Na ŭčastku, dzie nazirała amierykanskaje pasolstva, u Łukašenki 69%, a suprać usich 21%
A na daterminovaje hałasavańnie pryjšło bolš ludziej, čym u asnoŭny dzień.
Na 25-y ŭčastak Centralnaha rajona Minska pa adrasie Mašerava, 25 ja pryjšła za paŭhadziny da zakryćcia ŭčastka. Prosta pierad zakryćciom padyšli i naziralniki ad amierykanskaha pasolstva i SND.
Skrynki tut prazrystyja, hrała viasiołaja muzyka, bufiet choć i zhortvaŭsia, ale ŭsio hetak ža ščodra razdavaŭ biaspłatny čaj i kavu. Roŭna ŭ 20.00 dźviery začynili, muzyku vyklučyli.
Staršynia kamisii abviaściŭ paradak: buduć ličyć i razrazać niavykarystanyja biuleteni, potym ich apłambujuć. Dalej zapakujuć śpisy vybarščykaŭ. Potym buduć ličyć hałasy sa skryniaŭ — spačatku daterminovaje hałasavańnie, potym sa skryni dla hałasavańnia na domie, potym z tych, u jakija kidali biuleteni 11 kastryčnika.
Za tym, jak pracuje kamisija nazirać prychodzicca z adlehłaści mietraŭ 5-7. Ale tavaryski staršynia padychodzić i pakazvaje naziralnikam, jak dobra zapiačatana skrynia daterminovaha hałasavańnia. Darečy, źmieściva skryniaŭ vyrašyli dla prazrystaści pracesu vykidvać na padłohu. A dalej papiery ŭzdymali z padłohi siabry kamisii i ličyli-raskładvali pa stosach ŭ siabie na stałach.
— Paśla padliku hałasoŭ na papiarednim hałasavańni hałasy raźmierkavalisia nastupnym čynam: usiaho prahałasavała 524 čałavieki. Ź ich za Hajdukieviča — 5, Karatkievič — 12, Łukašenka — 414, Ułachovič — 10, suprać usich 83, — patłumačyŭ staršynia kamisii.
Dajšło sprava da maleńkaj skryni z hałasami tych, chto rabiŭ vybar doma.
— Nastupny etap — vyjavić skryniu dla vyjaznoha hałasavańnia. Pa śpisie tych zajavak, jakija pastupili, było 10, pa ŭsim 10 vybarščyki prahałasavali, — abviaścili naziralnikam. — I ŭsio 10 vybarščykaŭ prahałasavali za kandydata Łukašenki.
Dźvie prazrystyja skryni dla asnoŭnaha dnia ličyli prykładna stolki ž, kolki i daterminovaje hałasavańnie — chvilin 20.
— U hałasavańni ŭ asnoŭny dzień vybaraŭ uziało ŭdzieł 426 vybarščykaŭ. Za Hajdukieviča prahałasavali 25, Karatkievič — 34, Łukašenku — 236, Ułachoviča — 10, suprać usich — 121, — abjaŭlaje kamisija.
Paru chvilin sychodzić na toje, kab aformić vynikovy pratakoł. Pa ličbach vychodzić, što daterminova na hetym učastku zachacieli prahałasavać bolš ludziej, čym u asnoŭny dzień vybaraŭ — 524 suprać 426.
— Ahulny vynik pa ŭsich urnach: usiaho pryniali ŭdzieł u hałasavańni 960 čałaviek, — abviaščajuć nam vynik. — Ź ich suprać usich prahałasavali 204 čałavieki. Za Hajdukieviča — 30, Karatkievič — 46, Łukašenku — 660, Ułachoviča — 20.
Heta tyja ličby, jakija ŭvojduć u čystavy asobnik pratakołu.
Na hetym učastku pieršaje miesca ŭ Alaksandra Łukašenki — 68,7%, druhoje miesca ŭ kandydata «suprać usich» — 21,25. U Taćciany Karatkievič 4,8%, u Siarhieja Hajdukieviča 3,1%, u Mikałaja Ułachoviča 2%.
Kamientary