Namieśnik ministra zamiežnych spraŭ Ukrainy Alena Zierkal zajaviła, što Ukraina admoviłasia zadavolić prapanavanuju RF kandydaturu na pasadu novaha pasła. Pra heta paviedamlaje «5 kanał».
Pavodle jaje słoŭ, pytańnie ab pryznačeńni novaha pasła «źniataje z paradku dnia» pa inicyjatyvie Ukrainy. «Prynamsi, tak, jak jano było pastaŭlenaje — jano źniata z paradku dnia», — cytuje Zierkal «Ukrainskaja praŭda».
Na dumku namieśnika ministra, adsutnaść va Ukrainie rasijskaha pasła nie paŭpłyvaje na raźvićcio adnosin pamiž krainami. «My taksama limitavany ŭ mahčymaściach narmalnaj pracy ŭ RF, tamu ja dumaju, što heta nijak nie paŭpłyvaje, uličvajučy, što rola papiaredniaha pasła RF u farmiravańni adnosin była minimalnaj», — pieradaje słovy Zierkal TASS.
Pres-sakratar prezidenta RF Dźmitry Piaskoŭ na prośbu RBK prakamientavać zajavu Zierkal zajaviŭ, što jamu «pakul niama čaho dadać da skazanaha raniej».
29 lipienia Rasija zaprasiła va Ukrainy papiaredniuju zhodu (hetak zvany ahreman) na pryznačeńnie ambasadaram Michaiła Babiča. Dniom 3 žniŭnia Dźmitry Piaskoŭ paviedamiŭ žurnalistam, što jamu «pakul niama čaho skazać» pra toje, ci dała Ukraina zhodu.
Pasoł RF va Ukrainie Michaił Zurabaŭ byŭ zvolnieny z pasady 28 lipienia. Jon zajmaŭ jaje ad 2009 hoda. Paźniej stała viadoma, što ŭ Dziarždumu ŭniesiena kandydatura paŭnamocnaha pradstaŭnika prezidenta RF u Pryvołžskaj fiederalnaj akruzie Michaiła Babiča.
Ukraina adklikała svajho pasła Uładzimira Jelčanka dla kansultacyj u sakaviku 2015 hoda. U śniežni jon byŭ pryznačany pastajannym pradstaŭnikom Ukrainy ŭ AAN. Novy pasoł pryznačany nie byŭ.
Biełarusy sustrakajuć vyzvalenych palitviaźniaŭ u Vilni FOTY i VIDEA3
Kamientary