Ci isnuje ŭ Biełarusi «padatak na ružovaje»? Kolki kaštujuć adnolkavyja tavary dla mužčyn i žančyn?
Tavarystva pa spravach spažyŭcoŭ Ńju-Jorka praviało daśledavańnie, zhodna ź jakim tavary, aryjentavanyja na žančyn, vyjavilisia daražejšymi za tavary, metavaj aŭdytoryjaj jakich byli mužčyny.
Padobnyja daśledavańni pravodzilisia i ŭ inšych krainach, u tym liku ŭ Francyi, Brytanii, Kanadzie i Aŭstralii, i pryviali da anałahičnych vynikaŭ. Abaroncy pravoŭ žančyn ličać heta dyskryminacyjaj. Prydumali navat termin: «padatak na ružovaje». Jon užyvajecca u situacyi, kali tavary z markiroŭkaj «dla žančyn» kaštujuć bolš, čym tavary «dla mužčyn», navat kali hetyja tavary majuć adnolkavy skład i charaktarystyki.
Aktyvisty zaklikajuć admovicca ad pryncypaŭ padziełu tavaraŭ pa hiendernaj prykmiecie. U svaju čarhu vytvorcy i markietołahi zajaŭlajuć, što złoha namieru tut niama: ceny mohuć być roznymi z-za roznaha popytu na pradukcyju — tak rehulujecca rynak, i nichto nikoha nie prymušaje nabyvać toj ci inšy tavar.
«Naša Niva» vyrašyła zrabić nievialikaje ŭłasnaje daśledavańnie. My praanalizavali ceny na roznyja tavary ŭ adnoj biełaruskaj handlovaj sietcy, kab vyjavić: ci pierapłačvajuć biełaruskija žančyny za adnolkavyja tavary ŭ paraŭnańni z mužčynami?
My vybirali tavary z padobnymi charaktarystykami, adnoj cenavaj katehoryi i pry mahčymaści z adnoj sieryi. Vyniki atrymalisia davoli nieadnaznačnyja.
Šampuni
Bolšaść vytvorcaŭ prapanavali adnolkavyja ceny na šampuni dla mužčyn i žančyn. Ale u niekatorych roźnica ŭ košcie prysutničaje (pry adnolkavaj masie, charaktarystykach i aktyŭnych inhredyjentach). Naprykład, šampuń «Head and Shoulders» suprać pierchaci i vypadzieńnia vałasoŭ dla mužčyn kaštuje 68 400 rubloŭ i 75 600 dla žančyn. Takim čynam, žančyny płaciać na 10% bolš, čym mužčyny, za praktyčna adnolkavy pradukt.
Hieli dla duša
Hieli źjaŭlajucca vielmi papularnym srodkam siarod mužčyn. Jany abjadnoŭvać niekalki funkcyj (myjny srodak, šampuń i h.d.) i nadzvyčaj praktyčnyja. Z-za padvyšanaha popytu na dadzienuju pradukcyju z boku mužčyn vytvorcy stvarajuć hieli z paznakaj «dla mužčyn» i z «mužčynskim» dyzajnam upakoŭki. I ŭ bolšaści vypadkaŭ takija «mužčynskija» hieli dla duša kaštujuć bolš, čym zvyčajnyja «uniseks» hieli — choć amal i ničym ad ich nie adroźnivajucca, akramia dyzajnu. Bačym, što «AXE Anarchy dla jaho» kaštuje 40900 rubloŭ, a «AXE Anarchy dla jaje» 39 000 rubloŭ.
Hiel dla haleńnia
Samaja nieadnaznačnaja katehoryja. My razhladzieli hieli dla haleńnia na prykładzie pradukcyi kampanii Gillette. Bolšaja častka pradukcyi kampanii pa zmaŭčańni ličycca mužčynskaj, ale jość śpiecyjalnaja liniejka pradukcyi Gillette Venus dla žančyn. Asartymient hielaŭ Gillette značna šyrejšy, čym asartymient Gillette Venus. «Mužčynskija» hieli kaštujuć prykładna ad 63 tysiač da 130 tysiač rubloŭ — šyroki śpiektr na luby hust. A ŭsie «žanočyja» kaštavali prykładna stolki ž, jak samyja tannyja «mužčynskija»— kala 65—70 tysiač rubloŭ. Takim čynam, bolšaść «mužčynskich» hielaŭ dla haleńnia kaštuje bolš, čym «žanočyja», ale kali paraŭnoŭvać Venus z samymi tannymi ŭzorami Gillette — možna ceny na hieli dla haleńnia ličyć adnolkavymi.
Dezadaranty-antypierśpiranty
Tut usio adnaznačna — mužčynskija kaštujuć bolš, i sprava tut nie ŭ markietynhu. Dziejučyja rečyvy ŭ mužčynskich i žanočych dezadarantach adnolkavyja. Asnoŭny elemient bolšaści antypierśpirantaŭ — aluminiju chłorhidrat, ale ŭ mužčynskich antypierśpirantach jaho kancentracyja vyšejšaja, čym u žanočych. Praz hety faktar my i bačym roźnicu ŭ cenach. Naprykład, aerazol «Rexona men» kaštuje 41 100 rubloŭ, a padobny aerazol «Rexona» dla žančyn — 36 600 rubloŭ.
Šarykavy mužčynski antypierśpirant «Nivea men dla čornaha i biełaha» kaštuje 45 100 rubloŭ, u toj čas, jak padobny žanočy «Nivea dla dla čornaha i biełaha» tańniejšy — 38 200 rubloŭ.
Kasiety dla brytvaŭ
Bolš za ŭsio krytykujuć u niespraviadlivych dla žančyn cenach mienavita vytvorcaŭ brytvaŭ. I sapraŭdy, kali paraŭnać «mužčynskija» i «žanočyja» viersii z adnolkavymi kanstrukcyjami kasiet, «žanočyja» kaštujuć bolš.
Naprykład, 4 kasiety «Gillette Mach 3» kaštujuć 207 tysiač, a 4 kasiety «Gillette Venus Breeze» — 244 400 rubloŭ. Adzinaja roźnica pamiž hetymi kasietami — hielevyja ŭstaŭki ŭ «Gillette Venus Breeze», ale jany źjaŭlajucca chutčej elemientam dyzajnu, čym aktyŭnaj častkaj brytvy.
Takaja ž samaja situacyja i z adnarazovymi stankami. Naprykład, 5 «zvyčajnych» (uniseks) stankoŭ Bic kaštujuć 32 900 rubloŭ, a absalutna identyčnyja pa kanstrukcyi «žanočyja» stanki hetaj kampanii kaštujuć 33 300 rubloŭ.
Jak vyjaviłasia, nie ŭsie tavary z markiroŭkaj «dla žančyn» daražejšyja. Pa niekatorych katehoryjach tavaraŭ pierapłačvajuć, naadvarot, mužčyny.
U lubym vypadku kapitalizm, kankurencyja i vialiki vybar dazvalajuć nabyć kožnamu toje, što jon ličyć patrebnym. I nichto nie zmoža zabaranić mužčynu nabyć tańniejšy «žanočy» hiel dla duša albo žančynie nabyć «mužčynskuju» brytvu.
Kamientary