«My ŭziali adkaznaść za Płošču, my hatovyja ŭziać adkaznaść za Krainu»

«NN» jašče ŭ pačatku krasavika prasiła pra interviju Alesia Mazura – kamendanta namiotavaha miastečka, što prastajała na Kastryčnickaj płoščy 20–24 sakavika. «Nie para», – prasiŭ adkłaści jon. Ale napiaredadni Čarnobylskaha šlachu jon sam pryjšoŭ u Redakcyju. Dakładniej, nia sam – z šaściu svaimi paplečnikami. Usie – z novaha pakaleńnia palitykaŭ, narodžanych u 70-ja, na 20 hadoŭ maładziejšych za Łukašenku. Ź imi hutaryli našaniŭcy.

«Ceły miesiac štabam Milinkieviča stračany. Udzielniki Sakavika-2006 prahnuć dziejańnia, a štab čakaje sacyjalna-ekanamičnaha kryzisu. Nia bačym planu, nia bačym idejaŭ. Tamu my nia možam bolej maŭčać. My staniem aporaj Milinkieviča. My dajom siońniašnim lideram hod. I źviartajemsia da moładzi: samaarhanizoŭvajciesia!».

Aleś Mazur: My vyrašyli dać hetaje interviju ź dźviuma metami. Pa-pieršaje, para raźviejać niekatoryja lehiendy adnosna Płoščy.

Niekatoryja padajuć spravu tak, niby pratesty raspačalisia sami saboj, inšyja, naadvarot, chočuć zrabić sabie pijar. Arhanizacyjnyja zachady dla ŭźniknieńnia Płoščy byli zroblenyja hrupaj maich adnahodkaŭ, jakija na praciahu vybarčaj kampanii pravodzili mabilizacyjnuju i arhanizacyjnuju pracu siarod moładzi.

Vybary nie byli ni svabodnymi, ni spraviadlivymi. Pra heta śviedčyła ŭžo samo toje, što na Płošču 19-ha vyjšli pratestavać dziasiatki tysiačaŭ – niahledziačy na atmasferu teroru, na histeryju zapałochvańniaŭ. Tamu my sabralisia ŭ noč na 20-ha i pryniali rašeńnie pratestavać mirnym šlacham, vystaviŭšy namioty na Płoščy. Štab Milinkieviča byŭ pastaŭleny pierad faktam, kali namioty ŭžo ŭstalavali.

Mnohija našy siabry byli nastrojenyja rašuča. Heta było pytańnie honaru, pytańnie, ci my, biełaruskaja nacyja, jość.

Płošču arhanizoŭvali rehijanalnyja hrupy. Arhmomanty, pieršyja namioty – usio heta lehła na plečy pradstaŭnikoŭ Viciebsku, Horadni, Mastoŭ, Śvietłahorsku, Barysava, Babrujsku, Smarhoni, Žodzina, Vialejki i Bieraścia – haradoŭ, achoplenych infarmacyjnaj kampanijaj «Chopić!». Ludzi zahadzia padvieźli namioty, dyvanki, mehafony, navat hitary. Ułady vidavočna prahnazavali niešta padobnaje. Jak tolki naša mašyna padviezła namioty i inšyja rečy, pry pieršaj ža sprobie ŭstalavać dva namioty pasiarod natoŭpu – heta zrabili dźvie śmiełyja dziaŭčyny z Smarhoni, – nalacieli ludzi ŭ cyvilnym. Vyratavała toje, što ludzi prosta palehli na rečy i nie dali ich kanfiskavać. Praz mehafon my paprasili prysutnych utvaryć žyvoje ačapleńnie i ŭžo ŭ siaredzinie hetaha koła ciaham hadziny paŭstała 12 namiotaŭ. Usiaho na momant likvidacyi namiotavaha miastečka na placy stajała 36 namiotaŭ. Za ŭvieś čas u samim miastečku ŭ vyniku supraćstajańnia z specsłužbami było źniščana čatyry namioty. Pavodle našych acenak, na padychodach da Płoščy było kanfiskavana kala 60 namiotaŭ. Kali b nie było takoha filtracyjnaha režymu pry naviedvańni Płoščy, taho zapałochvańnia hramadzianaŭ, to miastečka było b hihanckim. Zvyčajnyja hramadzianie prahnuli dziejańnia, nia tolki aktyvisty.

