Šosty fiestyval biełaruskaha kino «Bulbamovie» projdzie ŭ vialikim minskim kinateatry
U Minsku ad 21 kastryčnika ŭ art-kinateatry «Tytan» (pr-t Dziaržynskaha, 104) raspačniecca fiestyval novaha biełaruskaha kino «Bulbamovie».
Na ŭdzieł u «Bulbamovie-2016» było padadziena 64 zajaŭki (hod tamu było 47). Cikavaść da kinafiestyvalu z kožnym hodam raście jak u aŭtaraŭ, tak i ŭ hledačoŭ.
Polska-biełaruskaje žury adabrała 24 filmy konkursnaj prahramy: 12 mastackich, 5 dakumientalnych i 7 animacyjnych. Akramia konkursnych filmaŭ, płanujecca dźvie pazakonkursnyja premjery: dakumientalnaja stužka «Biełaruskija pieśni: tradycyja adlehłaści» (režysior Arciom Łobač) i mastacki kinaalmanach «Chranatop. Tanatas i Eras».
Uznaharody sioleta adpaviadajuć adabranym filmam i majuć try naminacyi: mastackaje kino, dakumientalnaje kino i animacyja. Asobna budzie prysudžany pryz za najlepšy huk i pryz hladackich simpatyj.
Taksama arhanizatary prezientavali svojeasablivuju statuetku, jakaja simvalizuje pieramohu i tarku dla bulby:
Fiestyval praciahniecca try dni, u apošni dzień dla tych, chto nie patrapiŭ, budzie paŭtorny pakaz filmaŭ-pieramožcaŭ. Kvitki na fiestyval možna nabyć užo siońnia ŭ kasach kinateatra.
«Bulbamovie» — štohadovy fiestyval novaha biełaruskaha kino, jaki ŭźnik pa inicyjatyvie polskaha biełarusa Januša Haŭryluka pry padtrymcy polskich i biełaruskich kinarežysioraŭ i kinakrytykaŭ. Pieršapačatkova prachodziŭ u Varšavie, ź minułaha hodu — jašče i ŭ Minsku. Fiestyval stymuluje ekranny pošuk niezaležnych biełaruskich aŭtaraŭ i kino i pašyraje mižnarodnyja kantakty kiniematahrafistaŭ.
Kamientary