Ad vypłaty padatku na darmajedstva źbirajucca vyzvalić dačnikaŭ i maciarok ź dziećmi da 10 hadoŭ
Ministerstva pa padatkach i zborach raskazała, što ciapier u Administracyi prezidenta znachodziacca na razhladzie źmieny ŭ dekret pa darmajedstvie. Tak, vyzvalić ad vypłaty padatku mohuć maci ź dziećmi da 10 hadoŭ, a taksama ŭładalnikaŭ prysiadzibnych učastkaŭ, niezaležna ad prapiski.
Pra heta siońnia paviedamiła žurnalistam namieśnik načalnika hałoŭnaha ŭpraŭleńnia padatkaabkładańnia fizičnych asob MPZ Iryna Kryvaroščanka.
Źmieny, u vypadku ich pryniaćcia, buduć raspaŭsiudžvać svaju moc na pravaadnosiny, jakija ŭźnikli z 1 studzienia 2015 hoda. To bok, kali dakumient ustupić u siłu paźniej, čym nieabchodna budzie vypłacić padatak, to možna budzie atrymać viartańnie vypłačanaha zboru.
Ab uviadzienni svojeasablivaj «adterminoŭki» pa vypłacie padatku na darmajedstva dla chatnich haspadyń, jakija nidzie nie pracujuć i vychoŭvajuć dziaciej, MPZ paviedamlała jašče ŭ śniežni minułaha hoda. Vyzvalić takich žančyn ad zboru źbiralisia da taho momantu, pakul małodšamu dziciaci nie spoŭnicca 10 hadoŭ.
Zaraz ad vypłaty padatku na darmajedstva vyzvalenyja šmatdzietnyja maci i tyja, chto vychoŭvaje dziaciej va ŭzroście da 7 hadoŭ, a taksama žančyny, jakija dahladajuć za dziciom-invalidam va ŭzroście da 18 hadoŭ.
Razam z maci vyzvalić ad padatku na darmajedstva źbirajucca ludziej, jakija majuć asabistyja padsobnyja haspadarki. «Da nas časta stali źviartacca ludzi, jakija majuć ziamielny ŭčastak, pryznačany dla absłuhoŭvańnia žyłoha doma. Jany pracujuć na hetaj ziamli, zajmajucca raślinavodstvam. I jany nie razumiejuć, čamu jon budzie płacielščykam zboru?» Heta budzie tyčycca ŭsich biełarusaŭ. Nie tolki tych, chto žyvie ŭ sielskaj miascovaści. Heta značyć, dačniki taksama nie buduć płacić padatak.
Zaraz prysiadzibny ŭčastak vyzvalaje ad vypłaty padatku tolki žycharoŭ sielskich nasielenych punktaŭ i pasiołkaŭ haradskoha typu, tłumačyli raniej u MPZ.
— Kali hramadzianie 183 dni i bolš u kalandarnym hodzie buduć zarehistravany ŭ sielskim nasielenym punkcie abo pasiołku haradskoha typu, pry hetym jany viaduć asabistuju padsobnuju haspadarku na ziamielnym učastku, pryznačanym mienavita dla hetych metaŭ, to ich pryznajuć udzielnikami ŭ finansavańni dziaržaŭnych vydatkaŭ. U takim vypadku abaviazak pa vypłacie zboru ŭ ich adsutničaje, — adznačali ŭ MPZ.
Pry hetym amal 4 tysiačy biełarusaŭ pryznalisia ŭ darmajedstvie zahadzia — dziela 10-pracentnaj źnižki na padatak. Takim ludziam užo naličyli 1 miljon 10 tysiač rubloŭ padatku. Samastojna biełarusy mahli paviedamić u padatkovuju inśpiekcyju ab tym, što nidzie nie pracavali ŭ minułym hodzie i nie płacili padatki, da 31 traŭnia, a vypłacić zbor pavinny byli nie paźniej za 1 lipienia.
Da 1 žniŭnia pavinny padrychtavać śpis tych, chto budzie apłacić padatak za minuły hod. Ale pakul što niama navat papiarednich acenak taho, kolki heta budzie čałaviek. Pa słovach pradstaŭnika MPZ, da 15 lipienia ŭsie dziaržaŭnyja orhany pavinny pradstavić u padatkovuju infarmacyju pra biełarusaŭ, jakija ŭ 2015 hodzie sapraŭdy ŭdzielničali ŭ finansavańni dziaržvydatkaŭ. Heta zrobiać, kab vyklučyć «hetych hramadzian z patencyjnych płacielščykaŭ zboru». Paśla hetaha śpiecyjalisty MPZ składuć śpis tych, chto ŭdzielničaŭ u finansavańni dziaržvydatkaŭ u minułym hodzie mienš za 183 dzion. Zatym darmajedami razašluć listy z paviedamleńniem apłacić padatak.
Ale ŭ padatkovaj padkreślivajuć, što nie varta pałochacca takoha paviedamleńnia. «Atrymańnie takoha paviedamleńnia nie źjaŭlajecca 100-pracentnym paćviardžeńniem, što treba płacić padatak, — tłumačyć Iryna Kryvaroščanka. — U čałavieka jość prava patłumačyć žyćciovyja abstaviny, jakija składvalisia ŭ jaho ŭ 2015 hodzie. Mahčyma, my nie mieli infarmacyju pra jaho ŭdzieł u finansavańni dziarždvydatkaŭ».
Naprykład, padatkaviki «nie bačać» infarmacyju pra biełarusaŭ, jakija adpravilisia na zarobki ŭ krainy JEAES, a taksama pra tych ža chatnich haspadyń, jakija vychoŭvajuć dziaciej da 7 hadoŭ. Tamu hetym katehoryjam hramadzian rekamiendujuć paviedamić ab svaich zaniatkach u rajonnuju padatkovuju inśpiekcyju, kab spraścić pracu padatkavikam i nie atrymać z-za niedachopu infarmacyi ŭ padatkavikoŭ paviedamleńnie na spłatu zboru.
Darečy, kali čałaviek žyŭ u Biełarusi, ale pry hetym pracavaŭ addalena na zamiežnuju kampaniju i zapłaciŭ u krainie-rezidencie padatki, to treba pradstavić paćvierdžańnie hetaj vypłaty. Jana pojdzie ŭ zalik zboru, i taki čałaviek darmajedam ličycca nie budzie.
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie6
Kamientary