Navukoŭcy navučylisia vyznačać, dla kaho hryp moža być śmiarotnym
Aŭstralijskija navukoŭcy vynajšli test, jaki moža vyznačyć, u jakoha pacyjenta hryp razaŭjecca ŭ śmiarotna niebiaśpiečnaje ŭskładnieńnie, naprykład, pnieŭmaniju, paviedamlaje VVS.
Heta dazvolić zahadzia akazvać ludziam nieabchodnuju dapamohu i praduchilać śmiarotnyja zychody, zajavili siońnia na staronkach European Respiratory Journal daśledčyki Uestmidskaha instytuta miedycynskich daśledavańniaŭ.
«Hryp zdolny zabić u cełym zdarovaha čałavieka ŭ samym roskvicie sił. Nichto nie moža skazać, u kaho z pacyjentaŭ jeść vysokaja ryzyka raźvićcia pnieŭmanii i chto moža ŭ vyniku pamierci», — cytuje Sydney Morning Herald kiraŭnika daśledavańnia doktara Biendžamina Tanha.
Novy test nie patrabuje pryncypova novaha abstalavańnia, dla jaho patrebnaja ŭsiaho adna kropla kryvi pacyjenta i niekalki hadzin na jaje daśledavańnie. Vyniki dakładnyja na 91%.
Test, jaki atrymaŭ nazvu High-risk Influenza Screen Test (HIST), moža istotna palehčyć žyćcio padčas epidemij, kali navukoŭcy nie paśpiavajuć raspracavać vyratavalnyja vakcyny dla novych štamaŭ virusa hrypu.
«Test prydatny dla luboj infiekcyi hrypu, tamu što pracuje z tym, jak cieła reahuje na virus, a nie z samim typam virusa», — zaŭvažaje Tanh. Dla taho, kab padrychtavać arhanizm da adporu surjoznaj infiekcyi, u kroŭ chvoraha vydzialajecca bijamarkier — hien IF127, jaho i možna zasiekčy z dapamohaj HIST.
«Čym raniej vy pačniecie lačycca, tym bolš šancaŭ vyžyć. Bieź jakasnaj i svoječasovaj intensiŭnaj terapii ryzyka śmiarotnaha zychodu składaje bolš za 50%», — raspaviadaje Tanh. Pavodle danych Suśvietnaj arhanizacyi achovy zdaroŭja, štohod siezonnyja epidemii hrypu zabirajuć žyćci 250-500 tysiač ludziej pa ŭsim śviecie.
HIST užo zapatentavany ŭ Aŭstralii. U ZŠA, Jeŭropie i Kitai patent ciapier znachodzicca na razhladzie.
Ciapier čytajuć
Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju22
Kamientary