– Ci majecie pretenzii da Milinkieviča, inšych palityčnych lideraŭ za ich dziejańni ŭ časie Płoščy?

Aleś Mazur: Nijakich. Naadvarot: jany prajavili siabie jak śmiełyja, sumlennyja ludzi. Jany byli z narodam – Milinkievič, Kazulin, Karniajenka, Siŭčyk, Janukievič, Ivaškievič, Kulej, kamunisty... Navat paśla taho, jak palitykaŭ pačali aryštoŭvać: Labiedźku, Janukieviča, Dabravolskaha ŭ pieršuju ž noč stajańnia na Płoščy…

Ihar Lalkoŭ: Viadoma, usio rabiła samaarhanizacyja. Inicyjatary nadali pieršasny impuls, dalej ludzi arhanizoŭvalisia sami. Kaardynatarami byli pryznačanyja pačarhovyja kiraŭniki perymetru i dziaŭčaty, adkaznyja za charčavańnie i medyčnuju dapamohu. U astatnim ža miastečka była pabudavanaja na samaarhanizacyi. Nichto nie zadavaŭ niepatrebnych pytańniaŭ, usie viedali, što treba rabić.

Siarhiej Sałaš: Adnak davajcie nia budziem skidvać z rachunkaŭ, što namioty paŭstali na Płoščy nia tolki na znak pratestu suprać teroru i falsyfikacyj, ale i kab vykazać niezadavolenaść niaŭpeŭnienaściu palityčnych lideraŭ. Niekatoryja ź ich, takoje ŭražańnie, najbolš kłapaciłasia, kab źbić chvalu, kab «čaho nia vyjšła».

Aleś Mazur: Mušu skazać toje druhoje, čamu my paličyli niemahčymym dalej maŭčać. Ceły miesiac štabam Milinkieviča stračany. Udzielniki Sakavika-2006 prahnuć dziejańnia, a kiraŭnictva Štabu adkładaje dziejańnie na momant budučaha sacyjalna-ekanamičnaha kryzisu. Nia bačym planu, nia bačym idejaŭ. Badziory duch, jaki zastaŭsia paśla hetych padziejaŭ, nie materyjalizujecca ŭ novyja kankretnyja spravy. Nastroj jość, dziejańniaŭ niama. Stračvajecca inicyjatyva. Adkład nie idzie ŭ ład. Jość niebiaśpieka stracić chvalu. Tady ŭsie achviary ludziej, što vyjšli na Płošču, pojduć namarna.

– Što prapanujecie vy?

Aleś Michalevič: Stvarać Ruch Milinkieviča. Milinkievič maje šyrokuju viadomaść. Maje lehitymnaść. Nia maje zatoje admoŭnaha rejtynhu i nie vyklikaje nadzvyčajnaha razdražnieńnia navat siarod našych apanentaŭ. Hety čałaviek pavinien abjadnać ludziej. Miž tym siarod vyšejšaha kiraŭnictva demakrataŭ ja nie naziraju sapraŭdnaha abjadnańnia vakoł lidera. Siońnia stvaryłasia ŭnikalnaja mahčymaść stvareńnia šyrokaha hramadzkaha ruchu, abjadnanaha ahulnapryznanym lideram. Hety ruch pavinien razbudoŭvacca i napaŭniacca nia tolki funkcyjanalnym, ale j arhanizacyjnym źmiestam. Nielha žyć ad śviataŭ da śviataŭ, ad vybaraŭ da vybaraŭ. My chočam padšturchnuć lideraŭ da aktyŭnych dziejańniaŭ.

