Naŭsieda: Kali ŭ bližejšyja niekalki tydniaŭ nie budzie šaroŭ, nie budzie nielehalnych mihrantaŭ, mahčyma, pačniem dyjałoh ź Biełaruśsiu

U svaim intervju telekanału «Naviny TV3» u sieradu kiraŭnik litoŭskaj dziaržavy adkazaŭ pytańniem na pytańnie pra pieramovy nakont mahčymaści dyjałohu Litvy ź Minskam, piša Delfi.lt.

«A pry najaŭnaści rekordnaha patoku nielehalnych mihrantaŭ na našaj miažy ŭ apošnija dni abo pastajannych atak z vykarystańniem šaroŭ, ci sapraŭdy my pavinny ciapier havaryć i prasić susiedni režym ab indulhiencyi na sustreču?» — zajaviŭ Naŭsieda.

Tak jon prakamientavaŭ zaklik da Litvy pravieści dvuchbakovuju palityčnuju sustreču ź Biełaruśsiu i adnavić tranzit uhnajeńniaŭ, ahučany ŭ intervju LRT śpiecpradstaŭnikom ZŠA ŭ Biełarusi Džonam Koŭłam.

Jak zajaviŭ Hitanas Naŭsieda, Litva pavinna vyłučyć Biełarusi ŭmovu dla mahčymaha dyjałohu. Pavodle słoŭ prezidenta, kali minski režym prajavić dobruju volu, naprykład, spynić patoki mieteazondaŭ z kantrabandaj u Litvu i nielehalnych mihrantaŭ, jakija sprabujuć pierasiekčy miažu, tady možna budzie razhledzieć pytańnie ab palityčnych pieramovach pamiž dziaržavami.

«Kali ŭ bližejšyja niekalki tydniaŭ, na praciahu čatyroch tydniaŭ, nie budzie šaroŭ, nie budzie nielehalnych mihrantaŭ, usie fury paśpiachova viernucca ŭ Litvu, i sapraŭdy buduć prademanstravany namahańni režymu pa narmalizacyi adnosin, prynamsi biez stvareńnia napružanaści dla svajho susieda, my rascenim heta jak znak dobraj voli i, mahčyma, pačniom taki dyjałoh, ale dla hetaha pavinny być vielmi vyraznyja ŭmovy, a tyja, što isnujuć na dadzieny momant, vielmi dalokija ad tych, jakija možna było b ujavić dla pačatku dyjałohu», — skazaŭ Naŭsieda.

Adkazvajučy na pytańnie pra mahčymaść adnaŭleńnia tranzitu biełaruskich uhnajeńniaŭ praź Litvu, prezident nahadaŭ, što abmiežavańni na pieravozku ŭhnajeńniaŭ źviazanyja z sankcyjami Jeŭrapiejskaha sajuza.

Tamu, na dumku H. Naŭsiedy, Litva pavinna być adzinaj ź ES u hetym pytańni i nie prymać rašeńni samastojna.

Sapraŭdy, jak adznačyŭ H. Naŭsieda, kali biełaruski režym prajavić imknieńnie da źmienaŭ i zbližeńnia z Zachadam, mohuć być raspačaty dyskusii nakont nieabchodnaści praciahnieńnia sankcyj, uviedzienych suprać Minska. «Hetyja dvanaccać miesiacaŭ (termin dziejańnia sankcyj) rana ci pozna skončacca, za hety čas mohuć adbycca i inšyja pazityŭnyja zruchi, i ŭ minskaha režymu jość biaskonca šmat mahčymaściaŭ pakazać, što jany sapraŭdy chočuć zblizicca z Zachadam, što jany chočuć pierastać być maryjanietkaj Rasii ŭ vajnie z Ukrainaj — ja razumieju, što siońnia takoje mierkavańnie vyhladaje mała realnym, ale ŭ ich jość mahčymaść heta prademanstravać — i tady my, biez sumnievu, budziem tymi, chto skaža, nie ihnarujučy hety fakt, navat vystupajučy na forumach Jeŭrapiejskaha sajuza: «pahladzicie, situacyja ŭ Biełarusi źmianiajecca, i my možam adpaviednym čynam źmianić našu palityku», ale siońnia ja nie baču nijakich padobnych pieradumoŭ», — prakamientavaŭ Naŭsieda.

• 1
• 0
• 2
• 4
• 0
• 1
• 0
• 0