«Snajpierku z Barysava» ŭsio ž zabili, — śviedčańnie byłoha bajevika «ŁNR»
Natalla Krasoŭskaja z Barysava, jakaja vajavała na baku sieparatystaŭ, zahinuła na Danbasie nie paźniej za 2015 hod.
Hetuju infarmacyju Svaboda atrymała ad byłoha bajevika «ŁNR» Kanstancina Fafanava, jaki žyvie ciapier u Barysavie.
Pavodle Fafanava, na Danbasie jon paznajomiŭsia z tryma biełarusami z Barysava.
«Ja ź imi tolki na Danbasie paznajomiŭsia, da vajny my byli nie znajomyja. Adzin chłopiec viarnuŭsia, jon ź Piečaŭ byŭ, — małady, hadoŭ 30. A dziaŭčyna zahinuła», — kaža Fafanaŭ.
Na ŭdakładnieńnie karespandenta Svabody, ci idzie ŭ hetym vypadku havorka pra snajperku Natallu Krasoŭskuju, Fafanaŭ paćvierdziŭ: «Tak, zdajecca». Dakładny čas, kali jana była zabitaja, eks-bajavik pryhadać nia zmoh, ale padkreśliŭ, što heta zdaryłasia nie paźniej za 2015 hod.
Natalla Krasoŭskaja — ci nie samaja viadomaja biełaruskaja hramadzianka, jakaja vajavała na baku prarasiejskich separatystaŭ na Danbasie. Jana źjaviłasia tam jašče ŭ traŭni 2014 hodu, vajavała pad Słavianskam.
Krasoŭskaja nieadnojčy zapisvała svaje videazvaroty i vykładvała ich na YouTube. U adnym z apošnich rolikaŭ, jašče ŭ žniŭni 2014 hodu, jana skazała, što joj pierastaŭ padabacca Alaksandar Łukašenka, «bo jon padtrymlivaje Parašenku». «Ciapier kali ja pryjedu ŭ Biełaruś, to tolki sa zbrojaj», — abiacała separatystka.
Niekalki razoŭ u internecie źjaŭlałasia infarmacyja pra jaje hibiel, jakaja potym abviarhałasia.
Dakładna možna skazać, što jana była žyvaja jak minimum da kastryčnika 2014-ha: tady apošni raz źjaviłasia na publicy, na mitynhu ŭ Maskvie ŭ padtrymku «Navarosii». Ukrainskija krynicy pisali, što ŭ žniŭni 2015 hodu jaje nibyta bačyli na froncie pablizu Novaazoŭsku. Značna paźniej u sacyjalnych sietkach źjaviłasia infarmacyja, što jana zahinuła ŭ vieraśni 2015-ha, ale nijakich dokazaŭ nie było.
Kamientary