Siarhiej Bahdašoŭ, adzin z samych viadomych złačyncaŭ, jaki adšukvaŭsia ŭ Biełarusi i ździejśniŭ ucioki ź izalatara ŭ Žodzinie ŭ 2009 hodzie, pryhavorany ŭ Rasii da šaści hadoŭ pazbaŭleńnia voli, paviedamiŭ na pres-kanfierencyi 27 studzienia prakuror Minskaj vobłaści Aleh Łaŭruchin.
U Biełarusi za ŭčynienyja złačynstvy Bahdašoŭ zavočna asudžany na vosiem hadoŭ pazbaŭleńnia voli z kanfiskacyjaj majomaści i adbyvańniem pakarańnia ŭ papraŭčaj kałonii ŭzmocnienaha režymu.
Kali Rasija vydaść Bahdašova, na čym nastojvaje biełaruski bok, jon paśla adbyćcia pakarańnia ŭ RF praciahnie adbyvać pakarańnie ŭ Biełarusi.
Uradženiec Mahiloŭskaj vobłaści Siarhiej Bahdašoŭ 1978 naradžeńnia 29 maja 2009 hoda, znachodziačysia ŭ kamiery izalatara časovaha ŭtrymańnia ŭ budynku suda Žodzina, kudy byŭ dastaŭleny ŭ jakaści abvinavačanaha na sudovaje pasiadžeńnie pa kryminalnaj spravie, źbiŭ načalnika izalatara, pryčyniŭ jamu ciažkija cialesnyja paškodžańni, zavałodaŭ tabielnaj zbrojaj i ŭciok z-pad varty.
U Smalavickim rajonie Bahdašoŭ vykraŭ «Kadyłak», na jakim pajechaŭ u Rasiju. Da hetaha jon zarablaŭ kradziažami juvielirnych vyrabaŭ, aparatury i instrumienta z katedžaŭ, a taksama kradziažom darahich inšamarak, za što i byŭ asudžany.
Supracoŭnikam milicyi Bahdašoŭ pryznaŭsia: pry ŭčynieńni złačynstvaŭ im kiravaŭ «niejki spartyŭny azart», jamu padabałasia kraści va ŭmovach pavyšanaj ryzyki. Vykradać mašyny, prosta złučajučy draty, niecikava, zajaŭlaŭ Bahdašoŭ, inšaja sprava — zabracca ŭ bahaty dom, kali haspadary śpiać, znajści miesca, dzie lažać hrošy, dakumienty, klučy ad aŭtamabila.
Zajmajučysia złačynnaj dziejnaściu, Bahdašoŭ sutyknuŭsia z tym, što mała chto zamykaje damy i haražy na noč. Tak, va Uździenskim rajonie z čatyroch abśledavanych haražoŭ złačyniec svabodna zajšoŭ u try.
Złodziej paśpiachova «hastralavaŭ» pa Minskaj i Viciebskaj abłaściach, ale, niahledziačy na patałahičnaje šancavańnie i aściarožnaść (pracavaŭ u palčatkach, abutak paśla kožnaha kradziažu mianiaŭ), kolca vakoł jaho ściskałasia. Za niekalki miesiacaŭ da zatrymańnia Bahdašoŭ byŭ zafiksavany kamieraj vonkavaha nazirańnia va Uździe, kali źnimaŭ u bankamacie hrošy pa vykradzienaj kartcy.
Jaho zatrymali ŭ vieraśni 2008 hoda, na toj momant Bahdašoŭ padazravaŭsia bolš jak u dziesiaci kradziažach. Paśla akazałasia, što ich, tolki dakazanych śledstvam, pryblizna paŭsotni. Pryčynienaja škoda za niapoŭnyja try hady (2006—2008) skłała amal miljard rubloŭ.
Paśla ŭciokaŭ Bahdašova z žodzinskaha suda było ŭstanoŭlena, što ŭ Pskoŭskaj vobłaści RF jon učyniŭ sieryju kradziažoŭ z elitnych damoŭ, a ŭ kastryčniku 2009-ha trapiŭ u pole zroku pravaachoŭnikaŭ u Siestrarecku (Leninhradskaja vobłaść). Pry zatrymańni jamu ŭdałosia ŭciačy.
Zatrymali Bahdašova, abvieščanaha ŭ mižnarodny vyšuk pa linii Interpoła, tolki ŭ lipieni 2014 hoda ŭ Padmaskoŭi. U hetym pravaachoŭnym orhanam dapamoh zvyčajny płot, za jaki, sychodziačy ad pieraśledu, začapiŭsia złačyniec. Mocna paškodžanuju pry hetym nahu paźniej daviałosia amputavać.
U Biełarusi ŭ dačynieńni da Bahdašova akramia kryminalnych spraŭ za kradziažy byli raspačatyja jašče dźvie spravy: na padstavie č. 4 art. 294 (kradziež ahniastrelnaj zbroi, bojeprypasaŭ abo vybuchovych rečyvaŭ) i č. 2 art. 413 (ucioki z papraŭčaj ustanovy, jakaja vykonvaje pakarańnie ŭ vyhladzie pazbaŭleńnia voli, aryštnaha doma abo z-pad varty) KK.
U vieraśni 2009 hoda sudom Barysaŭskaha rajona byŭ asudžany načalnik izalatara časovaha ŭtrymańnia, jaki kanvajavaŭ Bahdašova. Načalniku IČU było pryznačanaje pakarańnie ŭ vyhladzie čatyroch hadoŭ abmiežavańnia voli z nakiravańniem u papraŭčuju ŭstanovu adkrytaha typu i pazbaŭleńniem prava zajmać peŭnyja pasady terminam na try hady.
Načalnik IČU abvinavačvaŭsia na padstavie č. 1 art. 428 KK (słužbovaja chałatnaść). Rasśledavańnie pravodziła prakuratura Žodzina.
Ciapier čytajuć
Byłoha supracoŭnika kontrraźviedki KDB aryštavali za zdradu dziaržavie1
Kamientary