«Heta i jość tvaja radzima». 13 pravił žyćcia ŭ emihracyi ad Julii Čarniaŭskaj

Žyćcio na čužynie. Maje nazirańni, praviły i sproby ich vykonvać.

1. U lubym, samym maleńkim, samym standartnym žylli abstaluj sabie kutok utulnaści. Niachaj heta budzie kresła abo kanapa z pryviezienym z domu starym pledam. Abo niekalki fatahrafij na ścianie. Abo nastolnaja lampa žoŭtaha śviatła. Abo palica z knihami i lubimaj puściakovinaj. Abo prosta cacka, na jakuju ty hladziš. Niachaj heta budzie vyspa tvajho spakoju rodam ź minułaha. Emihracyja — heta pryncypovy minimalizm, unifikacyja, usio funkcyjanalna, dyk voś, niachaj budzie niešta niefunkcyjanalnaje i rodnaje.

2. Karystajsia tym, što dadziena i raduje. Tannymi łoŭkostami, kaladnymi kirmašami, biaspłatnymi mierapryjemstvami: ich proćma, pačynajučy ź letnich džazavych kancertaŭ na płoščy i vuličnych teatraŭ, zakančvajučy biaspłatnymi muziejnymi dniami.

3. Vučy movu. Nie saromiejsia havaryć na joj, niachaj łamanaj, ale nie saromiejsia. (Ja saromiejusia, ale heta pamyłka. Tamu ŭsio adno havaru z kožnym, chto havoryć sa mnoju). Razumieju, što ty napružany i naściarožany, ale žyć u napružańni i naściarožanaści nielha. Small talk z tymi susiedziami, jakija da hetaha adkrytyja — nieabchodny minimum. Tut dapamahaje sabaka. Darečy, radujsia, što z sabakam možna ŭ kramu, u kaviarniu, na poštu i apteku.

4. Šukaj i znachodź ulubionyja miescy ŭ horadzie. Heta budzie pašyreńnie vyspy spakoju vonki. Dla mianie heta varšaŭskija parki. Tak pastupova spakojnaje pryniaćcie achopić uvieś horad.

5. Zajmajsia tym, čym zvyk doma. Abjadnoŭvaj minułaje i novaje. Nie kidaj sport. Čytaj knižki na novaj movie. Chadzi na kancerty. Zaŭsiody možna znajści miescy z tannymi kvitkami. Tym samym ty zastaješsia ŭ zvykłym intelektualnym śviecie — i adnačasova ŭ śviecie čužym.

6. Kali ty vymušany pracavać na fizičnaj pracy, vykarystoŭvaj svaju prafiesiju chacia b jak chobi. Viedaju ludziej, jakija paśla ciažkaj pracy repietujuć pjesu — i ŭ hety čas žyvuć poŭnym, nasyčanym žyćciom. Pra mastakoŭ i paetaŭ užo nie kažu. Nie stračvaj prafiesii — jana tabie jašče spatrebicca.

7. Nie saromiejsia svajho emihranckaha statusu. Uciekačami byli nie tolki Ejnštejn i Šahał, ale i Maryja ź Jazepam.

8. Stvary ciopłaje koła svaich pobač — tych, kaho možna spantanna paklikać na pirahi z harbataj. Žyvi «pašyranaj siamjoj»: siabroŭstva tut značna ščylniejšaje i ciaplejšaje, čym doma. Lubi hetych ludziej usim sercam. Heta tvaja radzima.

9. Dapamahaj tym, chto apynuŭsia tut niadaŭna i razhubleny: dapamahać — heta adno z asnoŭnych čałaviečych pamknieńniaŭ. Nie dušy jaho ŭ sabie — šmat straciš.

10. Kali ty ŭ siłach padarožničać — padarožničaj abaviazkova. Nie adkładaj na potym. Svaboda pieramiaščeńnia — adnaja z hałoŭnych svabod čałavieka. A łoŭkosty i tannyja chosteły nichto, na ščaście, nie skasavaŭ.

11. Nie łaj novuju krainu — navat unutry siabie. Viedaju ludziej, jakija svajo žyćcio pabudavali na antypatyi da Polščy i palakaŭ. Z supadzieńnia ci nie, heta vielmi nieščaślivyja ludzi, navat kali paraŭnalna paśpiachovyja.

12. Dadaj da svaich i tutejšyja śviaty i radujsia im. Usie hetyja kaladnyja zorki, śviečki adventu, vielikodnyja zajčyki, pracesii Božaha cieła… Niachaj ty i nie katalik. Harbuzy — niachaj ty i nie jazyčnik. (Dla mianie heta jašče i prajdy — tak ja padtrymlivaju siabroŭ). I tak, jalinka, abaviazkova jalinka!

13. Kłapacisia pra svajo, biełaruskaje, u samych roznych śfierach. U ciabie źjaviłasia nie tolki identyčnaść uciekača. U ciabie pavinna vyraści identyčnaść čalca dyjaspary. Heta važnaja funkcyja. I pry hetym nie ŭdzielničaj u zvadach dyjaspary: jany ad pustaty, a tvajo žyćcio pavinna być maksimalna poŭnym. Zyču tabie (i sabie) hetaha ŭ novym hodzie!

• 40
• 3
• 3
• 4
• 0
• 1
• 0
• 2