Навукоўцы навучыліся вызначаць, для каго грып можа быць смяротным
Аўстралійскія навукоўцы вынайшлі тэст, які можа вызначыць, у якога пацыента грып разаўецца ў смяротна небяспечнае ўскладненне, напрыклад, пнеўманію, паведамляе ВВС.
Гэта дазволіць загадзя аказваць людзям неабходную дапамогу і прадухіляць смяротныя зыходы, заявілі сёння на старонках European Respiratory Journal даследчыкі Уэстмідскага інстытута медыцынскіх даследаванняў.
«Грып здольны забіць у цэлым здаровага чалавека ў самым росквіце сіл. Ніхто не можа сказаць, у каго з пацыентаў есць высокая рызыка развіцця пнеўманіі і хто можа ў выніку памерці», — цытуе Sydney Morning Herald кіраўніка даследавання доктара Бенджаміна Танга.
Новы тэст не патрабуе прынцыпова новага абсталявання, для яго патрэбная ўсяго адна кропля крыві пацыента і некалькі гадзін на яе даследаванне. Вынікі дакладныя на 91%.
Тэст, які атрымаў назву High-risk Influenza Screen Test (HIST), можа істотна палегчыць жыццё падчас эпідэмій, калі навукоўцы не паспяваюць распрацаваць выратавальныя вакцыны для новых штамаў віруса грыпу.
«Тэст прыдатны для любой інфекцыі грыпу, таму што працуе з тым, як цела рэагуе на вірус, а не з самім тыпам віруса», — заўважае Танг. Для таго, каб падрыхтаваць арганізм да адпору сур'ёзнай інфекцыі, у кроў хворага выдзяляецца біямаркер — ген IF127, яго і можна засекчы з дапамогай HIST.
«Чым раней вы пачнеце лячыцца, тым больш шанцаў выжыць. Без якаснай і своечасовай інтэнсіўнай тэрапіі рызыка смяротнага зыходу складае больш за 50%», — распавядае Танг. Паводле даных Сусветнай арганізацыі аховы здароўя, штогод сезонныя эпідэміі грыпу забіраюць жыцці 250-500 тысяч людзей па ўсім свеце.
HIST ужо запатэнтаваны ў Аўстраліі. У ЗША, Еўропе і Кітаі патэнт цяпер знаходзіцца на разглядзе.
Цяпер чытаюць
Калеснікава: Я не разумею, чаму Еўропа не пачала перамовы з Лукашэнкам раней за ЗША58
Каментары