Biełaruś atrymała ad Rasii jašče čatyry vučebna-bajavyja samaloty Jak-130
23 listapada ŭ Lidzie prajšli ŭračystyja mierapryjemstvy z nahody atrymańnia lotčykami i technikami 116-j hvardziejskaj šturmavoj aviacyjnaj bazy čatyroch novych vučebna-bajavych samalotaŭ Jak-130.Pra heta paviedamiŭ aficyjny sajt Minabarony Biełarusi.
Heta apošnija čatyry Jak-130, jakija Biełaruś zamoviła rasijskaj karparacyi «Irkut». Takim čynam, usiaho biełaruskija VPS atrymali 8 mašyn Jak-130.
Jak-130, jak piša sajt biełaruskaha abaronnaha viedamstva, adziny ŭ śviecie vučebny samalot, u jakim aeradynamičnaja kampanoŭka i lotna-techničnyja charakterystyki dahukavoha palotu anałahičnyja sučasnamu reaktyŭnamu źniščalniku. Mašyna, pavodle Minabarony, dazvalaje vieści padrychtoŭku lotčykaŭ dla ekspłuatacyi pierśpiektyŭnych samalotaŭ apošniaha 5-ha pakaleńnia. Pakul što adzinaja kraina vyrablaje i maje na ŭzbrajeńni samaloty piataha pakaleńnia — heta amierykanskija źniščalniki F-22 i F-35.
Biełaruś raniej vykarystoŭvała dla padrychtoŭki piłotaŭ češskija samaloty L-39, vytvorčaść jakich pačałasia jašče ŭ 1968 hodzie. Ličycca, što značna bolš sučasnyja Jak-130 buduć lepš padychodzić dla navučańnia lotčykaŭ XXI stahodździa. Plus pry patrebie Jak-130 moža ŭziać na bort da 3000 kh roznaha avijacyjnaha strałkovaha, rakietnaha i bombavaha ŭzbrajeńnia.
Jak-130 byŭ raspracavany rasijskimi inžynierami ŭ supracoŭnictvie ź italjanskaj kampanijaj Aermacchi, adnak na zaviaršalnym etapie raspracoŭki italjancy vyjšli z partniorstva. Aermacchi atrymała ŭsiu kanstruktarskuju i techničnuju dakumientacyju na płanior samalota i zrabiła na hetaj bazie svaju ŭłasnuju mašynu dla treniroŭki lotčykaŭ — M-346.
Kamientary