Rada Eŭropy zaklikaje da sankcyj suprać Biełarusi

Parlamenckaja asambleja Rady Eŭropy ŭchvaliła rezalucyju ab złoŭžyvańniach u systemie kryminalnaha pravasudździa Biełarusi.

U hałasavańni ŭdzielničała 69 delehataŭ. Za rezalucyju vykazalisia 56 udzielnikaŭ hałasavańnia, 11 čałaviek prahałasavali suprać i 2 čałavieki ŭstrymalisia.

U rezalucyi Parlamenckaja asambleja zaklikaje Biełaruś nieadkładna ŭvieści maratoryj na śmiarotnaje pakarańnie, a taksama admianić artykuł 193-1 Kryminalnaha kodeksu Biełarusi, jaki praduhledžvaje kryminalnuju adkaznaść za dziejnaść ad imia niezarehistravanaj arhanizacyi.

Parlamenckaja asambleja Rady Eŭropy zaklikała pravaabaroncaŭ vieści ŭlik nia tolki achviaraŭ palityčna matyvavanych złoŭžyvańniaŭ, ale j vinavatych u takich złoŭžyvańniach. Adnačasna va ŭchvalenaj siońnia rezalucyi PARE zaachvočvaje Eŭraźviaz i ZŠA da ŭviadzieńnia novych sankcyjaŭ u adnosinach da biełaruskich čynoŭnikaŭ, adkaznych za surjoznyja parušeńni pravoŭ čałavieka. PARE zaachvočvaje dziaržavy Rady Eŭropy da dalejšaj padtrymki biełaruskich palityčnych źniavolenych i ich siemjaŭ.

U siońniašniaj rezalucyi źmieščany taksama zaklik da ŭradu i Dziaržaŭnaj dumy Rasiei ŭ dyjalohu ź biełaruskimi ŭładami vystupić na baku palitźniavolenych i inšych achviaraŭ palityčna matyvavanych złoŭžyvańniaŭ.

* * *

Chrystas Purhurydes pradstaviŭ na pasiadžeńni Parlamenckaj asamblei Rady Eŭropy spravazdaču ab złoŭžyvańniach u systemie kryminalnaha pravasudździa Biełarusi. Siarod inšaha sp. Purhurydes zaklikaŭ svaich rasiejskich kalehaŭ spynić padtrymku režymu ŁUkašenki i vykazaŭ spadziavańnie, što Rasieja mahła b paŭpłyvać na palapšeńnie sytuacyi z pravami čałavieka ŭ Biełarusi.

Pačałosia abmierkavańnie spravazdačy. Pradstaŭnica Niamieččyny Sabina Lojthojzer-Šnarenberhier nazvała Biełaruś “najhoršaj dyktaturaj u śviecie”. Z hetym nie pahadziŭsia pradstaŭnik frakcyi abjadnanych eŭrapiejskich levych Tyni Koks, jaki zaznačyŭ, što ŭ Biełarusi niama inšaha vyjścia, jak viarnucca ŭ Eŭropu, i Biełaruś musić zrabić pieršyja kroki sama. Źviartajučysia da biełaruskich uładaŭ, sp. Koks skazaŭ: “Pačynajcie ruchacca, vy čakali zanadta doŭha. Vaša miesca – u Eŭropie”. Pradstaŭnik Estonii Andres Cherkiel nazvaŭ “soramam, što ŭ XXI stahodździ niekaha sadžajuć u turmu za ŭdzieł u niezarehistravanych arhanizacyjach”.

Pradstaŭnik Rasiei Leanid Słucki vystupiŭ z rezkaj krytykaj “raznosnaj” spravazdačy Purhurydesa i baraniŭ dziejańni biełaruskich uładaŭ suprać apazycyi. Paviedamleńni pra źniknieńni palitykaŭ u Biełarusi jon nazvaŭ ”vydumkami” i ”prapahandysckimi pravakacyjami”.

Dakładčyk PARE ŭ pytańniach Biełarusi Andrea Ryhoni adznačyŭ, što niedastatkova tolki asudžać biełaruskija ŭłady. Na jaho dumku, treba vieści šyrejšy dyjaloh. Pavodle Ryhoni, iluzija – čakać, što demakratyja sama pryjdzie ŭ Biełaruś.

Pradstaŭnica Rasiei Śviatłana Haračava zajaviła pra tendencyjnaść padrychtavanaha sp. Purhurydesam dakładu i vykazała ździŭleńnie, čamu na abmierkavańni niama pradstaŭnikoŭ aficyjnaha Miensku.

Hiedyminas Jakavonis, vystupajučy ad imia litoŭskaj delehacyi, padkreśliŭ, što Rada Eŭropy pavinna sieści za stoł pieramovaŭ z uładami Biełarusi, a litoŭski bok hatovy vystupić tut pasiarednikam. Pavodle Jakavonisa, delehacyja Litvy ŭchvalaje rezalucyju i rekamendacyi, vyniesienyja na razhlad Parlamenckaj asamblei. Hiedyminas Jakavonis źviarnuŭ taksama ŭvahu na nieabchodnaść spraścić vizavy režym Eŭraźviazu dla hramadzianaŭ Biełarusi.

Pradstaŭnik Kamunistyčnaj partyi Rasiei Siarhiej Sabko rezka skrytykavaŭ dakład Chrystasa Purhurydesa, zajaviŭšy siarod inšaha: "Biełaruś pad Ameryku nia laža".

Vystupajučy z zaklučnym słovam, aŭtar dakładu Chrystas Purhurydes padkreśliŭ: sam biełaruski režym vinavaty ŭ izalacyi. Na dumku sp. Purhurydesa, Rada Eŭropy skamprametuje siabie, kali pojdzie na dyjaloh z aficyjnym Mienskam u toj čas, jak biełaruskija ŭłady parušajuć pravy čałavieka i nia vykanali asnoŭnych patrabavańniaŭ abjadnanaj Eŭropy. "Naš abaviazak jak Rady Eŭropy, – skazaŭ Purhurydes, – padtrymlivać apazycyju i hramadzianskuju supolnaść u krainach, dzie panuje dyktatura". Reahujučy na rezkuju krytyku svajho dakładu z boku pradstaŭnikoŭ Rasiei, Purhurydes padkreśliŭ, što nie prahučała ničoha, što śviedčyła b pra niapravilnaść ci niedakładnaść faktaŭ, źmieščanych u dakładzie. Aŭtar dakładu taksama prareahavaŭ na repliku adnaho z rasiejskich udzielnikaŭ abmierkavańnia, jaki zajaviŭ, što Alaksandru Kazulinu dla taho, kab być vyzvalenym, dastatkova padać prašeńnie ab pamiłavańni i vykanać peŭnuju praceduru. Na dumku Chrystasa Purhurydesa, Kazulin nie vinavaty i nie pavinien prasić ab pamiłavańni.

• 0
• 0
• 0
• 0
• 0
• 0
• 0
• 0