Rasijskija ŚMI: Avijabaza ŭ Babrujsku pačnie funkcyjanavać užo sa studzienia 2016 hoda
Pradstaŭniki Minabarony i MZS Rasii razam sa svaimi kalehami ź Minska pačali padrychtoŭku teksta pahadnieńnia ab rasijskaj avijacyjnaj bazie ŭ Biełarusi, padpisańnie dakumienta namiačajecca na čarhovaj sumiesnaj kalehii abaronnych viedamstvaŭ dźviuch krain, jakaja projdzie ŭžo ŭ bližejšyja tydni, piša «Niezavisimaja hazieta».
Pryčym avijabaza, pa infarmacyi vydańnia, pačnie funkcyjanavać užo sa studzienia 2016 hoda. Hetak chutkaje razhortvańnie rasijskaj avijabazy ŭ Biełarusi, krynicy haziety, razhladajuć jak mieru ŭ adkaz na mahčymaje raźmiaščeńnie Pientahonam ŭ Jeŭropie novych jadziernych uzbrajeńniaŭ.
Pa dadzienych surazmoŭcaŭ «NH», jak miarkujecca, u skład bazy akramia źniščalnaha pałka Su-27 ŭvojdzie navučalnaje źviano Su-27, a taksama eskadrylla vajenna-transpartnych viertalotaŭ Mi-8. Samu bazu buduć prykryvać zienitnyja rakietnyja kompleksy S-300U sa składu 147-j zienitnaj rakietnaj bryhady VPS i vojskaŭ SPA Uzbrojenych sił Biełarusi.
«Kolki budzie kaštavać Rasii arenda avijabazy ŭ Babrujsku, pakul nie viadoma. Ale heta nie źjaŭlajecca metaj pieramovaŭ, adznačajuć krynicy», — piša hazieta.
Jak raniej paviedamlałasia, prezident Rasii Uładzimir Pucin 19 vieraśnia rasparadziŭsia padpisać pahadnieńnie ab stvareńni rasijskaj avijabazy ŭ Biełarusi. Adpaviedny dakumient apublikavany na aficyjnym internet-partale pravavoj infarmacyi.
Pahadnieńnie ŭstanaŭlivaje paradak prymianieńnia avijabazy sumiesna z Uzbrojenymi siłami Biełarusi dla abarony dźviuch krain, uklučajučy «supraćdziejańnie ŭzbrojenaha napadu z boku mižnarodnych terarystyčnych farmiravańniaŭ». U pahadnieńni prapisany paradak raźmiaščeńnia, vykarystańnia i funkcyjanavańnia rasijskaj avijacyjnaj bazy na terytoryi Biełarusi, a taksama ŭzajemadziejańnie rasijskaha kantynhientu bazy z Uzbrojenymi siłami Biełarusi. Miesca dysłakacyi bazy nie paznačana.
Pahadnieńnie budzie dziejničać na praciahu 15 hadoŭ i aŭtamatyčna praciahvajecca na nastupnyja 5-hadovyja pieryjady — pry ŭmovie zhody rasijskaha i biełaruskaha bakoŭ.
Nahadajem, u červieni 2015 ministr abarony Biełarusi Andrej Raŭkoŭ zajaviŭ, što pytańnie ab raźmiaščeńni rasijskaj avijabazy — palityčnaje. «Pytańnie pra čas i miesca stvareńnia rasijskaj avijabazy na terytoryi Biełarusi ŭ ciapierašni čas znachodzicca ŭ palityčnaj płoskaści jaho rašeńnia», — adznačyŭ kiraŭnik biełaruskaha vajennaha viedamstva.
Ab mahčymym raźmiaščeńni avijabazy RF ŭ 2016 hodzie pad Babrujskam zajaviŭ u kastryčniku minułaha hoda hałoŭnakamandujučy VPS RF hienierał-pałkoŭnik Viktar Bondaraŭ.
Ciapier čytajuć
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie6
Kamientary