Jehipcianka, jakaja ličyłasia samaj ciažkaj u śviecie, pamierła ŭ Abjadnanych Arabskich Emiratach, paviedamlaje VVS.
Eman Abd el-Aci ŭ pačatku hoda prachodziła kurs lačeńnia ad atłuścieńnia ŭ Indyi.
Pavodle paviedamleńniaŭ ŚMI, u vyniku miedycynskaha ŭmiašańnia jana straciła 300 kh ad 500, ale pamierła z-za ŭskładnieńniaŭ sa zdaroŭjem, jakija ŭźnikli paśla.
U zajavie balnicy havorycca, što 37-hadovaja žančyna pakutavała na chvarobu serca i parušeńnie pracy nyrak.
Eman Abd el-Aci z maja znachodziłasia ŭ stalicy AAE Abu-Dabi, kudy jaje pieraviali paśla baryjatryčnaj apieracyi ŭ horadzie Mumbai.
Pierad apieracyjaj siamja Eman raspaviała, što jana nie vychodziła z domu 25 hadoŭ.
Paśla zboru srodkaŭ u internecie, arhanizavanaha jaje siastroj, žančynu dastavili na čartarnym samalocie ŭ śpiecyjalizavanuju kliniku ŭ Mumbai. Adnak zatym jaje siamja vyrašyła pieravieźci jaje adtul, abvinavaciŭšy miedpiersanał kliniki ŭ niekampietentnaści.
Skandał vybuchnuŭ, kali Šajma Sialim — siastra Eman — vykłała ŭ sacyjalnaj sietcy karotkaje videa, u jakim kaža, što jaje siastra pa-raniejšamu nie moža ni havaryć, ni ruchacca, i nie schudnieła tak mocna, jak zapeŭnivajuć lekary.
Baryjatryčnaja chirurhija, viadomaja taksama jak chirurhija atłuścieńnia, vykarystoŭvajecca dla lačeńnia atłuścieńnia i karekcyi vahi ŭ pacyjentaŭ ź indeksam masy cieła, jaki pieravyšaje 35-40 adzinak. U śviecie ŭ asnoŭnym prymianiajucca bandažavańnie straŭnika, rukaŭnaja hastrapłastyka i straŭnikavaje šuntavańnie.
Ciapier čytajuć
Kaleśnikava: Ja nie razumieju, čamu Jeŭropa nie pačała pieramovy z Łukašenkam raniej za ZŠA56
Kamientary