Baćka dziaŭčynki, jakuju ŭkusiŭ sabaka, vyrašyŭ pakarać žyviołu śmierciu. Ciapier jamu pahražaje kryminalnaja sprava.
U adnym z dvaroŭ Mazyra miascovaja dziaŭčynka dražniła biazdomnaha sabaku. Pa słovach inšych dziaciej, nievialiki dvarniaha, jaki da hetaha byŭ całkam pryjaznym, ukusiŭ dzicia. Dziaŭčynka zapłakała i pabiehła dadomu.
Paśla hetaha vyjšaŭ jaje baćka. Paklikaŭ sabaku, toj padyšoŭ. Mužčyna dastaŭ kabiel, abmataŭ sabaku šyju i paciahnuŭ da rova, na vačach u miascovaj dziatvy, pačaŭ dušyć. Kali sabaka pierastaŭ padavać prykmiety žyćcia, skinuŭ sabaku ŭ roŭ.
Paśla mužčyna ŭsio ž vyciahnuŭ sabaku — i paviesiŭ žyviołu na drevie.
Miascovyja chłapčuki płakali i prasili pamiłavać žyviołu, ale ich prośby ab litaści nichto nie pačuŭ, paviedamlaje miascovy telekanał «Mazyr».
Kali mužčyna syšoŭ, chłopcy vyratavali sabaku. Razam z darosłymi advieźli jaho ŭ prytułak. Pa słovach rabotnikaŭ, sabaka byŭ u nieprytomnym stanie, złamanaja zadniaja łapa prosta matlałasia. U zajavie ab pryjomie dvarniahi ŭ punkt časovaha znachodžańnia žyvioł tak i paznačana — susied paviesiŭ sabaku na drevie ŭ dvary doma.
Ciapier sabaka na karancinie. Darosłyja śviedki hetaha incydentu napisali zajavu ŭ milicyju. Pravaachoŭniki pravodziać pravierku.
Kamientary