Aleś Čyhir: My ŭziali adkaznaść za Płošču, my hatovyja ŭziać adkaznaść za krainu. My źviartajemsia da moładzi: samaarhanizoŭvajciesia! Stvarajcie svaje inicyjatyvy i dziejničajcie samastojna. Heta najlepšaja forma pracy ŭ siońniašnich umovach.

– Vy idziacie ŭ baraćbu z adkrytym zabrałam. A represii?

Siarhiej Antusievič: Ad represijaŭ u hetaj systemie nichto nie zastrachavany. Adzinaja strachoŭka – heta aktyŭnaja hramadzkaja dziejnaść, hramadzki rezanans.

Siarhiej Sałaš: U peŭnaj stupieni abaronaj słužyć i viadomaść. U siabie ŭ rehijonach taksama. Pasadziać nas – my budziem dla ludziej hierojami. Skažu za siabie. Treba budzie – pajdu siadzieć. Aby maja kraina narešcie stała svabodnaju.

Jury Hubarevič: Treba jašče praličyć, kamu bolš škody pryniasie hetaje zakručvańnie hajek. Represiŭnaja mašyna ŭrešcie zdyskredytuje siabie samu. Bo ŭsio maje miežy, jak pakazaŭ prykład hramadzkaj salidarnaści na Płoščy.

– Vy chočacie źmieny ŭłady ŭ krainie. Kali heta moža adbycca, pa-vašamu?

Ihar Lalkoŭ: Kali pierapoŭnicca čaša ciarpieńnia. Naprykład, u vypadku falsyfikacyi nastupnych vybaraŭ, miascovych. Navat apošnija vybary vyklikali ŭ čynoŭnikaŭ na miescach šmat pytańniaŭ u dačynieńni da našaj słavutaj stabilnaści. Jany viedajuć, na čyim baku praŭda.

Siarhiej Sałaš: Dy niavažna – kali. Važna, kab heta byli źmieny na karyść Biełarusi. Kab jany adbylisia, zmahacca za ich treba niaspynna. Dziasiatki tysiačaŭ vychodzili na Płošču – vializnaja kolkaść u našych umovach. Kali hety patencyjał nie raściarušyć, abjadnać u Ruchu Milinkieviča, heta budzie surjoznaja siła. Kułak, jaki budzie abaraniać Biełaruś. Kali adbuducca pieramieny, prahnazavać nie biarusia. Viedaju tolki, što jany nie adbuducca, kali ich nie rychtavać. A pryznačać revalucyju na 25 sakavika praz hod – heta hłupstva i kamprametacyja.

– Što, kali na miascovych vybarach vas paprostu nia buduć rehistravać?

Siarhiej Sałaš: Takaja palityčnaja kampanija musić być vykarystana nie dla papularyzacyi peŭnych asobaŭ, my možam achviaravać svaimi kandydaturami dziela kampanii, naprykład, pa źmianieńni vybarčaha zakanadaŭstva. U vypadku čaho možna prybiehnuć da taktyki bajkotu.

Aleś Čyhir: Dobra było b, kab miascovyja vybary nabyli ahulnanacyjanalny maštab, kab heta była palityčnaja kampanija pad ahulnym brendam. Abjadnanaja, a nie raściarušanaja, jak u 2003-m. My musim vyjści pa ŭsioj krainie i pieramahać.

– Ale Milinkievič kaža, što vybary bolš u krainie ničoha nia značyć.

