«Ja ščyry i sumlenny» — Aleś Łahviniec choča ačolić ruch «Za svabodu»
Namieśnik staršyni ruchu «Za svabodu» Aleś Łahviniec maje namier vyłučacca na pasadu staršyni ruchu na spravazdačna-vybarčaj kanferencyi, jakaja zaplanavanaja na kastryčnik.
Namier uznačalić arhanizacyju palityk abviaściŭ na presavaj kanferencyi 13 vieraśnia pra vyniki vybaraŭ u Biełarusi.
«Moj udzieł u vybarach pakazaŭ, što ja zdolny pašyrać zonu svabody ŭ Biełarusi», — skazaŭ pra siabie palityk.
Da svaich arhanizacyjnych i palityčnych vartaściaŭ jon dadaŭ viedańnie zamiežnych movaŭ, naradžeńnie synoŭ i toje, što jak vykładčyk padrychtavaŭ sotni studentaŭ.
Svoj namier palityk paćvierdziŭ u adkrytym liście, apublikavaŭšy jaho ŭ Fejsbuku.
«Ja dobra adčuvaju nastroi ludziej, ja rablu toje, u što vieru, ja ščyry i sumlenny čałaviek i zdolny aktyŭna i adkryta vieści hramadzka-palityčnuju dziejnaść biaz štučnaści i kambinavańnia, ja maju adpaviednuju adukacyju, prafesijnyja dasiahnieńni i viedaju eŭrapiejskija movy, ja hanarusia tym, što sotni maich studentaŭ udziačnyja mnie za atrymanyja ad mianie viedy i navyki, tamu ja budu vyłučać svaju kandydaturu na pasadu Staršyni Ruchu «Za Svabodu» i hatovy być jaho lideram i kandydatam numar 1 va ŭsich bližejšych vybarčych kampanijach.
Mnie budzie za honar adstojvać kaštoŭnaści, na jakich pabudavany naš ruch — svaboda, nacyjanalnaje adradžeńnie i eŭrapiejskaść».
Aleś Łahviniec prosić padtrymać post tych, chto ličyć, što jon varty być staršyniom ruchu «Za svabodu».
Aleś Łahviniec sprabavaŭ balatavacca ŭ deputaty ŭ Sucharaŭskaj vybarčaj akruzie Miensku, ale nia byŭ zarehistravany za raspaŭsiud drukavanaj pradukcyi padčas zboru podpisaŭ, što vybarčy zakon zabaraniaje. Łahviniec pryznaje, što razdavaŭ vybarcam svaje vizytoŭki, zaprašeńni na kancert muzyki Lavona Volskaha i hazetu «Narodnaja Vola», ale nia ličyć hetuju pradukcyju źviazanaj z vybarami. Padčas vybaraŭ Aleś Łahviniec byŭ naziralnikam na vybarčym učastku № 347 i śćviardžaje, što ŭ dzień asnoŭnaha hałasavańnia tam brali ŭdzieł u vybarach tolki 355 čałaviek, choć kamisija adrapartavała pra jaŭku 506 hramadzianaŭ.
«Adbyŭsia čarhovy ździek ź ludziej i padman», — skazaŭ pra minułyja vybary Aleś Łahviniec.
Kamientary