Top-10 biełaruskich supołak Ukantakcie, na jakija varta padpisacca
Zabarona va Ukrainie rasijskich sacyjalnych sietak padšturchnuła da dyskusii i ŭnutry Biełarusi. Ci Ukantakcie karysnaja dla nas źjava, ci naadvarot prynosić bolš škody. «Naša Niva» skłała śpis najbolš cikavych i masavych supołak Ukantakcie.
Čaj z malinavym vareńniem
127 tysiač padpisčykaŭ
Samy žyvy i aktyŭny navinny pablik biełaruskaha siehmientu Ukantakcie. Užo z samoj nazvy možna zdahadacca, što supołka iraničnaja i sarkastyčnaja. Šmat uvahi dastajecca i aŭtaru frazy pra «čaj». U čym sakret pośpiechu hetaj supołki? U prosty i zapaminalnych miemach i videa. Prykład dla mnohich, jak lohka i śmiešna možna padavać samyja surjoznyja naviny.
Maja kraina Biełaruś
106 tysiač padpisčykaŭ
U adroźnieńni ad «Čaja» hetaja supołka całkam biełaruskamoŭnaja, jana maje svaje akaŭnty ŭ inšych sacyjalnych sietkach i mesendžerach, ale nidzie nie źjaŭlajecca nastolki papularnaj, jak Ukantakcie. «Maja kraina Biełaruś» — heta svojeasablivy miks ź biahučych navin, histaryčnych cikavostak, videa ź biełarusacentryčnaj tematykaj, fotak pryhožych biełaruskich krajavidaŭ i haradoŭ. Na palitycy supołka zasiarodžvajecca nie tak šmat.
National Geographic Biełaruś
22 tysiačy padpisčykaŭ
Pra papularny časopis z takoj nazvaj čuli ŭsie, a jość jašče adnaimiennaj supołka Ukantakcie vyklučna pra našuju krainu. Kali chočacie natchnicca pryhažościami Biełarusi, to vam jaŭna siudy. Niezabyŭnyja śvitanki ŭ Haradockim rajonie, niezvyčajnyja rakursy Łošyckaha parka ci Minskaha mora, aziory, reki, lasy, zamki, kaścioły. Kali prahladaješ hetuju supołku, to ŭ hałavie krucicca, jakaja ž pryhožaja, vialikaja i roznaja naša kraina.
Sposaby vandravać amal zadarma
309 tysiač padpisčykaŭ
Usio ab akcyjach na samaloty, ciahniki i aŭtobusy. Kudy možna źlotać ź Vilni za 20 jeŭra ŭ dva baki? Albo kali nastupny rasprodaž aŭtobusnych kvitkoŭ ź Minska da Kijeva? Tut vy znojdziecie ŭsiu aktualnuju infarmacyju. Z apošniaha — u žniŭni z Varšavy možna źlotać tudy-nazad u Paryž za 26 jeŭra, a ŭ Stambuł sa Lvova — za 38. I heta nie padmanki, usie akcyi realna isnujuć. Kali vy nie baiciesia padarožničać samastojna z zaplečnikam, to vam siudy. Admietna, što sajt supołki maje biełaruskamoŭnuju nazvu Vandrouki.by.
Lit.bel.
151 tysiača padpisčykaŭ
«Prytułak dla dušy», — tak charaktaryzujuć supołku jaje stvaralniki. Jaje kancept vielmi prosty: pavierch niejkaj natchnialnaj fatahrafii kładziecca niejki vyraz. Naprykład, «Chočaš być ščaślivym — budź im». I takija niaprostyja frazy adhukajucca ŭ sercach adnačasova ŭ socień karystalnikaŭ. Łajki i reposty sypiacca adzin za adnym. Asabliva pryjemna, što heta ŭsio robicca pa-biełarusku. Supołku «Lit.bieł» možna znajści ŭ padpiskach ludziej, jakija bolej nie karystajucca nivodnym biełmoŭnym pablikam.
Kali łaska — Biełaruś
42 tysiačy padpisčykaŭ
Supołka zručnaja ŭ navihacyi. Užo pry zachodzie na staronku vam adrazu prapanujuć prajścisia pa niekalkich tehach — vieršy, muzyka, apytanki, Što? Dzie? Kali?, intelektualnaja hulnia. Z hetaha možna zrazumieć, što hrupa nakiravanaja najpierš na kulturnicki kantekst. Možacie pravieryć i siabie, voś adna z zahadak supołki: «Bieraście, Biełastok, Baranaviči, Pinsk, Vilejka, Miensk, Viciebsk, Mahileŭ, Smalensk, Homiel. U śpisie adzin horad lišni i adnaho nie chapaje, nazavicie ich!»
Art-Siadziba
6 tysiač padpisčykaŭ
Kali chočacie być u kursie apošnich kulturnickich padziej u stalicy, to supołka «Art-Siadziby» cudoŭna dapamoža vam u hetym. Samyja śviežyja naviny pra biełaruskamoŭnyja kancerty, pab-kvizy, lekcyi i dyskusii. Kožny moža abrać niešta na svoj hust.
Biełaruskaja mova — Biełorusskij jazyk
12 tysiač padpisčykaŭ
Chočaš navučycca biełaruskaj movie, ale nie viedaješ jak? Padpišysia na hetuju supołcy. U šapcy hrupy zamacavany fajł praviłami biełaruskaj punktuacyi i arfahrafii. A ŭ samoj supołcy šmat praktykavańniaŭ na pravilnaje napisańnie i vymaŭleńnie tych ci inšych słovaŭ. Jość biełaruskija zahadki, ilustracyjnyja malunki jak pa-biełarusku skazać pra toj ci inšy pradmiet. Moža być, dla stałaha karystalnika biełaruskaj movy — heta budzie i nie nadta karysnaja supołka, ale dla nieafitaŭ całkam prymalnaja.
Jeŭrapiejski futboł
3 tysiačy padpisčykaŭ
Na bujnych spartyŭnych sajtach čytać pra sport pa-biełarusku pakul niemahčyma. I «Priessboł», i «Trybuna» amal zaŭsiody addajuć pieravahu ruskaj. I tut u spravu ŭstupajuć entuzijasty. Usio ab čempijanatach Anhlii, Italii ci Hiermanii možna pačytać tut. Dla futbolnych zaŭziataraŭ, jakija nie abnaŭlajuć kožnyja piać chvilin stužku sports.ru — heta vielmi dobry varyjant daznavacca ab apošnich padziejach.
Biełaruskaja muzyka
6 tysiač padpisčykaŭ
Usie apošnija treki ajčynnych muzykantaŭ vielmi apieratyŭna vykładajucca ŭ dadzienaj supołcy. Pryčym pieravaha hrupy ŭ tym, što tut pradstaŭlena ŭsio samaje śviežaje i aktualnaje, a nie vykładajucca najlepšyja pieśni minułych hadoŭ. Kab być u kursie taho, što siońnia adbyvajecca ŭ našaj muzycy, treba abaviazkova padpisacca na hety pablik.
Naša Niva
16 tysiač padpisčykaŭ
Na supołku našaha sajta Ukantakcie padpisacca možna tut.
Ciapier čytajuć
Babaryka zajaviŭ pra viartańnie ŭ palityku i nazvaŭ vinavataha ŭ tym, što źmieny nie adbylisia ŭ 2020-m101
Kamientary