U chłopca admovilisia pryniać na pašpart fota z vyšyvankaj. A paśla…

Miesiac tamu vyrašyŭ pamianiać pašpart, bo skončylisia staronki ŭ im. Jak prahresiŭny małady čałaviek pahladzieŭ usio zahadzia na aficyjnych staronkach adździełu pa hramadzianstvu i mihracyi, znajšoŭ što z saboj brać, a što nie brać, jakija zdymki rabić (4 na 5), a jakija nie rabić (9 na 12) i h.d. Dy ŭ niejki momant padumaŭ: što ja za bejbus taki, treba ž pryhožym vyhladać na zdymku. I vyrašyŭ u vyniku sfatahrafavacca ŭ vyšyvancy (dziakuj LSTR Adzieńnie za jaje). Prychodžu ŭ raźlikova-daviedačny centr uvieś taki rasfufyrany i zadavoleny tym, što ciapieraka budu pryhožym u pašparcie i pry luboj nahodzie ŭsim zamiežcam pakazvać, kab adrazu razumieli, jaki žuk pierad imi staić. Karaciej, biez prablem zdaŭ usie dakumanty, i navat z pašpartystkami miła parazmaŭlaŭ pra toje, jakaja pryhožaja biełaruskaja mova, i što treba na joj čaściej usim razmaŭlać. Skazali adzin adnamu na raźvitańnie «Da pabačeńnia» dy hodzie. Padumaŭ ja, što sprava zroblena. Aha, jak-by nie tak.

Prychodžu praz 3 dni, kab zabrać nazad pašpart, bo tam viza dziejučaja. A mnie zamiest pašpartu, usie dakumanty sujuć i kažuć:

— Nie pryniali vašyja papierki.

Ja ažno prysieŭ:

— Jak nie pryniali?

— Dy voś, skazali, što prablema ŭ zdymku…

— Dyk a što ź im nie tak?

— Napeŭna, ŭ kašuli vašaj, što z arnamientam…

Jak tolki pieršaje pačućcio niespraviadlivaści adpuściła, vyrašyŭ navažyć na svaim i pierajści ŭ nastup, kab dali mnie bolš uciamnaje tłumačeńnie ŭ admovie dyj jašče sa spasyłkami na narmatyŭnyja akty. Ale ničoha kankretnaha tak i nie pačuŭ, akrom jak adsyłku da patrabavańnia pad nazvaj «na zdymku pavinna adsutničać niezarehistravanaja simvolika». Čamu biełaruski arnamient ličycca niezarehistravanaj simvolikaj, ja tak i nie zrazumieŭ. Tamu vyrašyŭ pajechać u strukturu pavyšej, u sam rajonny adździeł pa hramadzianstvu i mihracyi.

I što vy dumajecie, tam miascovyja specyjalisty mnie skazali toje samaje, ale ŭžo vynieśli razdrukavany narmatyŭny dakumant, dzie pakazali [tut zaraz budzi doŭhi tekst užo jurydyčnaha charaktaru] p.7 raździeła «Techničnyja patrabavańni da fotazdymkaŭ dla pašpartoŭ» Pastanovy Ministerstva ŭnutranych spraŭ Respubliki Biełaruś ad 28.06.2010 N 200 «Ab zaćviardžeńni Instrukcyi ab paradku arhanizacyi pracy padraździaleńniaŭ pa hramadzianstvie i mihracyi orhanaŭ unutranych spraŭ pa vydačy, uliku, abmienu, pryznańni niesapraŭdnym, kanfiskacyi, zachoŭvańni i źniščeńni pašparta hramadzianina Respubliki Biełaruś», dzie napisana, što «nie dapuskajecca najaŭnaść na tvary, šyi, pradmietach adzieńnia fatahrafujemaha (u miežach trafareta dla fotadruku) simvoliki, nie zarehistravanaj va ŭstanoŭlenym paradku (akramia juvielirnych vyrabaŭ i bižuteryi)». Ale patłumačyć, čamu biełaruski arnamient ličycca niezarehistravanaj symbolikaj, mnie iznoŭ nie zmahli. Na žal, na toj momant načalnika adździełu taksama nie było. U vyniku vyrašyŭ napisać elektronny zvarot.

Pokul pisaŭ svoj zvarot, niekalki razoŭ dumaŭ pra toje, jak dobra, što ŭ nas jašče nie adabrali takuju mahčymaść. Spadziajusia i nie admieniać pa toj pryčynie, što ŭ čynoŭnikaŭ heta adbiraje ŭvieś pracoŭny čas, a treba ž jašče i krainaj kiravać, a nie papiarovaj pracaj zajmacca. U vyniku napisaŭ maleńki tekst na staronku A4 šryftom tajms ńju roman i pamieram 12, ale ciapier adasłaŭ adrazu ŭ dźvie instancyi: rajonny i haradski adździeły pa hramadzianstvu i mihracyi.

I voś jakaja raźviazka atrymałasia: mienš čym praz tydzień akurat pierad samymi śviatami patelefanavaŭ načalnik rajonnaha adździełu i paviedamiŭ, što maja sprava vyrašana, a ŭsie vinavatyja padnačalenyja pakarany, bo jaki narmalny čałaviek budzie ličyć vyšyvanku niezarehistravanaj simvolikaj? Pry hetym duža vybačaŭsia, što nie moža pa-biełarusku stasavacca i paprasiŭ pryjechać na nastupny dzień, kab pryviez im dakumanty, a jany, adpaviedna, mieli mahčymaść zrabić mnie pašpart.

Pryjechaŭ, addaŭ. Paprasili zabrać zajavu, bo na pracy kaniec hodu i va ŭsich zavał, a sama sprava ŭ pryncypie vyrašana na maju karyść. Kaniečnie, cikaviej by było pryčapić aficyjny adkaz u fb, ale ja vyrašyŭ pajści nasustrač, kab u ich pra biełaruskamoŭnych była pazityŭnaja reputacyja. Pašpart abiacali zrabić chutka.

I što my majem u vyniku?

1) rabić zdymki na pašpart u vyšyvankach nie zabaraniajecca;

2) biełaruski arnamient nie źjaŭlajecca niezarehistravanaj simvolikaj, tamu kali vam pra heta kažuć, to śmieła adkazvajcie, što ni ŭ jakich narmatyŭnych aktach MUSa hetaha niama i nie budzie (albo ŭ adździele pa hramadzianstvu i mihracyi pra heta tady ničoha nie viedajuć);

3) nie kidajcie spravu na pałovie vašaha maršrutu: viarnuli dakumienty — pišycie zapyt u vyšejstajačyja instancyi. Heta ž hłupstva jakoje, nazvać biełaruskuju vyšyvanku niezarehistravanaj simvolikaj (!).

Kali pa darozie vam sustrakajecca hara, to heta nie značyć, što treba razvaročvacca nazad albo leźci praź jaje. Mahčyma, jość bolš prosty varyjant vyrašeńnia prablemy ŭ vyhladzie tunelu. Treba prosta pravilna spytacca, jak da jaho prajści.

• 0
• 0
• 0
• 0
• 0
• 0
• 0
• 0