У суботу папулярны выканаўца Макс Корж здымаў у Мінску кліп на песню з новага альбома, які выйдзе восенню. Лакацыяй была абраная тусовочная Зыбіцкая. Напярэдадні спявак анансаваў здымкі роліка ў сацсетках і запрасіў мінчан далучыцца. Фанаты далучыліся, але замест таго, каб здымацца ў масоўцы, сарвалі здымкі.
— Гэтым летам, думаю, усе пагодзяцца, што ў Мінску адбываецца небывалы па маштабах дзвіж. Ёсць магчымасць паказаць гэта ў кліпе, каб яго ўбачылі далёка за межамі Мінска. Таму план такі. У гэтую суботу (19 жніўня), а 20:00 збіраемся ўсе на вуліцы Зыбіцкай, — напісаў напярэдадні на сваёй старонцы ў Instagram Корж.
Спявак дадаў, што запрашае хлопчыкаў і дзяўчынак любога веку. Пры гэтым у публікацыі было ўказана, як павінны прайсці здымкі.
— Размяркоўваемся па ўсім гэтым месцы (унізе на вуліцы бараў, і па вуліцы, якая вядзе ўверх да Ратушы). Шпацыруйце, стойце, кантактуйце, піце вадзіцу, рабіце, што хочаце. Здымаем пару гадзінак, да заходу. Таксама ўсе, хто як-небудзь там забаўляе людзей (танцы, гітары), таксама вітаюцца.
У рэальнасці ўсё пайшло не па сцэнары. Ужо а 20-й, калі здымачная група пачала працаваць, спявак звярнуў у сацсетках увагу на адну з праблем: «Галоўнае — не глядзець у камеру», — папрасіў ён.
Але некаторыя мінчукі ўсімі спосабамі спрабавалі трапіць у кадр, а квадракоптар, які здымаў зверху, віталі ўзмахамі рук.
А момантам, калі зрабілася канчаткова зразумела, што здымкі зрываюцца, стаў эпізод з удзелам самога Каржа. Паводле сюжэту, машына са спеваком павінна была праехаць ад рэстарана «Каля Ратушы» ўніз па вуліцы Кірылы і Мяфодзія да Зыбіцкай.
Фанатаў неаднаразова папярэджвалі: галоўнае — не бегчы за машынай. Але тыя радасна грэбавалі просьбай, здымаючы ўсё на мабільныя тэлефоны і робячы сэлфі на фоне машыны са спеваком. Здымачнай групе зняць гэты фрагмент не ўдалося і з пяці дубляў, і спеваку прыйшлося спыніць здымкі.
- Карацей, малыя. У мяне для вас невялікая заява, - вызірнуўшы з люка аўтамабіля, пачаў размову з фанатамі артыст. - На жаль, здымкі сарваліся. Напэўна, з-за сваёй наіўнасці я думаў, што нам удасца штосьці зняць. Сябры, мы зараз з'язджаем, жадаю вам поспеху, сёння адарвацца нармальна. Я думаю, у любым выпадку, я сабраў вас для важнага дзвіжу.
Здымкі на гэтым не спыніліся, але працягнуліся ўжо без удзелу спевака. Кліп працягнуць здымаць сёння ўвечары на яшчэ адной папулярнай у моладзі вуліцы — Кастрычніцкай.
Цяпер чытаюць
Беларуска кліча на вяселле зорку «Універа», які за вайну. Упрэгся ўвесь Threads2
Каментары