Labiedźka: U inicyjataraŭ kanhresa demsił pakul niama ahulnaha bačańnia stratehii abjadnańnia
Abjadnanaja hramadzianskaja partyja hatova ŭdzielničać u lubych mierapryjemstvach, jakija realna buduć sadziejničać kansalidacyi i abjadnańniu apazicyi. Ab hetym zajaviŭ staršynia partyi Anatol Labiedźka 14 studzienia na pres-kanfierencyi ŭ Minsku.
«Na siońnia my nie atrymali infarmacyju, što kanhres demakratyčnych sił realna daść impuls abjadnańniu. U mianie stvaryłasia ŭražańnie, što pakul navat siarod inicyjataraŭ kanhresa niama ahulnaha bačańnia stratehii abjadnańnia», — skazaŭ jon.
U pryvatnaści, adznačyŭ Labiedźka, Stanisłaŭ Šuškievič źjaŭlajecca prychilnikam bajkotu i niaŭdziełu ŭ vybarach, Uładzimir Niaklajeŭ havoryć, što treba iści na vybary i zdymacca na apošnim etapie, Mikałaj Statkievič havoryć, što treba iści da kanca, a zatym arhanizoŭvać płošču. «Try inicyjatary kanhresa i try stratehii dziejańniaŭ», — padkreśliŭ jon.
Labiedźka paviedamiŭ, što na nastupnym tydni pradstaŭniki pravacentrysckaj kaalicyi (AHP, ruch «Za Svabodu» i arhkamitet pa stvareńni partyi «Biełaruskaja chryścijanskaja demakratyja») sustrenucca z pradstaŭnikami arhkamiteta kanhresa. «Mahčyma, štości źmianiłasia i stanie bolš aptymistyčna. Dobra, kali b pierad vybarčaj kampanijaj była maksimalnaja kansalidacyja, pryčym nie tolki praz zajavy, ale i kankretnyja spravy», — skazaŭ jon.
Nahadajem, praviadzieńnie kanhresa demsił z metaj kansalidacyi apazicyi inicyjavała 17 śniežnia hrupa viadomych hramadskich dziejačaŭ Biełarusi. Na nastupny dzień Mikałaj Statkievič, Uładzimir Niaklajeŭ i Stanisłaŭ Šuškievič abjavili ab stvareńni arhkamiteta pa padrychtoŭcy kanhresa. Ciapier, akramia nazvanych palitykaŭ, u skład arhkamiteta ŭvachodziać Dźmitryj Daškievič, Viačasłaŭ Siŭčyk, Andrej Sańnikaŭ, Hienadź Fiadynič i Michaił Pastuchoŭ. Płanujecca, što kanhres adbudziecca viasnoj hetaha hoda.
U čym pryčyna niezadavolenaści žycharoŭ mikrarajona Lebiadziny ŭ Minsku? Voś što nasamreč tam płanavali budavać6
Kamientary