Parłamienckija vybary najčaściej cikavyja nie stolki svaimi vynikami, jakija ŭ asnoŭnym pradkazalnyja, a bijahrafičnymi źviestkami kandydataŭ u deputaty. Heta redkaja mahčymaść zazirnuć za tajamnicu, kolki aficyjna zarablajuć dziaržaŭnyja čynoŭniki i siłaviki, bo ŭsie pretendenty musiać publikavać dekłaracyju ab dachodach hadavoj daŭniny.
Sioleta kandydatami zarehistravanyja adrazu dvoje čałaviek miescam pracy jakich źjaŭlajecca Kamitet dziaržaŭnaj biaśpieki (KDB).
Pa Homielskaj-Jubilejnaj akruzie №31 bałatujecca načalnik Instytuta nacyjanalnaj biaśpieki Ivan Korž.
U svoj čas Korž uznačalvaŭ Homielskaje i Hrodzienskaje adździaleńni KDB. Homielski etap pracy Karža zapomniŭsia šmatlikimi sprobami viarboŭki apazicyjanieraŭ. Ni da, ni paśla ŭ presu nie pratočvałasia stolki padobnaj infarmacyi.
Kali ŭ Homielskaj vobłaści razharełasia «palaŭničaja sprava» suprać milicyjantaŭ, to byli praviedzienyja pieratrusy ŭ žurnalistak: Kalinkinaj, Koktyš, Radzinaj, Chalip. Pieratrusy pravodzilisia ŭ spravie «abrazy Ivana Karža».
U Hrodzienskaj vobłaści Ivan Korž taksama adznačyŭsia. U čas jaho kiraŭnictva byŭ aryštavany žurnalist Andrej Pačobut za abrazu honaru Alaksandra Łukašenki. Taksama mienavita Hrodzienskaje ŭpraŭleńnie KDB inicyjavała praces, u jakim ekstremisckim byŭ pryznany albom «Pres-fota».
Ciapier Karža adpraŭlajuć u parłamient. Dachody Ivana Karža letaś skłali 338 miljonaŭ rubloŭ. Heta značyć, što ŭ siarednim u miesiac jon mieŭ 28 miljonaŭ.
Supiernikam Ivana Karža pa akruzie budzie piensijanier milicyi, siabar Abjadnanaj hramadzianskaj partyi Uładzimir Niapomniaščy.
Jašče adzin kadebist vyłučajecca ŭ deputaty pa Minskaj vobłaści. U Biarezinskaj akruzie №61 kandydatam zarehistravany namieśnik načalnika ŭpraŭleńnia KDB pa Minsku i Minskaj vobłaści Piatro Atroščanka.
Jahony dachod letaś skłaŭ zvyš 288 miljonaŭ rubloŭ, heta značyć u siarednim u miesiac jon mieŭ 24 miljony rubloŭ.
Kankurenty Atroščanki mieli letaś nie bolš za 49 miljonaŭ rubloŭ, heta značyć u siarednim u miesiac kala 4 miljonaŭ rubloŭ.
Kamientary