Natoŭp padletkaŭ sarvaŭ zdymki klipa Maksa Karža na Zybickaj FOTA
U subotu papularny vykanaŭca Maks Korž zdymaŭ u Minsku klip na pieśniu z novaha alboma, jaki vyjdzie vosieńniu. Łakacyjaj była abranaja tusovočnaja Zybickaja. Napiaredadni śpiavak anansavaŭ zdymki rolika ŭ sacsietkach i zaprasiŭ minčan dałučycca. Fanaty dałučylisia, ale zamiest taho, kab zdymacca ŭ masoŭcy, sarvali zdymki.
— Hetym letam, dumaju, usie pahodziacca, što ŭ Minsku adbyvajecca niebyvały pa maštabach dźviž. Jość mahčymaść pakazać heta ŭ klipie, kab jaho ŭbačyli daloka za miežami Minska. Tamu płan taki. U hetuju subotu (19 žniŭnia), a 20:00 źbirajemsia ŭsie na vulicy Zybickaj, — napisaŭ napiaredadni na svajoj staroncy ŭ Instagram Korž.
Śpiavak dadaŭ, što zaprašaje chłopčykaŭ i dziaŭčynak luboha vieku. Pry hetym u publikacyi było ŭkazana, jak pavinny prajści zdymki.
— Raźmiarkoŭvajemsia pa ŭsim hetym miescy (unizie na vulicy baraŭ, i pa vulicy, jakaja viadzie ŭvierch da Ratušy). Špacyrujcie, stojcie, kantaktujcie, picie vadzicu, rabicie, što chočacie. Zdymajem paru hadzinak, da zachodu. Taksama ŭsie, chto jak-niebudź tam zabaŭlaje ludziej (tancy, hitary), taksama vitajucca.
U realnaści ŭsio pajšło nie pa scenary. Užo a 20-j, kali zdymačnaja hrupa pačała pracavać, śpiavak źviarnuŭ u sacsietkach uvahu na adnu z prablem: «Hałoŭnaje — nie hladzieć u kamieru», — paprasiŭ jon.
Ale niekatoryja minčuki ŭsimi sposabami sprabavali trapić u kadr, a kvadrakoptar, jaki zdymaŭ źvierchu, vitali ŭzmachami ruk.
A momantam, kali zrabiłasia kančatkova zrazumieła, što zdymki zryvajucca, staŭ epizod z udziełam samoha Karža. Pavodle siužetu, mašyna sa śpievakom pavinna była prajechać ad restarana «Kala Ratušy» ŭniz pa vulicy Kiryły i Miafodzija da Zybickaj.
Fanataŭ nieadnarazova papiaredžvali: hałoŭnaje — nie biehčy za mašynaj. Ale tyja radasna hrebavali prośbaj, zdymajučy ŭsio na mabilnyja telefony i robiačy sełfi na fonie mašyny sa śpievakom. Zdymačnaj hrupie źniać hety frahmient nie ŭdałosia i ź piaci dublaŭ, i śpievaku pryjšłosia spynić zdymki.
- Karaciej, małyja. U mianie dla vas nievialikaja zajava, - vyzirnuŭšy ź luka aŭtamabila, pačaŭ razmovu z fanatami artyst. - Na žal, zdymki sarvalisia. Napeŭna, z-za svajoj naiŭnaści ja dumaŭ, što nam udasca štości źniać. Siabry, my zaraz źjazdžajem, žadaju vam pośpiechu, siońnia adarvacca narmalna. Ja dumaju, u lubym vypadku, ja sabraŭ vas dla važnaha dźvižu.
Zdymki na hetym nie spynilisia, ale praciahnulisia ŭžo biez udziełu śpievaka. Klip praciahnuć zdymać siońnia ŭviečary na jašče adnoj papularnaj u moładzi vulicy — Kastryčnickaj.
Kamientary