Alaksandr Łukašenka siońnia na sustrečy z premjer-ministram Małdovy Paŭłam Filipam zajaviŭ pra hatoŭnaść raźvivać supracoŭnictva z Małdovaj, u tym liku davieści jaho da ŭzroŭniu, jaki isnavaŭ u časy Savieckaha Sajuza, piša BiełTA.
«Dziakuj bohu, što ŭ našych adnosinach z Małdovaj absalutna adsutničaje subjektyŭny faktar. Jość zdarovy sens. Kali treba, my hatovyja adnavić toj uzrovień ekanamičnych adnosin, jaki byŭ u časy Savieckaha Sajuza. Bo ničoha inšaha nam adnaŭlać nie treba. My nikoli nie ličyli Małdovu niejkaj čužoj dziaržavaj paśla raspadu Savieckaha Sajuza. My pieražyvajem za toje, što tam adbyvajecca», — zajaviŭ kiraŭnik dziaržavy.
Alaksandr Łukašenka padkreśliŭ, što jak u Małdovy da Biełarusi, tak i ŭ Biełarusi da Małdovy isnuje vialikaja cikavaść. Jon adznačyŭ, što jašče ŭ časy Savieckaha Sajuza nie adnojčy byvaŭ u Małdovie. «Kvitniejučy, pryhožy kraj. Jon ža nikudy nie źnik. Vydatnyja ludzi, takija, jak biełarusy, — pracavityja. Dobryja ziamli, jakija dajuć toje, što patrebna nam. U nas u płanie techniki, jakaja patrebna vam, taksama šmat čaho jość», — skazaŭ kiraŭnik dziaržavy.
«Hałoŭnaje, kab dziaržavy isnavali jak adzinyja i cełasnyja, nia padzielenyja, nie razdroblenyja, nie padranyja na kavałki. I kab na hetych terytoryjach ščaśliva žyli ludzi. Kali tak budzie, tady pryjdzie i tavaraabmien, da jakoha my imkniemsia, kab jon byŭ usio bolšy i bolšy», — upeŭnieny kiraŭnik dziaržavy.
«Kali ŭ vas buduć niejkija dadatkovyja žadańni pracavać na biełaruskim rynku, u nas prablem nie budzie, bo vy da nas idziacie z tymi tavarami, jakija my nie vyrablajem. Kali ŭ vas budzie mahčymaść i žadańnie, kab my šyrej byli pradstaŭleny ŭ Małdovie, budźcie ŭpeŭnienyja ŭ tym, što my heta zrobim chutka i apieratyŭna», — zapeŭniŭ Alaksandr Łukašenka.
U svaju čarhu Pavieł Filip padziakavaŭ biełaruskamu boku za padtrymku Małdovy ŭ samyja ciažkija časy, kali ŭźnikali składanaści na mižnarodnym uzroŭni. «Za heta vam asobny dziakuj. Narod naš heta zaŭsiody budzie pamiatać», - skazaŭ jon.
«Dyk dadomu zabiary ałkaša abascanaha i vychodžvaj». Małady zahadčyk adździaleńnia balnicy nie strymlivaje siabie ŭ vyrazach u sacsietkach24
Kamientary