Jeŭrasajuz asudziŭ vyniasieńnie čarhovaha śmiarotnaha vyraku ŭ Biełarusi

Jeŭrasajuz asudžaje vyniasieńnie čarhovaha śmiarotnaha pryhavoru ŭ Biełarusi. Adpaviednuju zajavu zrabiła pres-sakratar Jeŭrapiejskaj słužby źniešnich dziejańniaŭ Maja Kačyjančyč.

20 listapada Hrodzienski abłasny sud pryhavaryŭ 28-hadovaha Ivana Kulaša da śmiarotnaj kary. Jon pryznany vinavatym u zabojstvie troch pradaŭščyc u Lidskim rajonie, a taksama ŭ kradziažy i razboi. Pavodle viersii śledstva, u vieraśni 2013 hoda Kuleš zabiŭ dźviuch pradaŭščyc u Lidzie i vykraŭ z mahazina hrošy i tavary na sumu bolšuju za 37 młn. rubloŭ. U listapadzie 2014 hoda, pavodle źviestak śledstva, padsudny zabiŭ jašče adnaho pradaŭca ŭ Lidskim rajonie — nanios žančynie bolš jak 10 udaraŭ siakieraj i vykraŭ z mahazina hrošy i tavary. Aprača taho, Kuleš pryznany vinavatym u zamachu na zabojstva syna pradaŭščycy, jaki zastaŭ jaho ŭ mahazinie. 

«Jeŭrapiejski sajuz spadziajecca, što prava sp. Kulaša na abskardžańnie pryhavoru budzie poŭnaściu harantavanaje. Sp. Kuleš byŭ asudžany za surjoznyja złačynstvy, i my vykazvajem našy najhłybiejšyja spačuvańni siemjam i siabram achviaraŭ hetych złačynstvaŭ. Tym nie mienš Jeŭrapiejski sajuz vystupaje suprać śmiarotnaj kary va ŭsich vypadkach, pakolki jana nie moža być apraŭdanaja ni pry jakich akaličnaściach», — havorycca ŭ zajavie pres-sakratara. 

U Jeŭrapiejskaj słužbie źniešnich dziejańniaŭ padkreślivajuć, što śmiarotnaja kara źjaŭlajecca žorstkim i biesčałaviečnym pakarańniem, «jakoje nie dziejničaje ŭ jakaści strymlivajučaha faktara i ŭjaŭlaje saboj nieprymalnaje admaŭleńnie čałaviečaj hodnaści i niedatykalnaści».

«Jeŭrapiejski sajuz zaklikaje Biełaruś, adzinuju krainu ŭ Jeŭropie, jakaja dahetul prymianiaje śmiarotnuju karu, dałučycca da hłabalnaha maratoryja na śmiarotnuju karu ŭ jakaści pieršaha kroku da jaje admieny», — skazana ŭ zajavie.

Raniej sa škadavańniem ab vyniasieńni ŭ našaj krainie čarhovaha śmiarotnaha pryhavoru vystupiŭ Saviet Jeŭropy.

Śmiarotny pryhavor u dačynieńni da Ivana Kulaša — užo druhi ŭ 2015 hodzie.

18 sakavika Homielski abłasny sud pryhavaryŭ žychara Rečycy Siarhieja Ivanova da vyšejšaj miery pakarańnia. Małady čałaviek pryznany vinavatym u žorstkim zabojstvie dziaŭčyny. Viarchoŭny sud pry abskardžańni pakinuŭ pryhavor u sile. Biełaruś — adzinaja kraina ŭ Jeŭropie i na postsavieckaj prastory, dzie dahetul prymianiajecca śmiarotnaja kara. Z pačatku 1990 hoda da vyšejšaj miery byli pryhavorany bolš jak 400 asudžanych.

• 0
• 0
• 0
• 0
• 0
• 0
• 0
• 0