Aleś Čyhir: Bo siońnia ŭ Biełarusi, za vyniatkam pradprymalnikaŭ, niama takich sacyjalnych hrupaŭ, dzie našy prychilniki składali b bolšaść, ale jany jość u kožnaj hrupie. Padtrymlivaju dumku Vitala Silickaha, što pieramieny ŭ sakaviku nie adbylisia tamu, što nie było sacyjalna-ekanamičnych dla ich. Siońnia hałoŭnaje – pašyrać miežy svabody. My musim stvaryć systemu daniasieńnia infarmacyi. Byŭ tolki Internet. Nie było narmalnaha radyjoviaščańnia, niedapracavany raspaŭsiud drukavanaj pradukcyi. I musim vypracavać daskanałuju, detalovuju prahramu ekanamičnaha raźvićcia krainy. Takuju, jakaja zrobić ź Biełarusi eŭrapiejskaha ekanamičnaha tyhra.

– Jak vy staviciesia da mierkavańnia, što nijakija źmieny ŭ Biełarusi niemahčymyja biez padtrymki Rasiei?

Aleś Mazur: Kali hulać pa jaje praviłach, to adnaznačna prajhrajem. Treba prahmatyčna kiravacca našymi nacyjanalnymi intaresami.

– Što vy dumajecie pra Kazulina?

Aleś Michalevič: Kazulin niachaj dałučajecca da ruchu «Za svabodu» šarahovym ci pieradavym členam i dapamahaje Milinkieviču. Tyja dni ŭ sakaviku, kali Kazulin pracavaŭ na supolnuju spravu, jon vyklikaŭ pavahu. Za jahonaje vyzvaleńnie budziem zmahacca, jak i za kožnaha inšaha viaźnia.

– Nie baiciesia, što vašy zajavy spravakujuć raskoł u demakratyčnych siłach?

Aleś Michalevič: Naš krok vymušany, i my robim jaho tak, kab jon byŭ zaŭvažany. Bo što chavać – niekatoryja ŭžo hatovyja da raskołu. Anatol Labiedźka stavić pad sumnieŭ lehitymnaść Milinkieviča. Kažuć, što Milinkievič – heta «prajekt», i jon «vyčarpaŭ siabie», što «treba sklikać čarhovy kanhres», rabić niejkija acenki. Nijaki Milinkievič nie prajekt, jon lider. Sumlenny, spakojny lider. Ja pracavaŭ na jaho i budu pracavać. A ŭsialakija marnyja razmovy – pamyłka ŭ sytuacyi, kali ŭ Milinkieviča jość palityčnaja vaha j rejtynh. I ciapier jamu patrebnaja tolki vykanaŭčaja struktura dla narmalnaj kamunikacyi z hramadztvam. Nivodzin inšy lider nia maje takich mahčymaściaŭ, jak Milinkievič. Baraćbu ambicyj na nastupnyja hady treba spynić.

Aleś Mazur: My staniem aporaj Milinkieviča. Kali siońniašnija lidery demakratyčnych siłaŭ buduć biaździejničać, my hatovyja stać jahonaj adzinaj aporaj.

Siarhiej Sałaš: Pad Milinkieviča padpišucca mnohija: chto byŭ na Płoščy, chto tudy nie dajechaŭ, ale pryjedzie na 26-ha. A chto padpišacca pad zaklikam niejkaj tam, niachaj i demakratyčnaj, kaalicyi? Padčas maich dźviuch adsiedak my šmat havaryli pra budučyniu, ale nichto nia źviazvaŭ nadziejaŭ z «kaalicyjaj». Źviazvali ź Milinkievičam, ad jaho čakajuć rašučych dziejańniaŭ. Jakich, štopraŭda, pakul niama, akramia pajezdak za miažu. Jany taksama treba, tolki nia treba na ich zacyklivacca. Milinkieviča – u rehijony!

– Kolki času vy dajacie ciapierašnim lideram?

Siarhiej Sałaš: Jany sami sabie pryznačyła hod na rozdum. Darečy, my nia budziem nazirać hety hod, my budziem pracavać, ščyra pracavać u ahulnaj kamandzie.

