Hałoŭnaje ŭpraŭleńnie pa rasśledavańni złačynstvaŭ u śfiery arhanizavanaj złačynnaści i karupcyi Śledčaha kamiteta Biełarusi zaviaršyła rasśledavańnie kryminalnaj spravy ŭ dačynieńni da namieśnika ministra žyllova-kamunalnaj haspadarki.
Jak paviedamiła aficyjny pradstaŭnik SK Julija Hančarova, słužbovaj asobie vystaŭlenaje abvinavačańnie ŭ złoŭžyvańni ŭładaj i słužbovymi paŭnamoctvami. Uvohule pa hetaj kryminalnaj spravie pryciahnutyja šeść čałaviek, u dačynieńni da troch ź ich kryminalny pieraśled spynieny z pryčyny amnistyi.
Ustanoŭlena, što adno z pradpryjemstvaŭ sistemy Ministerstva žyllova-kamunalnaj haspadarki nie vykanała dziaržaŭnuju navukova-techničnuju prahramu ŭ častcy zadańniaŭ pa raspracoŭcy i asvajeńni vytvorčaści technałahičnaha abstalavańnia. Pa nazvanych zadańniach biez faktyčnaha vykanańnia rabot u 2013 hodzie zališnie i nieabhruntavana vydatkavanyja srodki respublikanskaha biudžetu — 861 młn rubloŭ.
Namieśnik ministra žyllova-kamunalnaj haspadarki, žadajučy schavać fakty nieefiektyŭnaha i niametavaha vykarystańnia biudžetnych srodkaŭ i pryčynieńnia škody dziaržaŭnaj majomaści, a taksama niedastatkovy kantrol za chodam realizacyi dziaržprahramy, arhanizavaŭ składańnie i padpisańnie zaviedama falšyvych dakumientaŭ ab vykanańni prahramy. Heta dazvoliła ŭtaić fakty nievykanańnia rabot i nieabchodnaść viartańnia hrašovych srodkaŭ, vykarystanych z parušeńniem zakanadaŭstva.
Padčas śledstva ŭsie abvinavačanyja całkam pryznali svaju vinu, raskajalisia ŭ zroblenym i poŭnaściu kampiensavali pryčynienuju škodu.
Kryminalnaja sprava ŭ dačynieńni da troch abvinavačanych pieradadzienaja prakuroru dla nakiravańnia ŭ sud.
Kamientary