Rasija nakłała vieta na rezalucyju AAN pa Siryi, Kitaj ustrymaŭsia

Rasija nakłała vieta ŭ Radzie biaśpieki AAN na prajekt rezalucyi pa Siryi, padrychtavany Francyjaj, paviedamlaje Reuters.

Pavialičyć

Vystupajučy na pasiadžeńni pastajanny pradstaŭnik Rasii pry AAN Vital Čurkin zajaviŭ, što ni adzin z vyniesienych na hałasavańnie ŭ Radu biaśpieki AAN prajektaŭ rezalucyi nie budzie pryniaty. Jon nazvaŭ hałasavańnie pa dźviuch rezalucyjach pa Siryi «adnoj z samych dziŭnych mizanscen» u historyi Rady biaśpieki AAN, paviedamlaje «RIAN».

U kamientary MZS Rasii, apublikavanym na aficyjnaj staroncy ŭ fejsbuku, havorycca, što tekst rezalucyi «hruba skažaŭ realnaje stanovišča spraŭ, nasiŭ palityzavany, niezbałansavany i adnaboki charaktar». Maskva śćviardžaje, što ŭ prajekcie vina za eskałacyju kanfliktu ŭ Siryi ŭskładałasia na ŭłady krainy.

«Pry hetym rabiłasia adkrytaja sproba, zabaraniŭšy paloty avijacyi ŭ rajonie Alepa, zabiaśpiečyć prykryćcio terarystam «Džabchat an-Nusry» i bajevikam, jakija ź imi źlilisia, niahledziačy na abaviazacielstvy dziaržaŭ—siabroŭ AAN zmahacca z terarystyčnaj pahrozaj usimi najaŭnymi srodkami», — havorycca ŭ paviedamleńni.

MZS Rasii taksama śćviardžaje, što «humanitarny kryzis u Alepa byŭ spravakavany štučna, kali ŭ žniŭni i vieraśni bajeviki admovilisia prapuskać humanitarnyja kanvoi i hrazilisia adkryvać pa ich ahoń». Tym nie mienš, Maskva adznačaje «svaju ćviorduju prychilnaść pošuku doŭhaterminovaha palityčnaha vyrašeńnia siryjskaha kanfliktu» i škaduje ab niaŭdałych sprobach urehulavańnia siryjskaha kanfliktu.

U toj ža čas Rada biaśpieki AAN nie pryniała i rasijski varyjant rezalucyi pa Siryi, pieradaje Reuters. Prajekt prapanoŭvaŭ usim bakam vykonvać rasijska-amierykanskija damoŭlenaści, jakija byli dasiahnutyja 9 vieraśnia. Rasijski tekst atrymaŭ tolki čatyry hałasy ŭ padtrymku, 9 krain vykazalisia suprać i dźvie krainy ŭstrymalisia.

Raniej prezident Francyi Fransua Aland papiaredziŭ pra nastupstvy, jakija ŭźniknuć u vypadku niepryniaćcia rezalucyi, padrychtavanaj Paryžam.

«Kraina, jakaja nakładzie vieta na hetuju rezalucyju, budzie dyskredytavanaja ŭ vačach usiaho śvietu. Jana budzie nieści adkaznaść za biasčynstvy, jakija praciahvajucca», — pryvodziła słovy Alanda hazieta Le Figaro.

Ahienctva pieradaje, što heta ŭžo piaty raz, kali Rasija nakłała vieta na rezalucyi pa Siryi. Papiarednija čatyry razy pazicyja Maskvy była padmacavanaja Kitajem, adnak u hety raz Kitaj ustrymaŭsia ad hałasavańnia. Usiaho za prajekt rezalucyi prahałasavali 11 z 15 siabroŭ Rady biaśpieki.

• 0
• 0
• 0
• 0
• 0
• 0
• 0
• 0