U sudzie Centralnaha rajona Minska 28 kastryčnika vynieśli prysud pa hučnym DTZ: u krasaviku daišnik pasprabavaŭ zatrymać matacyklista, a toj — vypadkova ci nie — pajechaŭ. U vyniku milicyjant pravioŭ u komie 1,5 miesiaca, a kiroŭca matacykła čakaŭ prysudu ŭ SIZA.
fota Iryny Arachoŭskaj
U vyniku 31-hadovaha matacyklista Siarhieja Šaŭcova pryznali vinavatym u supraciŭleńni supracoŭniku milicyi i parušeńni PDR asobaj, jakaja kiravała transpartnym srodkam, što paciahnuła pa nieaściarožnaści pryčynieńnie ciažkaha cialesnaha paškodžańnia.
Sudździa Valeryj Jeśman vyrašyŭ, što matacyklist atrymaje 5 hadoŭ pazbaŭleńnia voli ŭ kałonii ahulnaha režymu, plus — budzie pazbaŭleny prava kiravać transpartnymi srodkami na 5 hadoŭ.
Paciarpieły inśpiektar Uładzimier Taŭpiniec prasiŭ sud, kab bajkier spłaciŭ jašče 50 tysiač rubloŭ maralnaj škody. Hety pazoŭ sudździa Jeśman zadavoliŭ častkova — daišnik atrymaje 30 tysiač.
Samo DTZ adbyłosia 18 krasavika. Na rahu praśpiekta Niezaležnaści i praśpiekta Mašerava supracoŭnik DAI padyšoŭ da bajkiera na spartovym matacykle, jaki stajaŭ na śvietłafory, i zapatrabavaŭ pakazać dakumienty. Nahodaj stała adsutnaść na matacykle rehistracyjnych znakaŭ. Što adbyłosia dalej, dakładna nieviadoma. Vidavočcy kazali, što matacyklist rezka startanuŭ ź miesca, a inśpiektar schapiŭsia za rul. Milicyja śćviardžaje, što matacyklist začapiŭ inśpiektara i paciahnuŭ za saboj. Matacyklist zajaŭlaŭ, što daišnik rezka schapiŭ jaho za ruku, i jon vypadkova nacisnuŭ na haz. Tym časam zaharełasia zialonaje śviatło dla aŭtamabilaŭ, jakija jechali pa praśpiekcie Niezaležnaści. Kiroŭca aŭtamabila ź inkasatarami nie bačyŭ matacyklista ź inśpiektaram i pačaŭ ruchacca. Adbyłosia sutyknieńnie, u jakim ciažka paciarpieŭ daišnik.
46-hadovy inśpiektar pieranios niekalki apieracyj, u tym liku i trepanacyju čerapa, paŭtara miesiaca jon byŭ u komie.
Kamientary