Топ-10 беларускіх суполак Укантакце, на якія варта падпісацца
Забарона ва Украіне расійскіх сацыяльных сетак падштурхнула да дыскусіі і ўнутры Беларусі. Ці Укантакце карысная для нас з’ява, ці наадварот прыносіць больш шкоды. «Наша Ніва» склала спіс найбольш цікавых і масавых суполак Укантакце.
Чай з малінавым варэннем
127 тысяч падпісчыкаў
Самы жывы і актыўны навінны паблік беларускага сегменту Укантакце. Ужо з самой назвы можна здагадацца, што суполка іранічная і саркастычная. Шмат увагі дастаецца і аўтару фразы пра «чай». У чым сакрэт поспеху гэтай суполкі? У просты і запамінальных мемах і відэа. Прыклад для многіх, як лёгка і смешна можна падаваць самыя сур’ёзныя навіны.
Мая краіна Беларусь
106 тысяч падпісчыкаў
У адрозненні ад «Чая» гэтая суполка цалкам беларускамоўная, яна мае свае акаўнты ў іншых сацыяльных сетках і мэсэнджэрах, але нідзе не з’яўляецца настолькі папулярнай, як Укантакце. «Мая краіна Беларусь» — гэта своеасаблівы мікс з бягучых навін, гістарычных цікавостак, відэа з беларусацэнтрычнай тэматыкай, фотак прыгожых беларускіх краявідаў і гарадоў. На палітыцы суполка засяроджваецца не так шмат.
National Geographic Беларусь
22 тысячы падпісчыкаў
Пра папулярны часопіс з такой назвай чулі ўсе, а ёсць яшчэ аднаіменнай суполка Укантакце выключна пра нашую краіну. Калі хочаце натхніцца прыгажосцямі Беларусі, то вам яўна сюды. Незабыўныя світанкі ў Гарадоцкім раёне, незвычайныя ракурсы Лошыцкага парка ці Мінскага мора, азёры, рэкі, лясы, замкі, касцёлы. Калі праглядаеш гэтую суполку, то ў галаве круціцца, якая ж прыгожая, вялікая і розная наша краіна.
Спосабы вандраваць амаль задарма
309 тысяч падпісчыкаў
Усё аб акцыях на самалёты, цягнікі і аўтобусы. Куды можна злётаць з Вільні за 20 еўра ў два бакі? Альбо калі наступны распродаж аўтобусных квіткоў з Мінска да Кіева? Тут вы знойдзеце ўсю актуальную інфармацыю. З апошняга — у жніўні з Варшавы можна злётаць туды-назад у Парыж за 26 еўра, а ў Стамбул са Львова — за 38. І гэта не падманкі, усе акцыі рэальна існуюць. Калі вы не баіцеся падарожнічаць самастойна з заплечнікам, то вам сюды. Адметна, што сайт суполкі мае беларускамоўную назву Vandrouki.by.
Lit.bel.
151 тысяча падпісчыкаў
«Прытулак для душы», — так характарызуюць суполку яе стваральнікі. Яе канцэпт вельмі просты: паверх нейкай натхняльнай фатаграфіі кладзецца нейкі выраз. Напрыклад, «Хочаш быць шчаслівым — будзь ім». І такія няпростыя фразы адгукаюцца ў сэрцах адначасова ў соцень карыстальнікаў. Лайкі і рэпосты сыпяцца адзін за адным. Асабліва прыемна, што гэта ўсё робіцца па-беларуску. Суполку «Літ.бел» можна знайсці ў падпісках людзей, якія болей не карыстаюцца ніводным белмоўным паблікам.
Калі ласка — Беларусь
42 тысячы падпісчыкаў
Суполка зручная ў навігацыі. Ужо пры заходзе на старонку вам адразу прапануюць прайсціся па некалькіх тэгах — вершы, музыка, апытанкі, Што? Дзе? Калі?, інтэлектуальная гульня. З гэтага можна зразумець, што група накіраваная найперш на культурніцкі кантэкст. Можаце праверыць і сябе, вось адна з загадак суполкі: «Берасце, Беласток, Баранавічі, Пінск, Вілейка, Менск, Віцебск, Магілеў, Смаленск, Гомель. У спісе адзін горад лішні і аднаго не хапае, назавіце іх!»
Арт-Сядзіба
6 тысяч падпісчыкаў
Калі хочаце быць у курсе апошніх культурніцкіх падзей у сталіцы, то суполка «Арт-Сядзібы» цудоўна дапаможа вам у гэтым. Самыя свежыя навіны пра беларускамоўныя канцэрты, паб-квізы, лекцыі і дыскусіі. Кожны можа абраць нешта на свой густ.
Беларуская мова — Белорусский язык
12 тысяч падпісчыкаў
Хочаш навучыцца беларускай мове, але не ведаеш як? Падпішыся на гэтую суполцы. У шапцы групы замацаваны файл правіламі беларускай пунктуацыі і арфаграфіі. А ў самой суполцы шмат практыкаванняў на правільнае напісанне і вымаўленне тых ці іншых словаў. Ёсць беларускія загадкі, ілюстрацыйныя малюнкі як па-беларуску сказаць пра той ці іншы прадмет. Можа быць, для сталага карыстальніка беларускай мовы — гэта будзе і не надта карысная суполка, але для неафітаў цалкам прымальная.
Еўрапейскі футбол
3 тысячы падпісчыкаў
На буйных спартыўных сайтах чытаць пра спорт па-беларуску пакуль немагчыма. І «Прессбол», і «Трыбуна» амаль заўсёды аддаюць перавагу рускай. І тут у справу ўступаюць энтузіясты. Усё аб чэмпіянатах Англіі, Італіі ці Германіі можна пачытаць тут. Для футбольных заўзятараў, якія не абнаўляюць кожныя пяць хвілін стужку sports.ru — гэта вельмі добры варыянт дазнавацца аб апошніх падзеях.
Беларуская музыка
6 тысяч падпісчыкаў
Усе апошнія трэкі айчынных музыкантаў вельмі аператыўна выкладаюцца ў дадзенай суполцы. Прычым перавага групы ў тым, што тут прадстаўлена ўсё самае свежае і актуальнае, а не выкладаюцца найлепшыя песні мінулых гадоў. Каб быць у курсе таго, што сёння адбываецца ў нашай музыцы, трэба абавязкова падпісацца на гэты паблік.
Наша Ніва
16 тысяч падпісчыкаў
На суполку нашага сайта Укантакце падпісацца можна тут.
Былы памочнік Лукашэнкі Ігар Брыло прызнаў, што набраў хабараў на $2 мільёны10
Каментары