacyi, jakaja skłałasia, i patrabuje nieadkładnaha vyzvaleńnia z-pad varty Viačasłava Kasinierava, Maksima Piakarskaha i Vadzima Žaromskaha.
Kamientary