Aleś Mazur: My dajom im hod. Kali jany buduć niazdolnyja, my budziem brać inicyjatyvu ŭ svaje ruki.

❏

Chto jany takija?

Aleś Mazur

Naradziŭsia 22 sakavika 1974 hodu. Skončyŭ Lvoŭski rehijanalny instytut dziaržaŭnaha kiravańnia z stupieńniu mahistra. Byŭ zasnavalnikam i vydaŭcom hazety «Navinki». Kiraŭnik Ahienctva rehijanalnaha raźvićcia «Pałard» (Śvietłahorsk).

Ihar Lalkoŭ

Naradziŭsia 15 krasavika 1971 hodu ŭ Miensku. Mahistar historyi. Skončyŭ histfak Biełaruskaha dziaržaŭnaha ŭniversytetu i Sarbonski ŭniversytet (Francyja). Vykładčyk Vyšejšaj škoły dziaržaŭnaj administracyi ŭ Biełastoku. Stvaralnik i kiraŭnik Biełaruskaha Šumanaŭskaha tavarystva, što bazujecca ŭ Polščy. Staršynia mižnarodnaj kamisii Partyi BNF i adzin z hałoŭnych arhanizataraŭ zamiežnych vizytaŭ A.Milinkieviča. Žanaty, haduje dźvie dačok – Rahniedu i Valžynu.

Aleś Čyhir

Naradziŭsia 29 traŭnia 1972 hodu ŭ Rečycy. Skončyŭ Homielski dziaržaŭny ŭniversytet imia F.Skaryny. Pracuje nastaŭnikam historyi ŭ Babrujsku. Deputat Babrujskaha harsavietu. Žanaty, haduje traich dziaciej – dačku Alisu i synoŭ Mirasłava i Ŭsievałada.

Aleś Michalevič

Naradziŭsia 15 traŭnia 1975 hodu ŭ Miensku. U liku pieršych vypusknikoŭ zakončyŭ Biełaruski humanitarny licej. Skončyŭ jurfak Biełaruskaha dziaržaŭnaha ŭniversytetu. Uznačalvaŭ Zadzinočańnie biełaruskich studentaŭ, Moładzievy infarmacyjny centar. Namieśnik staršyni Partyi BNF, deputat Puchavickaha rajsavietu, kaardynatar niezarehistravanaj Asamblei deputataŭ miascovych savietaŭ. Žanaty, haduje dačku Lesiu-Stefaniju.

Siarhiej Sałaš

Naradziŭsia 28 červienia 1974 hodu. Skončyŭ Žodzinski palitechnikum i histfak BDU. Lider hramadzkaj inicyjatyvy «Za čysty Barysaŭ». Stvaryŭ kamandu prafesijanałaŭ, jakaja raspracavała stratehiju raźvićcia Barysava i rehijonu. Žanaty, haduje dačku Daminiku.

Siarhiej Antusievič

Naradziŭsia 16 žniŭnia 1973 hodu. Skončyŭ Biełaruski technalahičny instytut. Pracuje na najbujniejšym pradpryjemstvie Horadni «Azot» staršyniom pieršasnaj arhanizacyi Biełaruskaha niezaležnaha prafsajuzu. Deputat Haradzienskaha harsavietu. Kiraŭnik štabu adzinaha kandydata pa Horadni. Žanaty, haduje syna Paŭła.

Juraś Hubarevič

Naradziŭsia 23 lutaha 1979 hodu. Skončyŭ Biełaruskuju dziaržaŭnuju politechničnuju akademiju i Lvoŭski rehijanalny instytut dziaržaŭnaha kiravańnia. Deputat Biełaaziorskaha harsavietu. Kiraŭnik štabu adzinaha kandydata pa Bieraściejskaj vobłaści, staršynia abłasnoj arhanizacyi Partyi BNF. Žanaty, haduje dačku Ahatu.

• 0
• 0
• 0
• 0
• 0
• 0
• 0
• 0